پاريجگە جەتتىك، بۇگىن وليمپيادالىق قالاشىقتا العاشقى جاتتىعۋىمىزدى باستايمىز - مىرزاعالي ايتجانوۆ

استانا. KAZINFORM - قازاق بوكسشىلارى فرانسيا استاناسى پاريج قالاسىندا ورنالاسقان وليمپيادا قالاشىعىنا امان-ەسەن جەتىپ، العاشقى دايىندىقتارىنا كىرىسىپ كەتتى. بۇل تۋرالى kazinform تىلشىسىنە ۇلتتىق قۇرامانىڭ باس باپكەرى مىرزاعالي ايتجانوۆ ايتىپ بەردى.

«پاريجگە امان-ەسەن جەتتىك. ءبىزدى اۋەجايدا قازاقستاننىڭ فرانسياداعى ەلشىلىگىنىڭ وكىلدەرى قارسى الدى. وليمپيادا قالاشىعىنىڭ اتموسفەراسى كەرەمەت كوڭىل كۇي سىيلادى. قوناق ءۇي دە جايلى، تازا، رەتتى. بۇگىننەن باستاپ، پاريجدەگى العاشقى جاتتىعۋىمىزدى باستايمىز. 25-شىلدە كۇنى جەرەبە تارتۋ ءراسىمى. جالپى، جارىسقا دايىنبىز»، - دەدى باس باپكەر.

ايتا كەتەيىك، پاريج وليمپياداسىنا بوكستان ەرلەر قۇراماسى تولىق قۇرامدا، ياعني 7 سالماقتا، ال ايەلدەر قۇراماسى 3 سالماقتا سىنعا تۇسەدى.

ەرلەردەن ساكەن بيبوسىنوۆ، ماحمۇد سابىرحان، مۇحاممەدسابىر بازارباي ۇلى، اسلانبەك شىمبەرگەنوۆ، اعايىندى نۇربەك ورالباي مەن ايبەك ورالباي جانە قامشىبەك قوڭقابايەۆ ەل نامىسىن قورعاسا، ايەلدەردەن نازىم قىزايباي، كارينا يبراگيموۆا جانە ۆالەنتينا حالزوۆا شارشى الاڭعا شىعادى.

ەستەرىڭىزگە سالا كەتەيىك، قازىرگى تاڭدا ءتورتجىلدىق دوداعا جولداما جەڭىپ العان قازاقستاندىق سپورتشىلارىمىزدىڭ العاشقى لەگى پاريجدەگى وليمپيادالىق قالاشىققا بارىپ ۇلگەردى.

قازاقستان قۇراماسى وليمپيادا ويىندارىنا سپورتتىڭ 25 تۇرىنەن 92 جولداما جەڭىپ الدى.

فرانسيا استاناسى پاريج قالاسىندا وتەتىن XXXIII جازعى وليمپيادا ويىندارى 26-شىلدە مەن 11-تامىز ارالىعىندا وتەدى.

اۆتوركۇنسۇلتان وتارباي