پاريج وليمپياداسىنىڭ باستالۋىنا دەيىن بىلۋگە ءتيىس 100 دەرەك

استانا. KAZINFORM - فرانسيا تورىندە الاۋى تۇتاناتىن XXXIII جازعى وليمپيادا ويىندارىنىڭ باستالۋىنا تۋرا 100 كۇن قالدى. تورتكىل دۇنيە كوز تىككەن ءتورتجىلدىق دودا وسى جىلدىڭ 26-شىلدەسى مەن 11-تامىزى ارالىعىندا وتەدى. وسى ورايدا الداعى ويىندار تۋرالى ق ر ۇلتتىق وليمپيادالىق كوميتەتى ۇسىنعان 100 قىزىقتى دەرەكتى وقىرماندارىمىزبەن ءبولىسۋدى ءجون سانادىق.

1. پاريج قالاسى وليمپيادا ويىندارىن سوڭعى 100 جىلدا العاش رەت قابىلداعالى وتىر. 1924 -جىلى ماحاببات قالاسىندا جازعى ويىندار وتكىزىلىپ، كەيىن تەك قانا قىسقى وليمپيادا ويىندارى ۇيىمداستىرىلدى.

2. 1900 -جىلى پاريج تاريحقا ەندى. سول جىلى وليمپيادا ويىندارىندا تۇڭعىش رەت ايەلدەر باق سىنادى.

3. فرانسيادا وليمپيادا ويىندارى التىنشى رەت وتكەلى وتىر.

4. پاريج ويىندارى سوڭعى 12 جىلدا ەۋروپادا وتەتىن العاشقى وليمپيادا بولماق.

5. 2024 -جىلى العاش رەت برەيكينگتەن مەدالدار تاراتىلادى. جۇلدەنىڭ بىرىنە قازاقستان دا ءۇمىتتى بولۋى مۇمكىن.

6. سەرفينگ دوداسى فرانسيانىڭ ماتەريكتىك بولىگىندە ەمەس، تايتي ارالىندا وتەدى.

7. پاريج پەن تايتي اراسى 15700 شاقىرىمدى قۇرايدى، بۇل وليمپيادا ويىندارىنىڭ رەكوردى. بۇعان دەيىن ەشبىر جارىس وليمپيادانى قابىلداۋشى قالادان سونشالىقتى الىس وتكەن ەمەس.

8. تاريحتا تۇڭعىش رەت وليمپيادا جانە پاراليمپيادا ويىندارىنىڭ بويتۇمارى بىردەي بولماق.

9. تاعى ءبىر تاريحي ءسات - اۋەسقويلار اراسىنداعى مارافون. بۇل جارىس وليمپيادالىق تاس جولدا جانە سوعان ساي تالاپتار بويىنشا وتەدى. مۇنداعى ايىرماشىلىق جۇگىرۋ جارىسى وتەتىن ۋاقىتتا عانا.

10. پاريج جازعى وليمپيادانى ءۇشىنشى رەت قابىلدايتىن ەكىنشى قالا. بۇعان دەيىن لوندون جازعى ويىندى ءۇش رەت وتكىزگەن.

11. فرانسيا بيلىگى 2024 -جىلعى وليمپيادانى وتكىزۋ ءۇشىن 8 ميلليارد ەۋرودان ارتىق قاراجات ءبولۋدى جوسپارلاعان.

12. 2024 -جىلعى وليمپيادا ويىندارىنىڭ ۇرانى: «كەڭىنەن اشىق ويىندار».

13. ويىننىڭ بويتۇمارى - فريگي ەسىمدى فريگيالىق قالپاق.

14. وليمپيادا ويىندارىنىڭ ەستافەتاسى ساۋىردە باستالىپ، فرانسيانىڭ بارلىق دەپارتامەنتتەرى ارقىلى وتەدى.

15. الاۋ گرەكيادان فرانسياعا قايىق ارقىلى جەتكىزىلەدى.

16. الاۋ قۇتىسىنىڭ جوباسىن تانىمال ديزاينەر ماتتە لەانەر جاساپ شىعارعان.

17. الاۋ قۇتىسىنىڭ تومەنگى بولىگى اققاينار ءتۇستى بولاتتان دايىندالدى.

18. جەڭىمپازدار مەن جۇلدەگەرلەر تاعاتىن مەدالدىڭ باستى ەرەكشەلىگى - ايگىلى ەيفەل مۇناراسىنىڭ بولشەگى. بۇل بارلىق جۇلدەدە بولادى.

19. پاريجدە العاش رەت حالىقارالىق سپورتتىق فەدەراتسيا جەڭىمپازدارعا سىياقى تاعايىندايدى. مۇنداي باستامانى الەمدىك جەڭىل اتلەتيكا ۇيىمى كوتەرىپ وتىر. 48 ديستسيپلينانىڭ بىرىندە جەڭىسكە جەتكەن ءاربىر اتلەت World Athletics تاراپىنان 50 مىڭ دوللار كولەمىندە سىياقى الادى. ەستافەتادا بۇل سومانى كوماندانىڭ ءاربىر قاتىسۋشىسى ءوزارا ءبولىپ الادى.

20. پاريجدە سپورتتىڭ 32 تۇرىنەن مەدالدار ۇلەستىرىلەدى.

21. مۇنداعى جاڭاشىل باستامالاردىڭ ءبىرى - جەڭىمپازدار مەن جۇلدەگەرلەردىڭ جەڭىستى بۇكىل الەم جانكۇيەرلەرىمەن بىرگە اتاپ ءوتۋى. شەرۋ ەيفەل مۇناراسىنا جاقىن جەردە وتەدى.

22. جارىستاردى وتكىزۋ ءۇشىن 35 سپورت نىسانى جۇمىس ىستەيدى.

23. جازعى ويىنداردى لە-يۆەلين، سەنا مەن مارنا، و-دە-سەن جانە سەنا-سەن-دەني دەپارتامەنتتەرى قابىلدايدى. فۋتبول ماتچتارى بوردو، نانت، ليون، سەنت-ەتەن، نيتستسا جانە مارسەل قالالارىندا وتەدى.

24. جارىس باعدارلاماسىنان كاراتە، بەيسبول جانە سوفتبول سىندى سپورت تۇرلەرى الىنىپ قالعان.

25. ويىن كەزىندەگى باستى ستاديون «ستاد دە فرانس» بولماق. اتالعان ستاديوندا سالتاناتتى راسىمدەر، سونداي- اق، جەڭىل اتلەتيكا مەن رەگبيدەن جارىستار وتكىزىلەدى.

26. وليمپيادانىڭ اشىلۋى سەنا وزەنىندە وتەدى.

27. سپورتشىلار شەرۋى وزەن ۇستىندە وتەدى. ءاربىر دەلەگاتسيا جەكەلەگەن قايىقپەن جۇزەدى.

28. سپورتشىلار شەرۋىنە 10500 اتلەت قاتىسادى دەپ كۇتىلۋدە.

29. دەلەگاتسيالار ءجۇزىپ وتەتىن باعىت التى شاقىرىمدى قۇرايدى.

30. تىكەلەي كورسەتىلىم ۇلكەن 80 ەكراندا كورسەتىلەدى.

31. شەرۋ كەزىندە 160 تان استام قايىق قولدانىلادى.

32. سەنا وزەنىنەن الىسىراق جەرلەرگە كورەرمەندەر تەگىن كىرە الادى.

33. اشىلۋ سالتاناتىن جاقىن ماڭنان تاماشالاۋ ءۇشىن 2,7 مىڭ ەۋرو كولەمىندە قاراجات تولەۋ كەرەك.

34. وليمپيادالىق اۋىلدا 8876 اعاش وتىرعىزىلدى.

35. فرانسياداعى وليمپياداعا قاتىستى ءىس-شارالاردى جىبەرىپ الماۋ ءۇشىن «ويىن كارتاسى» ىسكە قوسىلادى. اتالعان كارتا 2024 -جىلعى جازعى ويىنداردىڭ رەسمي سايتىندا قولجەتىمدى بولماق.

36. وليمپيادا كەزىندە قوناقجايلىلىق پاكەتى اياسىندا Clubhouse24 باعدارلاماسى ىسكە قوسىلادى. تۋريستەردى سپورتتىق جانە مادەني ءىس-شارالار، ۇلكەن ەكرانداردان جارىستاردىڭ تىكەلەي ترانسلياتسياسى، سپورتشىلارمەن تىلدەسۋ ساتتەرى كۇتىپ تۇر.

37. 2024 -جىلعى وليمپيادا ويىندارىندا 200 Clubhouse24 الاڭقايى جۇمىس ىستەيدى.

38. وليمپيادا كەزىندە 3000 تەرراسانىڭ جۇمىس ۋاقىتى ۇلعايتىلادى. بۇلاردى ءتۇن ورتاسىنا دەيىن پايدالانۋعا بولادى.

39. افينادا وليمپيادا الاۋىن جاعۋ راسىمىنە جاڭا ءدىني قىزمەتكەر تاڭدالدى. بۇل ءرولدى اكتريسا مەري مينا اتقارادى.

40. وليمپيادا الاۋى 16-ساۋىردە جاعىلادى.

41. پاريجدەگى وليمپيادا الاۋىنىڭ قازانى تيۋيلري ساياباعىندا ورناتىلادى.

42. وليمپيادا ويىندارىنىڭ اشىلۋى كۇنى پاريجدەگى اۋە كەڭىستىگى جابىلادى.

43. وليمپيادانىڭ وتۋىنە بايلانىستى پاريجدەگى كەيبىر كوپىرلەر جۇمىس ىستەمەيدى.

44. ايگىلى «رولان گارروس» ستاديونى تەننيستەن وليمپيادالىق جارىستاردى قابىلدايدى.

45. وليمپيادالىق اۋىلدا 2500-گە جۋىق ۇيلەر سالىندى.

46. ويىن كەزىندە اتالعان اۋىل 14500 اتلەتتى سىيدىرا الادى.

47. سپورتشىلار ءۇشىن وليمپيادالىق اۋىل ايماعىندا اۋقىمدى ساياباق قولجەتىمدى بولماق. ساياباقتىڭ اۋماعى ءۇش گەكتاردان اسادى.

48. بيلىك وكىلدەرىنە قاۋىپسىزدىكتى ساقتاۋ ءۇشىن جاساندى ينتەللەكت كومەكتەسەدى.

49. وليمپيادا ويىندارى باستالعانعا دەيىن ءبىرشاما ۋاقىت جاعالاۋدا تەك قانا ارنايى QR-كود ارقىلى جۇرۋگە بولادى.

50. وليمپيادا ويىندارىنىڭ اشىلۋى كۇنى پاريج ۋاقىتىمەن 13:00-دە بارلىق قوزعالىس قاتاڭ باقىلاۋعا الىنىپ، كەيىن توقتاتىلادى.

51. پاريج وليمپياداسىن ءبىر ميلليارد كورەرمەن تاماشالايدى دەپ كۇتىلۋدە.

52. 2024 -جىلعى وليمپيادا ويىندارىنىڭ قۇرمەتىنە نارعىزگۇلدىڭ ارنايى سورتى ەنگىزىلدى. گۇلدەر فرانسۋز باقتارىنىڭ باسىم بولىگىنە وتىرعىزىلادى.

53. جارىسقا بيلەتتى ادام قولىنان ساتىپ الۋعا بولمايدى. رەسمي تۇردە سپورتتىق جارىسقا كىرۋ ءۇشىن ارنايى سايتتاردى قولداناسىز.

54. ساراپشىلار 2024 -جىلعى وليمپيادا ويىندارىنىڭ جالپى ەسەبىندە ا ق ش توپ جارادى دەپ بولجاۋدا. ەكىنشى ورىندا - قىتاي، ءۇشىنشى ورىندا - فرانسيا.

55. قازاقستان ساپىنان پاريج وليمپياداسىنىڭ العاشقى ليتسەنزياسىن نىسانا كوزدەۋدەن قازاقستان قۇراماسىنىڭ مۇشەسى يسلام ساتپايەۆ جەڭىپ الدى.

56. ويىندى ۇيىمداستىرۋ ىسىنە 44 مىڭ ەرىكتى تارتىلعان.

57. بار الەمنەن 26 مىڭ جۋرناليست اككرەديتاتسيا العان.

58. كورەرمەندەر ءۇشىن 13,4 ميلليون بيلەت قولجەتىمدى.

59. فۋتبول مەن رەگبي ماتچتارى وليمپيادانىڭ اشىلۋ سالتاناتىنا بىرنەشە كۇن قالعاندا باستالادى.

60. جاز ايلارىندا مەترودا ءجۇرۋ باعاسى وزگەرىپ، ەكى ەسەگە دەيىن كوتەرىلەدى.

61. وليمپيادا ويىندارىندا ەكولوگياعا باستى نازار اۋدارىلعان.

62. وليمپياداعا ارنالعان قۇرىلىس نىساندارىنىڭ 95 پايىزى ۋاقىتشا نەمەسە دايىن نىساندار بازاسىندا سالىنعان. بۇل قورشاعان ورتانىڭ تازالىعىن ساقتاۋ ماقساتىندا جاسالۋدا.

63. الداعى وليمپيادانىڭ باستى يدەيالارىنىڭ ءبىرى - سپورتقا مەيىلىنشە كوپ ادام تارتۋ. وسى ماقساتتا Clubhouse24 اياسىندا جانكۇيەرلەر مەن تۋريستەرگە ارنالعان جاتتىعۋلار، سونداي-اق، سپورتشىلارمەن تىلدەسۋ مۇمكىندىگى قولجەتىمدى بولادى.

64. وليمپيادالىق اۋىل 2021 -جىلدان بەرى سوعىلدى.

65. وليمپيادالىق اۋىلدى 2024 -جىلعى ويىنداردىڭ باستالۋىنا بەس اي قالعاندا اشتى.

66. سپورتشىلار وليمپيادالىق اۋىل ىشىندە ۆەلوسيپەدتەرمەن جانە تاۋلىك بويى جۇمىس ىستەيتىن ارنايى شاتتلدار ارقىلى جۇرە الادى.

67. ايتپاقشى، وليمپيادالىق اۋىلدى فرانسيا پرەزيدەنتى ەممانۋەل ماكروننىڭ ءوزى اشتى.

68. وليمپيادالىق اۋىلداعى اسحانادا كۇنىنە 40 مىڭ تاعام ازىرلەيدى.

69. پاريج مەترولارىنداعى مۋزىكانتتار وليمپيادا كەزىندە جۇمىسىن اتقارۋعا رۇقسات بەرەتىن بەيدج الۋ ءۇشىن ارنايى تىڭدالىمنان ءوتتى.

70. پاريجدە 6100 كوشە بار. ونىڭ ەڭ كىشكەنتايى 5 مەتردەن ءسال اسادى.

71. اشىلۋ جانە جابىلۋ سالتاناتىنىڭ كوركەمدىك جەتەكشىسى - توماس دجوللي.

72. ويىننىڭ اشىلۋ سالتاناتى سەنا وزەنىندە وتسە، جابىلۋ سالتاناتى «ستاد دە فرانس» ستاديونىندا جوسپارلانعان.

73. دجوللي 2022 -جىلى ايگىلى «ستارمانيا» ميۋزيكلىن، 2023 -جىلى «رومەو مەن دجۋلەتتانى» قويدى.

74. جارىس ناتيجەلەرى مەن باسقا دا ءىس- شارالاردان حاباردار بولۋ ءۇشىن Paris2024 ارنايى قوسىمشاسى جۇمىس ىستەيدى. قوسىمشانى حوك پەن وليمپيادا ويىندارىنىڭ رەسمي سايتتارىنان كوشىرىپ الۋعا بولادى.

75. گاندبول مەن ساداق اتۋدان جارىستار وليمپيادا اشىلۋىنا بىرنەشە كۇن قالعاندا باستالادى.

76. العاشقى جۇلدەلەر 27-شىلدەدە ساراپقا سالىنادى.

77. وليمپيادانىڭ سوڭعى جارىس كۇنىندە توعىز سپورت ءتۇرىنىڭ وكىلدەرى جۇلدەگە تالاسادى.

78. سپورتشىلار 329 جۇلدە جيىنتىعىن ساراپقا سالادى.

79. بوكس باسەكەلەرى دە تەننيس سەكىلدى «رولان گارروستا» وتەدى.

80. ات سپورتى مەن قازىرگى بەسسايىس وكىلدەرى ايگىلى ۆەرسال سارايىنداعى باقتا سىنعا تۇسەدى.

81. وليمپيادا قارساڭىنداعى سوڭعى ليتسەنزيالىق تۋرنيرلەر 23 ماۋسىمدا وتەدى.

82. مارافون پاريجدەگى كوپتەگەن تانىمال جەرلەردە وتەدى. باعىتتى تاڭداۋ بارىسىندا ۇيىمداستىرۋشىلار ۆەرسالداعى ايەلدەر مارشىنان شابىت العان.

83. ءبىر قىزىعى، ويىننىڭ جابىلۋىنا ءبىر كۇن قالعاندا ەرلەر اراسىنداعى مارافون وتەدى. ايەلدەر جەڭىل اتلەتيكادان جارىس باعدارلاماسىن اياقتايدى.

84. وليمپيادا كەزىندە بيلىك وكىلدەرى كوشەدەگى كىتاپ سورەلەرىن الىپ تاستاۋدى جوسپارلاعان. الايدا، كەيىن بۋكينيستەردىڭ كىتاپ ساتۋىنا رۇقسات بەردى.

85. قوناق ءۇي نومەرلەرىنىڭ باعاسى ءۇش ەسەگە ءوستى.

86. پاريجدە داڭقتى بوكسشى مەنني پاكياو سىنعا ءتۇسۋى مۇمكىن ەدى. الايدا، ونىڭ جاسى ساي كەلمەيتىندىكتەن، حوك كەلىسىم بەرگەن جوق.

87. پاريج ءمەرى انن يدالگو وليمپيادا اشىلۋىنىڭ الدىندا سەنا وزەنىندە شومىلۋعا ۋادە بەردى. ەل استاناسىنداعى باستى وزەندە شومىلۋعا سۋ ساپاسىنىڭ ناشارلىعىنا بايلانىستى 100 جىلداي ۋاقىت بۇرىن تىيىم سالىنعان. قازىرگى تاڭدا وزەن سۋى تازالانىپ جاتىر، سەبەبى، وليمپيادا كەزىندە ترياتلونداعى سۋدا ءجۇزۋ كەزەڭى تاپ وسى سەنادا وتەدى.

88. كەيبىر دەرەككوزدەر مەن ينسايدتارعا سەنسەك، جۇزۋگە فرانسيا پرەزيدەنتىنىڭ ءوزى دە قاتىسۋدى جوسپارلاپ وتىر.

89. تۋريستەرگە جەرگىلىكتى مادەنيەتپەن تانىسۋعا كومەكتەسەتىن كوپتەگەن ءىس- شارالار ۇيىمداستىرىلادى.

90. مۇراجايلاردا وليمپيادا ويىندارىنا ارنالعان ارنايى كورمەلەر جۇمىسىن باستايدى.

91. 2024 -جىلعى وليمپيادا ويىندارىنىڭ جارىستارى پاريجدەگى كوپتەگەن تانىمال ورىنداردا وتكىزىلەدى. ماسەلەن، مارسوۆو القابى، ۇلكەن ساراي، مۇگەدەكتەر ءۇيى، كەلىسىم الاڭى، ۆەرسال سارايى، «رولان گارروس».

92. «2024 -جىلعى ويىن اۋماعى» باعدارلاماسىنا 1130 ەلشىلىك قاتىسادى. جوبا شەتەلدە تۇراتىن فرانسۋز ازاماتتارىنىڭ باسىن بىرىكتىرىپ، ءار ادامعا وليمپيادا رۋحىن سەزىندىرۋگە ارنالعان.

93. وليمپيادا ويىندارىنىڭ اشىلۋ سالتاناتى 26-شىلدەدە وتەدى.

94. وليمپيادانىڭ جابىلۋ سالتاناتى 11-تامىزدا وتەدى.

95. پاريجدەگى ويىندار 33-جازعى وليمپيادا سانالادى.

96. جابىلۋ سالتاناتىندا ەستافەتانى ا ق ش-قا جولدايدى. 2028 -جىلعى جازعى وليمپيادا لوس- اندجەلەستە وتەدى.

97. فرانسيا سوڭعى 100 -جىلدا وليمپيادانى العاش وتكىزەتىنىن ايتتىق. پەر-دە-كۋبەرتەن وليمپيادا ويىندارىن دايىنداعان ساتتەن باستاپ تا سونشا ۋاقىت ءوتتى.

98. پاريجدە وليمپيادا ويىندارىنىڭ رەسمي دۇكەندەرى جۇمىسىن باستادى. تۋريستەر ءتۇرلى كادەسىيلار، كيىمدەر جانە ويىننان ەستەلىك بولاتىن باسقا دا اكسەسسۋارلار ساتىپ الا الادى.

99. وليمپيادا مەدالى مەن قۇتىلاردى تاسىمالداۋعا ارنالعان كەيستەردى Louis Vuitton ءسان ءۇيى دايىنداعان.

100. قاۋىپتى ادامداردىڭ سپورت نىساندارىنا كىرۋىنە جول بەرمەۋ ءۇشىن مامىر ايىنان باستاپ جۇرگىزۋشىلەر مەن جاياۋ جۇرگىنشىلەرگە ارنالعان ارنايى پلاتفورما جۇمىس ىستەيدى. رۇقسات ەتىلمەگەن ادامداردىڭ «قاۋىپسىزدىك پەريمەترىندەگى» ارەنالار مەن كوپىرلەرگە كىرۋىنە تىيىم سالىنادى.

ەستەرىڭىزگە سالا كەتەيىك، وسىعان دەيىن «استانا» ترياتلون ساياباعىندا «وليمپيادا ويىندارىنا 100 كۇن» اتتى 5 شاقىرىم قاشىقتىقتا قالا تۇرعىندارى اراسىندا بۇقارالىق جۇگىرۋ شاراسى وتەتىنى تۋرالى جازعان بولاتىنبىز.

اۆتور

كۇنسۇلتان وتارباي