پاريج وليمپياداسىندا وزگە ەلدىڭ نامىسىن قورعايتىن قازاق سپورتشىلارىن بىلەسىز بە
استانا. KAZINFORM - فرانسيا استاناسى پاريج قالاسىندا وتەتىن XXXIII جازعى وليمپيادا ويىندارىنىڭ باستالۋىنا ساناۋلى كۇندەر قالدى.
وسى ورايدا ءتورت جىلدا ءبىر الاۋى تۇتاناتىن بايراقتى باسەكەدە وزگە ەلدىڭ اتىنان سىنعا تۇسەتىن قازاق سپورتشىلارى تۋرالى دا جازا كەتكەندى ءجون كوردىك.
قىزىرگى قولىمىزدا بار مالىمەتتەر بويىنشا شەتەلدە تۇراتىن ءتورت قانداسىمىز پاريج وليمپياداسىندا سىنعا تۇسپەك. ونىڭ ىشىندە ەكەۋى قىتايدا تۇراتىن قانداسىمىز بولسا، ەكەۋى وزبەكستان تۋى استىندا باسەكەلەسەدى.
بيىل قىتايدا تۇراتىن قانداستارىمىزدان پاريج وليمپياداسىنا ەكى بىردەي سپورتشى جولداما جەڭىپ الدى.
ونىڭ ءبىرى داڭىقتى بوكسشى الەم چەمپيوناتىنىڭ كۇمىس جۇلدەگەرى، ازيا ويىندارىنىڭ چەمپيونى بوكسشى - توقتاربەك تاڭاتقان. ال ەكىنشىسى ەركىن كۇرەستەن ازيا چەمپيوناتىنىڭ، ازيا ويىندارىنىڭ جۇلدەگەرى - كابيران ابۋشايمان ۇلى.
توقتاربەك تاڭاتقان قىتايدىڭ قازاقتار ەڭ كوپ قونىستانعان التاي ايماعىندا 1996 -جىلى دۇنيەگە كەلگەن. بالا كۇنىنەن بوكسپەن اينالىسىپ، بۇگىنگى تاڭدا بوكستان قىتاي ۇلتتىق قۇراماسىنداعى ەڭ ۇزدىك بوكسشىلاردىڭ ءبىرى.
پاريج - توقتاربەكتىڭ قاتىسقالى وتىرعان ەكىنشى وليمپياداسى. ول وسىعان دەيىن توكيو وليمپياداسىندا دا باق سىناعان بولاتىن. ول الەم چەمپيوناتىنىڭ كۇمىس جۇلدەگەرى، قىتايدىڭ ءتورت دۇركىن چەمپيونى. قانداسىمىز 2023 -جىلى ازيا ويىندارىندا جەڭىمپاز اتانىپ، پاريج وليمپياداسىنا جولداما جەڭىپ العان بولاتىن. ەندى پاريج وليمپياداسىندا 80 كەلى سالماقتا قىتاي ەلىنىڭ نامىسىن قورعايدى.
ايتا كەتەيىك، قىتايلىق قازاق بوكسشىسى پاريج وليمپياداسىندا وتانداسىمىز نۇربەك ورالبايمەن جولى ءتۇيىسىپ قالۋى مۇمكىن ەكەنىن جازعان بولاتىنبىز.
اتالعان قوس بوكسشى 2023 -جىلى تاشكەنتتە وتكەن الەم بىرىنشىلىگىنىڭ فينالىندا جولدارى ءتۇيىسىپ، وتانداسىمىز جەڭىمپاز اتانسا، ەكىنشى رەت حاڭجوۋداعى ازيا ويىندارىندا توقتاربەك ەسە قايتارىپ، چەمپيوندىق اتاقپەن بىرگە وليمپيادا جولداماسىن جەڭىپ العان ەدى.
ەكىنشى قىتايلىق سپورتشى، ەركىن كۇرەس شەبەرى كابيران ابۋشايمان ۇلى 1998 -جىلى قىتايداعى تارباعاتاي ايماعى ءدوربلجىن اۋدانىندا دۇنيەگە كەلگەن. ول - ازيا چەمپيوناتىنىڭ، ازيا ويىندارىنىڭ جۇلدەگەرى. قانداسىمىز وليمپيادا جولداماسىن وسىعان دەيىن اتاپ وتكەنىمىزدەي، ستامبۇلدا (تۇركيا) وتكەن سوڭعى الەمدىك ليتسەنزيالىق تۋرنيردە جەڭىپ الدى.
ەندى ول پاريج وليمپياداسىنا 97 كەلى سالماق دارەجەسىندە سىنعا تۇسەدى. ول وسىعان دەيىن جازعى ازيا ويىندارىندا قولا مەدال جەڭىپ السا، ازيا چەمپيوناتىندا كۇمىس جۇلدەگە قول جەتكىزگەن.
وسى ورايدا ايتا كەتەيىك، قىتاي قۇراماسى كۇرەس تۇرلەرىنەن پاريج وليمپياداسىنا جالپى 11 جولداما جەڭىپ العان.
ءۇشىنشى سپورتشىمىز وزبەكستانعا تاريحي جولداما سىيلاعان - اقتەڭگە كەۋنىمجايەۆا.
ول 1999 -جىلى وزبەكستان قۇرامىنداعى قاراقالپاقستان رەسپۋبليكاسىنىڭ استاناسى نوكىس قالاسىندا دۇنيەگە كەلگەن. اقتەڭگە - 23 جاسقا دەيىنگى بالۋاندار اراسىندا ازيا چەمپيونى، قۇرلىق بىرىنشىلىكتەرىنىڭ جۇلدەگەرى، ازيا ويىندارىنىڭ قولا مەدال يەگەرى، وزبەكستاننىڭ ەڭبەك سىڭىرگەن سپورت شەبەرى.
ول ساۋىردە بىشكەكتە وتكەن كۇرەس تۇرلەرىنەن ازيا قۇرلىعىنىڭ ىرىكتەۋ تۋرنيرىندە 50 كەلى سالماقتا پاريج وليمپياداسىنىڭ جولداماسىن جەڭىپ الدى. وسىلايشا، وزبەكستان تاريحىندا ايەلدەر كۇرەسىنەن جولداما يەلەنگەن العاشقى سپورتشى اتاندى.
ايتا كەتەيىك، بيىل ايەلدەر كۇرەسىنەن قازاقستان ۇلتتىق قۇرماسى وليمپياداعا بىردە- ءبىر جولداما يەلەنە العان جوق.
پاريجدە باق سىنايتىن ءتورتىنشى قازاق سپورتشىسى - رۋسلان ابدۋللايەۆ. ول بوكستان وزبەكستان ۇلتتىق قۇراماسىنىڭ مۇشەسى. ابدۋللايەۆ 2002 -جىلى وزبەكستاندا تۋعان. ول 2023 الەم چەمپيونى اتانسا، 2022 -جىلى ازيا چەمپيونى، ال 2021 -جىلى وزبەكستان چەمپيونى اتانعان. ابدۋللايەۆ ناۋرىزدا يتاليادا وتكەن الەمدىك ليتسەنزيالىق تۋرنيردىڭ شيرەك فينالىندا سەربيالىق الەكسەي سەندريكتى ۇتىپ، وليمپيادا ليتسەنزياسىن ەنشىلەدى. ول پاريجدە 63,5 كەلى سالماقتا سىنعا تۇسەدى.
ايتا كەتەيىك، پاريج وليمپياداسىندا بوكستان قازاقستاننىڭ ەرلەر قۇراماسى دا، وزبەكستاننىڭ ەرلەر قۇراماسى دا تولىق قۇرامدا سىنعا تۇسەدى.
ەستەرىڭىزگە سالا كەتەيىك، قازىرگى تاڭدا ءتورتجىلدىق دوداعا جولداما جەڭىپ العان قازاقستاندىق سپورتشىلارىمىز سوڭعى وقۋ- جاتتىعۋ جيىندارىن وتكىزىپ جاتىر.
قازاقستان قۇراماسى وليمپيادا ويىندارىنا سپورتتىڭ 25 تۇرىنەن 80 جولداما جەڭىپ الدى. ناقتىراق ايتساق، بوكس، دزيۋدو، سپورتتتىق گيمناستيكا، جەڭىل اتلەتيكا، بايداركا مەن كانوەدە ەسۋ، وقپەن اتۋ، سەمسەرلەسۋ، گرەك-ريم كۇرەسى، ەركىن كۇرەس، ساداق اتۋ، ستەندتىك اتۋ، تەننيس، ۆەلوشوسسە، ءجۇزۋ، زاماناۋي بەسسايىس، تاەكۆوندو، ۆەلوترەك، باتۋت گيمناستيكاسى، بادمينتون، اكادەميالىق ەسۋ، كوركەم گيمناستيكا، ترياتلون، ۇستەل تەننيسى، قۇزعا شىعۋ جانە برەيكينگتەن وليمپيادا ويىندارىندا سىنعا تۇسەدى.
فرانسيا استاناسى پاريج قالاسىندا وتەتىن XXXIII جازعى وليمپيادا ويىندارى 26-شىلدە مەن 11-تامىز ارالىعىندا وتەدى. ويىندارعا الەمنىڭ 205 ەلىنەن 10500 سپورتشى قاتىسادى دەپ جوسپارلانعان. وندا 32 سپورت تۇرىنەن 329 مەدال جيىنتىعى ساراپقا سالىنادى.
اۆتور
كۇنسۇلتان وتارباي