پاريج وليمپياداسىندا جىنىسىنا بايلانىستى داۋعا قالعان يمان حەليف اۋەسقوي بوكستان كەتتى

استانا. قازاقپارات – پاريجدەگى وليمپيادا ويىندارىندا چەمپيون اتانعان الجيرلىك بوكسشى يمان حەليف بولاشاققا جوسپارى تۋرالى ايتتى.

En Nahar باسىلىمىنىڭ مالىمەتىنشە، ول باسپا ءسوز كونفەرەنسياسىندا كاسىپقوي بوكس الەمىن باعىندىرعىسى كەلەتىنىن تىلگە تيەك ەتكەن.

«جۋىق ارادا مەن كاسىپقوي بوكس الەمىنىڭ ەسىگىن اشامىن، سەبەبى كاسىپقوي جەكپە-جەكتەرگە قاتىسۋ تۋرالى كوپتەگەن ءوتىنىش ءتۇسىپ جاتىر»، - دەدى حەليف.

ونىڭ سوزىنشە، ول ازىرگە كاسىپقوي بوكستاعى كارەراسىن قاي جاقتا باستايتىنى تۋرالى شەشىم قابىلداماعان.

«وليمپيادا نەمەسە الەم چەمپيونى اتانۋ كاسىبي سپورتتا وتە ماڭىزدى ءرول اتقارادى. ءبىز، الجيرلىكتەر، كاسىپقوي سالادا قاي ورىندا ەكەنىمىزدى كورگىمىز كەلەدى»، - دەپ قوستى حەليف.

ايتا كەتەيىك، 25 جاستاعى الجيرلىك بويجەتكەن وليمپيادا فينالىندا قىتايلىق يان ليۋمەن كەزدەسىپ، ايقىن باسىمدىقپەن جەڭدى. ويىنداردىڭ 1/8 فينالىنان باستاپ يمان سىرت كەلبەتىنە بايلانىستى سىنعا ۇشىرادى. ءتىپتى يتاليالىق اندجەلا كاريني كەزدەسۋدىڭ 48-مينۋتىندا جەكپە-جەكتى جالعاستىرۋدان باس تارتىپ، ونى ەر ادامعا تەڭەدى. كەيىننەن ايىپتاۋلار جان-جاقتان تۇسە باستادى. ال الجيرلىك بوكسشىنىڭ اكەسى ونىڭ قىز ەكەنىن دالەلدەۋ ءۇشىن ءتىپتى بالا كەزىندەگى سۋرەتتەرىن جاريالادى.

حەليف بىلتىر تەستوستەرون تەستىلەۋىنەن وتە الماي، الەم چەمپيوناتىندا قاتىستىرىلماعان.