پاريجدە وليمپيادا ويىندارى الدىندا ميگرانتتار كوشىرىلە باستادى

استانا. KAZINFORM - پوليتسيا ميگرانتتاردى پاريجدەگى ۋاقىتشا لاگەردەن كوشىرە باستادى. الايدا باسپاناسىز توپتارعا كومەك كورسەتۋ توپتارى بۇل جازعى وليمپيادا ويىندارىنا دايىندىققا بايلانىستى جاسالىپ جاتقانىن ايتتى، دەپ حابارلايدى euronews.

فرانسۋز پوليتسياسى لاگەردەن باتىس افريكادان كەلگەن 30 عا جۋىق جاس ءوسپىرىم مەن جاستاردى قۋىپ جىبەردى. قۇقىق قورعاۋشىلار مەن ۇيسىزدەرگە كومەك كورسەتۋ ۇيىمدارى مۇنى «الەۋمەتتىك تازارتۋ» دەپ اتاعان. كوشىرىلگەندەردىڭ كوبى كامەلەتكە تولماعاندار، ولار تۇرۋعا ىقتيارحات الماق بولعان.

«ءبىز بۇل وليمپيادا ويىندارىن ۇيىمداستىرۋمەن بايلانىستى دەپ ويلايمىز. مۇنداي ەۆاكۋاتسيا پاريجدە بىرنەشە اي بويى اپتا سايىن قارقىندى تۇردە ءجۇرىپ جاتىر، بۇل كوشەدە تۇراتىن بارلىق ادامدارعا اسەر ەتەدى»، - دەدى «Le revers de la medaille» توبىنىڭ مۇشەسى ورەلي يۋو.

پوليتسيا بۇل وپەراتسيانىڭ قاۋىپسىزدىك ماقساتىندا، اسىرەسە ۋاقىتشا لاگەر كەيبىر مەكتەپتەرگە جاقىن بولعاندىقتان جۇرگىزىلگەنىن ايتتى.

«بۇل - وليمپيادا الدىندا پاريجدە بولىپ جاتقان الەۋمەتتىك تازارتۋدىڭ تاعى ءبىر مىسالى. پوليتسيا پاريجدەگى بارلىق لاگەرلەردى ەۆاكۋاتسيالاپ جاتىر. ويتكەنى وليمپياداعا جانە تۋريستەرگە جول اشقىسى كەلەدى. ولار پاريجدىڭ ميگرانتتارمەن جانە باسپانا ىزدەۋشىلەرگە تولى بولعانىن كورگىسى كەلمەيدى»، - دەدى «ۋتوپيا 56» ۇ ە ۇ مۇشەسى ەلياس حۋفناگەل.

بۇل جاڭالىق پوليتسيا پاريجدىڭ وڭتۇستىگىندەگى فرانسيانىڭ ەڭ ۇلكەن سكۆوتتەرلەر لاگەرىندە اۋقىمدى كوشىرۋ جۇرگىزگەننەن بىرنەشە كۇن وتكەن سوڭ تارادى. كومەك كورسەتۋ توپتارى ميگرانتتار پاريجدەن الىس جەرگە كوشىرىلىپ جاتقانىن اتاپ ءوتتى.