ارىقتايمىن دەپ ءدارى ىشكەن اقتاۋلىق قىزدىڭ جۇرەگى 5 مينۋتقا توقتاپ قالعان

  ارىقتايمىن دەپ ءدارى ىشكەن اقتاۋلىق قىزدىڭ جۇرەگى 5 مينۋتقا توقتاپ قالعان،- دەپ حابارلايدى .

كارديوحيرۋرگ-دارىگەرلەر ارىقتايمىن دەپ ءدارى ءىشىپ، جۇرەگى 5 مينۋتقا توقتاعان 30 جاستاعى ناۋقاستى امان الىپ قالدى.

ناۋقاس جەلتوقسان ايىندا جەدەل جۇرەك جەتىسپەۋشىلىگى دياگنوزىمەن اۋرۋحانانىڭ قابىلداۋ بولىمىنە وتە اۋىر جاعدايدا تۇسكەن. ارتەريالدىق قان قىسىمى كۇرت تومەندەپ، ناۋقاستا كارديوگەندى شوك بولعان. دارىگەرلەر جەدەل تۇردە ۋدز جاساپ، جۇرەكتىڭ جيىرىلۋ قابىلەتى تومەندەگەنىن انىقتادى.

"اتا- اناسىنىڭ ايتۋىنشا، ناۋقاس ارىقتاتۋعا ارنالعان ءدارىنى ىشكەن. سونىڭ سالدارى جۇرەككە اسەر ەتتى دەگەن تۇجىرىمعا كەلدىك. سەبەبى ارىقتاتۋعا ارنالعان ءدارىنىڭ قۇرامىندا "سيبۋترامين" دەگەن زيان زات بار. بۇل ءدارى جۇرەك- قان تامىر جۇيەسىنىڭ السىزدىگىنە الىپ كەلەدى. ناۋقاستىڭ قان قىسىمى قالىپقا كەلمەگەن سوڭ جەدەل تۇردە جاساندى جۇرەك- وكپە (ە ك م و) قۇرىلعىسىنا قوستىق. وسىلايشا، جۇرەككە قوسىمشا سۇيەمەلدەۋ ارقىلى كومەك بەرىپ، قان قىسىمىن 70-كە دەيىن كوتەردىك"،- دەيدى كارديوحيرۋرگ-دارىگەر ءابۋناسىر سۋحانوۆ.

ناۋقاس ە ك م و (جاساندى جۇرەك- وكپە) قۇرىلعىسىمەن 1 اپتا ءجۇردى. جۇرگىزىلگەن ەم ناتيجەسىندە جۇرەكتىڭ فراكسياسى وسە باستادى، سايكەسىنشە، قان قىسىمى دا كوتەرىلدى. ناۋقاس ويانعان سوڭ ە ك م و جانە وكپەنى جاساندى جەلدەتۋ اپپاراتىنان دا اجىراتىلدى. قازىر ناۋقاستىڭ جاعدايى جاقسى. ناۋقاستىڭ اناسى مەيرامگۇل كەنجەبايەۆا دارىگەرلەرگە العىسىن ايتىپ، ريزاشىلىعىن ءبىلدىردى.

Massaget.kz