پاريج وليمپياداسى: ناريمان كۋربانوۆ ەل قورجىنىنا 42 جولدامانى سىيلادى

استانا. KAZINFORM - بۇگىن كاتار استاناسى دوحادا ءوتىپ جاتقان سپورتتىق گيمناستيكادان الەم كۋبوگىنىڭ شەشۋشى كەزەڭىندە قازاقستاندىق ناريمان كۋربانوۆ پاريج وليمپياداسىنىڭ ليتسەنزياسىنا قول جەتكىزدى.

سپورتتى دامىتۋ ديرەكسياسىنىڭ باسپا ءسوز قىزمەتى ءمالىم ەتكەندەي، ات سناريادىنداعى فينالدا ناريمان 4-ساتىعا تۇراقتاپ، ال نەگىزگى قارسىلاسى لي چي كاي (قىتايدىڭ تايپەيى) كۇمىس جۇلدە الدى. وسىلايشا، جالپى الەم كۋبوگىنىڭ رەيتينگىندە قازاقستاندىق گيمناست 3-ساتىدا قالادى.

وسىلايشا، سپورتتىق گيمناستيكادان ۇلتتىق قۇراما ساپىنان جازعى ويىندار جولداماسىن ميلاد كاريمي مەن ناريمان كۋربانوۆ الىپ ۇلگەردى.

قازىر بارلىعى قازاقستاندا 14 سپورت تۇرىنەن 42 ليتسەنزيا بار.

ەستەرىڭىزگە سالا كەتسەك، بۇگىن جاپونيا استاناسى توكيودا ءوتىپ جاتقان كانوە مەن بايداركادا ەسكەك ەسۋدەن ازيا چەمپيوناتىندا قازاقستان قۇراماسى پاريج وليمپياداسىنا 6 ليتسەنزيا جەڭىپ الدى.

ودان بولەك بۇگىن قىرعىزستان استاناسى بىشكەك قالاسىندا كۇرەس تۇرلەرىنەن ءوتىپ جاتقان ليتسەنزيالىق تۋرنيردە قازاقستاندىق بالۋان الىشەر ەرعالي مەن 125 كەلى سالماق دارەجەسىندە سىنعا ءتۇسىپ جۇرگەن يۋسۋپ باتىرمۇرزايەۆ پاريج وليمپياداسىنىڭ جولداماسىنا يە بولدى.

اۆتور كۇنسۇلتان وتارباي