الايدا مۇنداي ونىمدەردىڭ ارتىندا ناقتى عىلىمي دالەل بار ما، الدە بۇل ماركەتينگتىك ءتاسىل مە دەگەن سۇراق قوعامدا ءجيى كوتەرىلەدى. وعان ق ر دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتىنىڭ باس ساراپشىسى داناگۇل قاسقاتايەۆا جاۋاپ بەردى.
ماماننىڭ ايتۋىنشا، بيولوگيالىق بەلسەندى قوسپالار نارىعى مەملەكەت تاراپىنان قاتاڭ باقىلاۋدا. ءاربىر ءونىم نارىققا شىعار الدىندا مىندەتتى تۇردە سانيتاريالىق-ەپيدەميولوگيالىق تەكسەرىستەن وتەدى. سونىمەن قاتار الەۋمەتتىك جەلىلەردەگى جارنامالار دا تۇراقتى باقىلاۋدا.
- ەلىمىزدە بيولوگيالىق بەلسەندى قوسپالار نارىعى مينيسترلىككە قاراستى سانيتاريالىق-ەپيدەميولوگيالىق باقىلاۋ كوميتەتىنىڭ قۇزىرىندا. ياعني كەز كەلگەن ءونىم نارىققا شىعار الدىندا بەلگىلى ءبىر تەكسەرىستەن ءوتۋى ءتيىس. الەۋمەتتىك جەلىلەردەگى جارناما دا باقىلاۋدا. ماسەلەن، 2 ايدىڭ ىشىندە 877 پروفيلدە كۋالىكسىز ساتىلعان بيولوگيالىق بەلسەندى قوسپالار انىقتالدى. ولارعا ءتيىستى نۇسقامالار جىبەرىلدى. ەگەر تالاپ ورىندالماسا، مادەنيەت جانە اقپارات مينيسترلىگىمەن ولاردىڭ سايتى بۇعاتتالادى، - دەدى داناگۇل قاسقاتايەۆا Jibek Joly تەلەارناسىنىڭ «بۇگىن Live» باعدارلاماسىندا.
سونداي-اق ساراپشى ونىمدەردىڭ قاۋىپسىزدىگىن راستايتىن قۇجاتتاردى تەكسەرۋدىڭ ماڭىزىن ەرەكشە اتاپ ءوتتى.
- كەدەن وداعىنا كىرەتىن 5 مەملەكەتتەن ءاربىر ءونىم تەكسەرىسسىز كىرەدى. ءبىراق ولاردىڭ ساپاسى مەن قاۋىپسىزدىگىنە قاتىستى قۇجاتتارى قارالادى. دەرەكتەرگە سۇيەنسەك، 200 دەن استام ءونىم وندىرۋشىلەردىڭ جالعان قۇجاتتارى انىقتالعان. مۇنداي جاعدايدا 3 اي بويى كۇشەيتىلگەن زەرتحانالىق جۇمىستار جۇرگىزىلەدى. ەگەر ولقىلىق قايتالانسا، ءونىم ىشكى نارىققا جىبەرىلمەيدى، - دەدى ساراپشى.
مامان مەملەكەتتىك تىركەۋدەن وتكەن ونىمدەردىڭ ءتىزىمى مينيسترلىك سايتىندا قولجەتىمدى ەكەنىن دە ەسكە سالدى. دەگەنمەن ول بيولوگيالىق بەلسەندى قوسپالاردىڭ ءدارى ەمەس ەكەنىن، سوندىقتان ولاردى ەمدىك قۇرال رەتىندە قابىلداۋعا بولمايتىنىن قاتاڭ ەسكەرتەدى.
- بەلگىلى ادامدار وسىنداي ونىمدەرگە جارناما جاساپ جاتادى. مىڭ اۋرۋدىڭ ەمىنە بالايدى. الايدا جالتىراعان جارناماعا ۇمتىلماۋ كەرەك، - دەدى ول.
ايتا كەتەيىك، ەلىمىزدە مەديتسينالىق ءبىلىم بەرۋ 7 جىلدىق وقۋعا كوشىرىلمەك.