پاريج وليمپياداسىنان تىكەلەي 21 جۋرناليست حابار تاراتادى - دياس احمەتشارىپ

استانا. KAZINFORM — فرانسيا استاناسى پاريج قالاسىندا وتەتىن XXXIII جازعى وليمپيادا ويىندارىنان 21 قازاقستاندىق جۋرناليست تىكەلەي حابار تاراتادى.

بۇل تۋرالى kazinform تىلشىسىنە ەكسكليۋزيۆ سۇحبات بەرگەن ق ر تۋريزم جانە سپورت ءمينيسترىنىڭ قوعاممەن بايلانىس جانە ب ا ق جونىندەگى كەڭەسشىسى دياس احمەتشارىپ ايتىپ بەردى.

«بيىلعى، وليمپيادا ويىندارىندا پاريج قالاسىنان تىكەلەي 21 جۋرناليست حابار تاراتاتىن بولادى. ونىڭ ىشىندە سەگىز جۋرناليست رەسمي تۇردە ن و ح تاراپىنان اكرەديتاتسيا الدى. وسىلايشا قازاقستان ۇلتتىق وليمپيادالىق كوميتەتى پاريج وليمپياداسىنا ارنايى 8 جۋرناليست اپارادى. سونىمەن قاتار وليمپيادا ويىندارىن قازاقستاندا زاڭدى كورسەتۋ قۇقىعىن يەلەنگەن بەس وتاندىق تەلەارنادان تاعى 11 جۋرناليست اتتانادى. قازاقستاننان جالپى پاريج وليمپياداسىننان تىكەلەي حابار تاراتۋعا 19 جۋرناليست بارادى. سونداي-اق، بۇل تىزىمگە فرانسيا مەن گەرمانيا ەلىندە تۇراتىن «حابار-24» تەلەارناسىنىڭ ەكى مەنشىكتى ءتىلشىسى قوسىلۋى كەرەك. ءبىر-ەكى كۇندە بۇل سۇراقتاردا شەشىمىن تابادى دەگەن سەنىمدەمىز. وسىلايشا پاريج وليمپياداسىنان جالپى 21 جۋرناليست حابار تاراتادى»، - دەدى دەدى ءمينيستردىڭ كەڭەسشىسى.

ەستەرىڭىزگە سالا كەتەيىك، وسىعان دەيىن ەلىمىزدە العاش رەت وليمپيادا ويىندارىن بەس بىردەي تەلەارنا تىكەلەي ەفيردە كورسەتەتىنى تۋرالى جازعان بولاتىنبىز.

ولار - Qazaqstan ،Qazsport، «حابار»، «ەل ارنا» جانە Jibek Joly تەلەارنالارى.

ايتا كەتەيىك، قازاقستان قۇراماسى وليمپيادا ويىندارىنا سپورتتىڭ 25 تۇرىنەن 92 جولداما جەڭىپ الدى.

فرانسيا استاناسى پاريج قالاسىندا وتەتىن XXXIII جازعى وليمپيادا ويىندارى 26-شىلدە مەن 11-تامىز ارالىعىنا بەلگىلەنگەن.

ويىنعا الەمنىڭ 205 ەلىنەن 10500 سپورتشى قاتىسادى.

وندا 32 سپورت تۇرىنەن 329 مەدال جيىنتىعى ساراپقا سالىنادى.

اۆتور كۇنسۇلتان وتارباي