پاريجدە قازاقستان تۋرالى تالدامالىق بايانداما شىعارىلدى

پاريج. KAZINFORM - فرانسيانىڭ «Choiseul» گەوستراتەگيالىق ينستيتۋتى «قازاقستان: ورتا دەرجاۆا، قالىپتاسىپ جاتقان الىپ ەل» («Kazakhstan: puissance moyenne, géant en devenir») اتتى تالدامالىق بايانداما شىعاردى.

اۆتورلارى - ينستيتۋت پرەزيدەنتى پاسكال لورو جانە ونىڭ كەڭەسشىسى پەر ۆەرليك. بۇل تۋرالى سىرتقى ىستەر مينيسترلىگىنىڭ باسپا ءسوز قىزمەتى مالىمدەدى.

ءىس-شاراعا قازاقستان تاراپىنان پاريجگە جۇمىس ساپارىمەن كەلگەن ونەركاسىپ جانە قۇرىلىس ءمينيسترى قانات شارلاپايەۆ، قازاقستاننىڭ فرانتسياداعى ەلشىسى گۇلسارا ارىستانقۇلوۆا، ال فرانسۋز تاراپىنان - ەليسەي سارايىنىڭ، س ءى م، باسقا دا مەملەكەتتىك ورگانداردىڭ وكىلدەرى، كومپانيا باسشىلارى، قوعام قايراتكەرلەرى مەن ساراپشىلار قاتىستى.

ءىس-شارا بارىسىندا اۆتورلار باياندامانىڭ نەگىزگى مازمۇنىمەن تانىستىردى. اتاپ ايتقاندا، ول پرەزيدەنت قاسىم-جومارت توقايەۆ باستاماشىلىق ەتكەن ساياسي جانە الەۋمەتتىك-ەكونوميكالىق رەفورمالاردى، ەلىمىزدىڭ ورتالىق ازيا وڭىرىندەگى كوشباسشى رەتىندەگى ەكونوميكالىق دامۋىن، سونداي-اق قازاقستاننىڭ كوپۆەكتورلى ساياساتى مەن حالىقارالىق ارەناداعى ءرولىن تالدايتىن ءۇش بولىمنەن تۇرادى.

باياندامادا قازاقستاننىڭ شىعىس پەن باتىس اراسىنداعى بايلانىستىرۋشى كوپىر رەتىندەگى ستراتەگيالىق ماڭىزى، ونىڭ حالىقارالىق ساياسات پەن ەكونوميكاداعى ءوسىپ كەلە جاتقان ءرولى، سونداي-اق ەلدىڭ جاھاندىق كۇن تارتىبىنە قوسىپ جاتقان قوماقتى ۇلەسى ەرەكشە اتالىپ ءوتتى.

قازاقستاننىڭ ە ى د ۇ- دىڭ وزىق تاجىريبەلەرى مەن ستاندارتتارىن يمپلەمەنتاتسيالاۋعا بەرىك بەيىلدىلىگىنە جانە وسى باعىتتا قول جەتكىزىلگەن ەلەۋلى پروگرەسسىنە باسا نازار اۋدارىلادى. فرانسۋز ماماندارىنىڭ پىكىرىنشە، بۇل جەتىستىك دە ەلىمىزدىڭ ورتالىق ازيا وڭىرىندەگى ەكونوميكالىق دامۋداعى كوشباسشىلىعىن راستايدى.

«Choiseul» ساراپشىلارى ءوز تالداۋلارىندا فرانسيانىڭ قازاقستانمەن ستراتەگيالىق ارىپتەستىك سيپاتىنا يە ىنتىماقتاستىعىنا ەرەكشە كوڭىل بولەدى. ولار فرانسۋز بيزنەسىن «جاقىن بولاشاقتا حالىقارالىق دەڭگەيدە ىقپالدى الىپ ەلگە اينالۋعا قابىلەتتى» ەلمەن ىنتىماقتاستىقتىڭ تىڭ مۇمكىندىكتەرىن پايدالانۋعا شاقىردى.

ءىس-شارا سوڭىندا پىكىر الماسۋ ءوتتى. ونىڭ بارىسىندا فرانسۋز اۋديتورياسى قازاقستاندا ينۆەستورلارعا مەملەكەتتىك قولداۋ شارالارىنا، ەنەرگەتيكالىق اۋىسۋ جانە جاڭا تەحنولوگيالاردى دامىتۋ، جاساندى ينتەللەكتتى قوسا العاندا سيفرلاندىرۋ ماسەلەلەرىنە جوعارى قىزىعۋشىلىق تانىتتى. سونىمەن قاتار، ءبىرقاتار فرانتسۋز كاسىپورىنى («Vicat»، «Air Liquide» جانە ت. ب. ) جانە «بايتەرەك» حولدينگىنىڭ ديرەكتورلار كەڭەسىنىڭ تاۋەلسىز مۇشەسى قازاقستانداعى ءساتتى جۇمىس تاجىريبەسىمەن ءبولىستى.

قازاقستان تۋرالى «Choiseul» اناليتيكالىق بايانداماسى ساياساتكەرلەر، ىسكەرلەر، زەرتتەۋشىلەردەن باستاپ، قازاقستاننىڭ قازىرگى الەمدەگى ءرولى مەن گەوستراتەگيالىق ماڭىزىن تۇسىنۋگە ۇمتىلاتىن ازاماتتارعا دەيىن وقىرمانداردىڭ كەڭ اۋقىمىنا ارنالعان.

ايتا كەتەيىك، «Choiseul» حالىقارالىق ساياسات جانە گەوەكونوميكا ينستيتۋتى - حالىقارالىق قاتىناستاردى، ەكونوميكالىق جانە ساياسي ستراتەگيالاردى، سونداي-اق حالىقارالىق مادەنيەتتەردى تالداۋمەن اينالىساتىن تاۋەلسىز زەرتتەۋ ورتالىعى. ول تۇراقتى تۇردە فرانسيا ءۇشىن ستراتەگيالىق قىزىعۋشىلىق تۋدىراتىن سالالار نەمەسە شەتەلدىك سەرىكتەستەر بويىنشا تالدامالىق باياندامالار شىعارادى.