پاريج وليمپياداسى: «جىبەك جولى» كورەرمەندەرىن نە كۇتىپ تۇر
استانا. KAZINFORM - پاريج وليمپياداسىنىڭ سالتاناتتى تۇردە اشىلۋىنا ساناۋلى كۇن قالدى. Jibek Joly تەلەارناسى وسى شارانى جانە ويىنداردىڭ ءبىرقاتارىن تىكەلەي ەفيردە كورسەتەدى. قازىر تەلەارنادا ترانسلياتسياعا دايىندىق جۇمىستارى پىسىقتالىپ جاتىر.
«ءبىزدىڭ تەلەارنا ءۇشىن پاريج وليمپياداسىن تىكەلەي كورسەتىلىمدە تاراتۋ - تاريحي وقيعا. حالىقارالىق وليمپيادا كوميتەتىنە سپورتتىق ويىنداردى تاراتاتىن تەلەارنا رەتىندە رەسمي تىركەۋ جونىندە ءوتىنىم جولدادىق. ەكى اپتانىڭ ىشىندە تىركەدى. كەلىسىمگە سايكەس وليمپيادا ويىندارىن تىكەلەي كورسەتىلىم ارقىلى كوپشىلىككە تاراتا الامىز. Jibek Joly تەلەارناسىنىڭ كورەرمەندەرى ءار جۇما، سەنبى جانە جەكسەنبى كۇنى (ساعات 22:00-گە دەيىن) تەلەديداردان بولەك، ەلورداداعى Abu Dhabi Plaza ويىن-ساۋىق جانە ساۋدا ورتالىعى اۋماعىندا LED ەكران ارقىلى كورە الادى»، - دەيدى Jibek Joly تەلەارناسىنىڭ كرەاتيۆتى پروديۋسەرى دينارا اباكايەۆا.
ودان بولەك، Jibek Joly تەلەارناسى ەلوردا اكىمدىگىنىڭ قولداۋىمەن پاريج وليمپياداسىنىڭ اشىلۋ سالتاناتىن ورتالىق ساياباقتا تىكەلەي ەفيردە كوپشىلىكتىڭ نازارىنا ۇسىنباق. سالتاناتتى شارا اياسىندا كونسەرت تە وتەدى.
وليمپيادانىڭ اشىلۋ سالتاناتىنان تىكەلەي كورسەتۋ كەزىندە سيدنەي وليمپياداسىنىڭ كۇمىس جۇلدەگەرى يسلام بايرامۋكوۆ تەلەارنا ستۋدياسىنىڭ قۇرمەتتى قوناعى بولماق.
«قازاقستاندىق سپورتشىلار قاتىساتىن جارىستاردان بولەك، توپ ويىنداردىڭ فينالىن كورەرمەندەرگە ۇسىنامىز. تەلەارنانىڭ شامامەن p ەفيرى پاريج وليمپياداسى ويىندارىنا ارنالادى»، - دەيدى كرەاتيۆتى پروديۋسەر.
ال سپورت ويىندارى بارىسىندا تەلەارنانىڭ 9 كوممەنتاتورى كەزەكپەن ەكى تىلدە (قازاقشا، ورىسشا) قىزمەت كورسەتەدى.
«تىكەلەي كورسەتىلىمگە دايىنبىز، تەحنيكا قازىردىڭ وزىندە تەستىلەۋ رەجيمىندە تاۋلىك بويى جۇمىس ىستەپ تۇر. تىكەلەي بايلانىس بەلگىسىن پاريج بەن لوندوننان، سونىمەن قوسا استاناداعى قازمەديا ورتالىعى ارقىلى الامىز. تەحنيكالىق تۇرعىدان دايىندىققا ءبىر اي ۋاقىت كەتتى، كۇن سايىن 3-4 مامان اۋىسىممەن جۇمىس ىستەيدى. سپورت جارىستارىنىڭ تىكەلەي ەفيرىنىڭ كەستەسى بەرىلدى»، - دەيدى Jibek Joly تەلەارناسىنىڭ تەحنيكالىق قامتاماسىز ەتۋ جونىندەگى اۋىسىم جەتەكشىسى سايان ماكيموۆ.
ايتا كەتەيىك، 26-شىلدە مەن 11-تامىز ارالىعىندا وتەتىن XXXIII وليمپيادا ويىندارىن قازاقستان اۋماعىندا كورسەتۋ قۇقىعىن وتاندىق 5 تەلەارنا يەلەندى.
قازاقستاندىقتار وليمپيادا ويىندارىن Jibek Joly تەلەارناسىنان بولەك، Qazaqstan ،Qazsport، «حابار» جانە «ەل ارنا» ەفيرىنەن كورە الادى.
اۆتور
داۋلەت ىزتىلەۋ