پاريج پوليتسەيلەرى وليمپيادانىڭ اشىلۋ سالتاناتىن قاتاڭ رەجيمدە كۇزەتىپ تۇر

پاريج. KAZINFORM - بۇگىن تورتكۇل دۇنيە كوز تىككەن پاريج وليمپياداسىنىڭ الاۋى تۇتاندى. قازىر فرانسيادا ويىنداردىڭ اشىلۋ سالتاناتىنا بايلانىستى پاريج پوليتسەيلەرى قاتاڭ رەجيمدە قىزمەت اتقارۋدا.

وليمپيادا ويىندارىنىڭ اشىلۋ سالتاناتى ءوتىپ جاتقان ەيفەل مۇناراسى مەن سەنا وزەنىنىڭ جاعالاۋىنا اپاراتىن بارلىق جولدارعا توسقاۋىلدار قويىلعان. قاۋىپسىزدىك شارالارىن بارىنشا كۇشەيتىلگەن.

ءدال قازىر پوليتسەيلەر مەن ۆولونتەرلەردى قوسا العاندا 80 مىڭعا جۋىق ادام قوعامدىق ءتارتىپتى قاداعالاپ ءجۇر.

ال سەنا وزەنىنىڭ جاعالاۋىنداعى سپورتشىلار شەرۋى وتەتىن اۋماقتارعا ءوتۋ شەكتەلگەن. تەك ارنايى قىزمەت وكىلدەرى عانا كىرىپ-شىعا الادى.

جالپى، 45 مىڭ پوليتسەي، 10 مىڭ سارباز جانە 2 مىڭ جەكە كۇزەت قىزمەتكەرى سەنا وزەنىندە، ونىڭ جاعالاۋى مەن اينالاسىنداعى ەسكەرتكىشتەر بويىمەن وتەتىن شەرۋدىڭ قاۋىپسىزدىگىن قامتاماسىز ەتۋدە.

ايتا كەتەيىك، جازعى وليمپيادا ويىندارى تاريحىندا العاش رەت اشىلۋ سالتاناتى ستاديوندا ەمەس، تابيعات اياسىندا، سەنا وزەنىنىڭ بويىندا ءوتىپ جاتىر.

فرانسيا استاناسى پاريج قالاسىندا الۋى تۇتانعان XXXIII جازعى وليمپيادا ويىندارىنا قازاقستاننان 80 سپورتشى سپورتتىڭ 25 تۇرىنەن سىنعا تۇسەدى. وليمپيادا ويىندارى 26-شىلدە مەن 11-تامىز ارالىعىندا وتەدى. وندا 205 ەلدىڭ 10500 سپورتشىسى 32 سپورت تۇرىنەن 329 مەدال جيىنتىعىن ساراپقا سالادى.

اۆتور
كۇنسۇلتان وتارباي