پاريج وليمپياداسىنىڭ الاۋى تۇتاندى
استانا. KAZINFORM - فرانسيا استاناسى - پاريجدە رەسمي تۇردە XXXIII جازعى وليمپيا ويىندارى باستالدى. ءتورت جىلدىقتىڭ باستى دوداسىنىڭ رەسمي اشىلۋ سالتاناتىنداعى «مەملەكەتتەر شەرۋى» كەزىندە قازاقستاننىڭ كوك بايراعىن بوكسشى اسلانبەك شىمبەرگەنوۆ پەن جەڭىلاتلەت ولگا سافرونوۆا ۇستاپ شىقتى.
بۇل تۋرالى تۋريزم جانە سپورت مينيسترلىگى مالىمدەدى.
بيىلعى وليمپيادانىڭ اشىلۋ سالتاناتى تاريحتا العاش رەت ەرەكشە فورماتتا ۇيىمداستىرىلدى. ياعني سپورتشىلار شەرۋى ادەتتەگىدەي ستاديوندا ەمەس، ايگىلى سەنا وزەنىندە ءوتتى. ءار دەلەگاتسيا شەرۋگە جەكە قايىقپەن شىقتى. شەرۋدە سپورتشىلار 6 شاقىرىمدىق قاشىقتىقتى باسىپ ءوتىپ، رەسمي ءراسىم وتكەن تروكادەرودا ايالدادى.
ءىس-شارانىڭ كوركەمدىك جەتەكشىسى - تەاتر رەجيسسەرى توماس جوللي. رەسمي ءىس-شاراعا قازاقستان رەسپۋبليكاسى تۋريزم جانە سپورت ءمينيسترى ەرمەك مارجىقپايەۆ قاتىسىپ، وليمپيادادا ەل نامىسىن قورعايتىن سپورتشىلارعا تولاعاي تابىس تىلەدى.
«سپورتشىلار مەن جانكۇيەرلەر قاۋىمى تاعاتسىزدانا كۇتكەن پاريج وليمپياداسى دا باستالدى. الداعى ەكى اپتا بويى تورتكۇل دۇنيەنىڭ نازارى پاريجگە اۋادى. وليمپيادا - حالىقتاردى بىرىكتىرەتىن، ەلدى ءبىر ارناعا ۇيىستىراتىن بىرەگەي سپورتتىق مەرەكە. وليمپياداعا الەمنىڭ تۇكپىر-تۇكپىرىنەن ناعىز مىقتى سپورتشىلار جينالدى. ءبارىنىڭ ارمانى - وليمپيادا چەمپيونى اتانۋ. وسى كۇنگە دەيىن توككەن ماڭداي تەرىنىڭ، ەتكەن ەڭبەگىنىڭ اقتالعانىن كىم قالامايدى دەيسىز؟! سوندىقتان سايىسقا شىعاتىن ساڭلاقتارىمىزعا تەك ساتتىلىك، تولاعاي تابىس تىلەيمىن. اتلەتتەرىمىز پاريجگە جاقسى دايىندىقپەن كەلدى. بارلىعىنان جۇلدە كۇتۋگە بولادى. ءبىز بىرىگىپ، توكيو وليمپياداسىنداعى ناتيجەنى جاقسارتۋعا بارلىق كۇش- جىگەرىمىزدى سالۋىمىز قاجەت. العا، قازاقستان»، - دەدى ەرمەك مارجىقپايەۆ.
ەسكە سالساق، پاريجدەگى ءتورت جىلدىقتىڭ باستى سپورتتىق وقيعاسى بيىل 26-شىلدە مەن 11-تامىز ارالىعىندا وتەدى. فرانسيا جەرىندەگى دوداعا الەمنىڭ 206 ەلىنەن 10500 سپورتشى قاتىسادى. پاريجدەگى باسەكەدە 32 سپورت تۇرىنەن 329 مەدال جيىنتىعى ساراپقا سالىنادى. قازاقستان ۇلتتىق قۇراماسى ساپىنان 79 سپورتشى سپورتتىڭ 25 تۇرىنەن جۇلدەگە تالاسادى.
اۆتور
ەلميرا ورالبايەۆا