پاريج-2024: قۇزعا ورمەلەۋشى ءامىر مايمۇراتوۆ وليمپيادا رەكوردىن جاڭارتتى

پاريج. KAZINFORM - فرانسيا استاناسى پاريج قالاسىندا ءوتىپ جاتقان وليمپيادا ويىندارىندا بۇگىن سپورتتىق قۇزعا ورمەلەۋ باسەكەسىندە قازاقستاندىق ءامىر مايمۇراتوۆ وليمپيادا رەكوردىن جاڭارتتى.

وتانداسىمىز ىرىكتەۋدە قۇزعا 4,89 سەكۋندتا ورمەلەپ، وليمپيادا رەكوردىن جاڭارتتى. اتلەتتەر «جىلدامدىق» ديستسيپليناسى بويىنشا باق سىنادى. وسىدان سوڭ، ءارى قارايعى تۋرنير كەستەسى قۇرىلادى. قازىرگى تاڭدا العاشقى اينالىم جالعاسۋدا.

ايتا كەتەيىك، ءامىر وسى باعدارلامادا وليمپياداعا قاتىساتىن قازاقستان قۇراماسىنىڭ جالعىز سپورتشىسى. ول كەيىنگى الەم چەمپيوناتىندا 27-شى، ازيا ويىندارىندا جەتىنشى ورىنعا يە بولعان ەدى.

ەستەرىڭىزگە سالا كەتەيىك، فرانسيا استاناسى پاريج قالاسىندا ءوتىپ جاتقان XXXIII جازعى وليمپيادا ويىندارى 11-تامىزدا مارەسىنە جەتەدى. وليمپياداشىلار 32 سپورت تۇرىنەن 329 مەدال جيىنتىعىن ساراپقا سالىپ جاتىر.

قازىر قازاقستان قۇراماسىنىڭ قورجىنىندا 1 التىن، 1 كۇمىس، 2 قولا مەدال بار.

اۆتور
كۇنسۇلتان وتارباي