پاريجدەن 12 مىڭنان استام ءۇيسىز ادام كۇشپەن شىعارىلعان

استانا. قازاقپارات - پاريجدە باسپاناسى جوق ادامدار نارازىلىققا شىقتى. فرانسياداعى بەلسەندىلەر الەم پاريج وليمپياداسىنىڭ تەك جاقسى جاعىن عانا كورىپ وتىرعانىن، جازعى ويىنداردىڭ ەل ازاماتتارى مەن ميگرانتتار ءۇشىن تەرىس اسەرى بارىن ايتادى، دەپ حابارلايدى Ulysmedia.kz.

24.kz تەلەارناسىنىڭ حابارلاۋىنشا، پاريجدىڭ ورتالىعىندا باسپاناسىز ادامدار نارازىلىق اكسياسىن وتكىزدى. كوبى - ايەلدەر مەن بالالار.

ولار وليمپيادا ويىندارى باستالعاننان كەيىن مۇلدە دالادا قالعانىن، جاعدايى بۇرىنعىدان دا قيىن ەكەنىن ايتادى. ءۇيسىز جاندارعا ۇكىمەتتىڭ ەمەس ۇيىمدار اراشا ءتۇستى. بەلسەندىلەردىڭ مالىمدەۋىنشە، پاريجدەن 12500 باسپاناسىز ادامنىڭ كۇشپەن شىعارىلعان. بۇل 2 جىل بۇرىنعى كورسەتكىشتەن @ جوعارى.

«بۇل ادامدار وليمپيادا باستالعانعا دەيىن الەۋمەتتىك جاتاقحانالاردا تۇرىپ كەلگەن. ولارعا ءتىپتى پاريج اۋماعىنان تەز ارادا شىعىپ، باسقا ايماقتارعا كەتۋگە نۇسقاۋ بەرىلگەن. ۇيسىز جۇرگەن وتباسىلاردىڭ اراسىندا بالالار كوپ، ەڭ كىشىسى - 3 اپتالىق ءسابي»، - دەيدى ۇكىمەتتىك ەمەس ۇيىم وكىلى يانن مانزي.

بۇدان بولەك، پاريجدە تۇنەپ شىعاتىن ورىندار مەن تەگىن تاماق ۇلەستىرەتىن ورتالىقتار دا جابىلدى. بيلىك ءۇيى جوق ادامداردى قۋۋعا بىلتىردان قامدانعان. ءبىر جىل بۇرىن ولارعا ايىپپۇل سالۋ، ءتىپتى قاماۋعا الۋ تۋرالى زاڭ شىقتى.

«نەگىزى وسى وليمپيادا ويىندارى كەزىندە ءبىز ادام قۇقىعىنا قۇرمەتپەن قاراۋدىڭ جاقسى ۇلگىسىن كورسەتۋىمىز كەرەك ەدى. وسى تاماشا تاريحي مۇمكىندىكتى جىبەرىپ الىپ وتىرمىز»، - دەدى ۇكىمەتتىك ەمەس ۇيىم وكىلى پول الازي.

بيلىك: «ءۇيسىز ادامداردى وليمپيادا اياقتالعان سوڭ جارىلقايمىز»، - دەيدى. وليمپياداعا قاتىسۋشى سپورتشىلارعا ارنالعان توسەك- جابدىق ءۇيى جوق ادامدارعا بەرىلمەك.