پاريج تورىندەگى پاراليمپيادا: ءدۇبىرلى دودا باستالدى
استانا. KAZINFORM - فرانسيا استاناسى پاريج شاھارىندا XVII پاراليمپيادا ويىندارى رەسمي تۇردە جالاۋىن جەلبىرەتتى. 28-تامىز بەن 8-قىركۇيەك ارالىعىندا 22 سپورتتان 549 مەدال جيىنتىعى ساراپقا سالىنادى. بۇل رەتتە، 167 دەلەگاتسيا قاتارىندا 4400 سپورتشى جۇلدەگە تالاسادى. ولاردىڭ قاتارىندا 44 قازاقستاندىق بار.
ءدۇبىرلى دودانىڭ شىمىلدىعى پاريجدىڭ جۇرەگى سانالاتىن ايگىلى Champs-Élysées بۋلۆارى مەن Place de la Concorde الاڭىندا اشىلدى. بۇل ورىندار فرانسيانىڭ تاريحى مەن مادەنيەتىنىڭ سيمۆولى رەتىندە اسا تانىمال. سودان بولار، پاراليمپيادا ويىندارىنا جولداما العان سپورتشىلار مەن باپكەرلەردى، مەيمانداردى قارسى الۋعا ارنايى تاڭدالعان.
پاراوليمپيادا ويىندارىنىڭ اشىلۋىنا فرانسيا پرەزيدەنتى ەممانيۋەل ماكرون جانە حالىقارالىق پاراليمپيادا كوميتەتىنىڭ پرەزيدەنتى ەندريۋ پارسونس قاتىستى.
سوڭعى 7 جىلدا پاراليمپيادانى ۇيىمداستىرۋشىلار قالالىق ورتانى ينكليۋزيۆتى ەتۋ ءۇشىن پاريجگە شامامەن 125 ميلليون ەۋرو ينۆەستيسيالاعان. قازىر كوشە قيىلىستارىندا كورۋ قابىلەتى بۇزىلعان ادامدارعا ارنالعان 10400گە جۋىق اكۋستيكالىق جۇيە ورناتىلعان.
2004 -جىلى افينىدان بەرى ءاربىر پاراليمپيادا ويىندارىندا مەدالدار سانى بويىنشا كوش باستاپ كەلە جاتقان قىتاي بيىل 282 سپورتشىسىنا سەنىم ارتىپ وتىر.
برازيليا 255 سپورتشىسىمەن ەكىنشى ورىندا تۇر. جارىستى قابىلداۋشى ەل فرانسيا 237 سپورتشىمەن قاتىسادى. ا ق ش قۇرامىندا 220، ۇلىبريتانيا ساپىندا 201 سپورتشى بار.
ەستەرىڭىزگە سالساق، بۇعان دەيىن قازاقستان ۇلتتىق قۇراماسى كىمدەرگە سەنىم ارتاتىنىن ساراپتاپ كورگەن ەدىك.