پاريجدە 10 مىڭ جانكۇيەر دەمەۋ جادىرايەۆقا قوشەمەت كورسەتتى
استانا. KAZINFORM - فرانسيا استاناسى پاريج قالاسىندا جازعى وليمپ ويىندارىنىڭ اياسىندا اتلەتتەرگە قۇرمەت كورسەتۋ كەشى ءوتتى. وعان ءار قۇرامادان جەڭىسكە جەتكەن جۇلدەگەرلەر ىرىكتەپ الىندى.
قازاقستان ۇلتتىق وليمپيادا كوميتەتى تاراتقان مالىمەتكە سەنسەك، ءبىزدىڭ كوماندادان بۇل سالتاناتتى شاراعا 77 كەلىدە گرەك-ريم كۇرەسىنەن كۇمىس مەدال يەگەرى دەمەۋ جادىرايەۆ قاتىسقان.
«سالەم، پاريج! پاريج وليمپياداسىنىڭ كۇمىس جۇلدەگەرى دەمەۋ جادىرايەۆ چەمپيوندار ساياباعىنداعى اتلەتتەردى قۇرمەتتەۋ كەشىنە قاتىستى. فرانسيادا ءبىزدىڭ سپورتشىمىزدى 10 مىڭنان اسا ادام كۇتىپ الىپ، قوشەمەت كورسەتتى!» دەيدى كوميتەتتەن.
ايتا كەتەيىك، كەشە دەمەۋ جادىرايەۆ فينالدا جاپونيالىق ناو كۋساكادان 5:2 ەسەبىمەن ۇتىلىپ، پاريج وليمپياداسىنىڭ كۇمىس جۇلدەسىن قاناعات تۇتتى.
گرەك-ريم كۇرەسىنەن ۇلتتىق قۇرامانىڭ باس باپكەرى يۋري مەلنيچەنكو جارىستان كەيىن دەمەۋ جادىرايەۆتىڭ فينالداعى بەلدەسۋى جايىندا پىكىر ءبىلدىردى.
ونىڭ ايتۋىنشا، جادىرايەۆقا ازداعان ەپتىلىك جەتپەي قالعان.
دەمەۋدىڭ ءوزى دە ەلىنە التىن سىيلاعىسى كەلگەنىن، الايدا سوڭعى ساتتە جاۋاپكەرشىلىك جۇگى اۋىرلاپ، جەڭىستى ۋىسىنان شىعارىپ العانىن ايتىپ اعىنان جارىلعان بولاتىن.
اۆتور
جانات قاپالبايەۆا