پاريجدىكتەر 100 جىلدان كەيىن العاش رەت سەنادا شومىلا باستادى

استانا. Kazinform - پاريج تۇرعىندارى 100 جىلدان استام ۋاقىتتان كەيىن العاش رەت سەنا وزەنىندە زاڭدى تۇردە شومىلۋ مۇمكىندىگىنە يە بولدى. 5-شىلدە كۇنى وزەندە ءۇش ارنايى شومىلۋ ايماعىنىڭ رەسمي اشىلۋى ءوتتى، دەپ حابارلايدى Euronews.

پاريج مەرى انن يدالگو سەنبى كۇنى تاڭەرتەڭ شومىلۋ ايماقتارىنىڭ ءبىرىنىڭ اشىلۋىنا قاتىسىپ، بالالىق ارمانى ورىندالعانىن ايتتى.

- مەنىڭ بالا كەزىمنەن بەرگى ارمانىم - ادامداردىڭ سەنادا قايتادان شومىلا الۋى ەدى، - دەدى ول.

شومىلۋعا ارنالعان ءۇش ايماق ەيفەل مۇناراسىنىڭ، قۇداي انا سوبورىنىڭ جانە فرانسۋا ميتتەران اتىنداعى كىتاپحانانىڭ جانىندا ورنالاسقان. وسى ارنايى ايماقتاردان تىس جەردە شومىلۋعا قاۋىپسىزدىك ماقساتىندا ءالى دە تىيىم سالىنعان.

ايتا كەتەيىك، سەنادا شومىلۋعا 1923-جىلدان باستاپ وزەننىڭ لاستانۋى مەن بەلسەندى كەمە قوزعالىسىنا بايلانىستى تىيىم سالىنعان بولاتىن. الايدا وتكەن جىلى پاريج بيلىگى مەن وليمپيادا ويىندارىنىڭ ۇيىمداستىرۋ كوميتەتى وزەندى تازارتۋ ءۇشىن 1,4 ميلليارد ەۋروعا جۋىق قارجى قۇيىپ، قازىر سەناداعى سۋ ساپاسى كوپ جاعدايدا ەۋروپالىق وداقتىڭ ستاندارتتارىنا ساي كەلەتىنى حابارلاندى.

ەكولوگتاردىڭ مالىمەتىنشە، سۋدىڭ باكتەريالار دەڭگەيى رەسمي شەكتى كورسەتكىشتەردەن الدەقايدا تومەن.

- سۋدىڭ ساپاسى كەرەمەت، - دەدى يل-دە فرانس ايماعىنىڭ پرەفەكتىسى مارك گيوم. - ءبىز ىشەك تاياقشاسى مەن ەنتەروكوكك دەڭگەيىن باقىلايمىز: بىرەۋىنىڭ مولشەرى شەكتى دەڭگەيدەن ون ەسە، ەكىنشىسىنىكى 25 ەسە تومەن.

الايدا جەرگىلىكتى تۇرعىنداردىڭ بارلىعى بۇل جاڭالىقتى قۋانا قابىلداپ وتىرعان جوق.

- شىنىمدى ايتسام، تاۋەكەلگە بارمايمىن، - دەدى جەرگىلىكتى تۇرعىنداردىڭ ءبىرى AP اگەنتتىگىنە. - سەنادا نەشە ءتۇرلى زاتتاردىڭ ءجۇزىپ جۇرگەنىن ءوز كوزىممەن كوردىم، سوندىقتان شىنىمەن تازا ەكەنىنە كوزىم جەتكەنشە كۇتە تۇرامىن.