پاريج وليمپياداسىندا جۇلدەسىز قالعان وتانداسىمىز قىتايعا جاتتىعۋعا باردى

استانا. KAZINFORM - ەركىن كۇرەستەن پاريج وليمپياداسىنا قاتىسۋشى الىشەر ەرعالي قىتايعا باردى. بەلگىلى بالۋان بۇل ساپارىندا سول ەلدەگى ەتنيكالىق قازاق بالۋانى ءابۋسايمان حابيلامەن جاتتىعۋدى كوزدەپ وتىر.

اتالعان ساپار اياسىندا وتانداسىمىزدى قىتايدا قازاق بالۋاندارى كۇتىپ الىپ، مەيماندوستىق كورسەتكەن. بۇل تۋرالى الىشەر الەۋمەتتىك جەلىدە ابۋسايمانمەن بىرگە تۇسكەن سۋرەتىن جاريالادى.

«قىتايدا وتە تانىمال بالۋان ءابۋسايمان حابيلا. ولار مۇندا قازاقتار اشقان مەيرامحاناعا الىپ كەلدى. باۋىرساق وتە ءدامدى ەكەن»، - دەپ جازدى سپورتشى.

پاريج وليمپياداسىنان بۇرىن الىشەر ەرعالي ءوزىنىڭ قىتايلىق قارسىلاسى تۋرالى ايتىپ، ءوزارا بايلانىسى تۋرالى پىكىر بىلدىرگەن ەدى.

«قىتاي اتىنان كۇرەسەتىن قانداسىمىز ءابۋسايماندى 2018-جىلدان بەرى تانيمىن. العاش رەت ءبىز دەليدە وتكەن ازيا چەمپيوناتىندا كۇرەسكەن بولاتىنبىز. ەكەۋىمىز قولا جۇلدە ءۇشىن كۇرەسىپ، مەن باسىم ءتۇستىم. ومىردە حابارلاسىپ، ارالاسىپ تۇرامىز. جارىستاردا دا ءجيى جولىعامىز. تارازدا وتكەن د. قونايەۆ تۋرنيرىنە قاتىسۋعا كەلگەنىندە باپكەرىمەن بىرگە ارنايى سويلەستىك. «2025-جىلى قىتايدا وتەتىن سپارتاكيادانىڭ دايىندىعىنا كەلىپ كومەكتەسسەڭ» دەپ ءوتىنىش ايتتى. ءبىز بىردەن ول ۇسىنىسقا كەلىسىم بەردىك. «باۋىرىمىزعا بارىپ كومەكتەسەيىك» دەپ باپكەرىم دە مۇددەلى بولدى. ول جىگىتتىڭ باپكەرى دە قازاق. جاقسى جىگىتتەر»، - دەگەن بولاتىن الىشەر ەرعالي.

ايتا كەتەتىن جايت، قوس بالۋان پاريج وليمپياداسىندا 97 كەلىدە كۇرەسىپ، جۇلدەسىز قالدى. ءابۋسايمان العاشقى بەلدەسۋىندە ريو وليمپياداسىنىڭ چەمپيونى، امەريكالىق كايل سنايدەرگە العاشقى اينالىمدا ەسە جىبەرسە، الىشەر ەرعالي ءبىرىنشى بەلدەسۋىندە جەڭىسكە جەتتى. ال ەكىنشى اينالىمدا ول بولاشاق وليمپيادا چەمپيونى احمەد تاجۋدينوۆكە جول بەردى. ال جۇبانىش بەلدەسۋىندە ول پارسى سپورتشىمەن كىلەمگە شىعىپ، جەڭىستى ۋىسىنان شىعارىپ الدى.

1bol.kz