پاريج-2024: قىتايلىق تەننيسشى الەمنىڭ 1-راكەتكاسىن جەڭىپ، سەنساتسيا جاسادى

پاريج. KAZINFORM - قىتايلىق تەننيسشى، الەمنىڭ 7-راكەتكاسى جىڭ چينۋەن سەنساتسيا جاساپ، وليمپيادا ويىندارىنىڭ فينالىنا ءوتتى.

قىتايلىق سپورتشى جارتىلاي فينالدا الەمنىڭ ءبىرىنشى راكەتكاسى، التىن جۇلدەدەن باستى ۇمىتكەر سانالعان پولشا وكىلى يگا شۆەنتەكپەن وينادى.

ءبىر ساعات 50 مينۋتقا سوزىلعان تارتىستى ماتچتا تسينۆەن 6:2، 7:5 ەسەبىمەن جەڭىسكە جەتتى. ول 3 ەيسپەن بىرگە 13 برەيك-پوينتتىڭ التاۋىن پايدالاندى. شۆەنتەك 5 ەيس، 3 برەيكپەن (6 برەيك-پوينت) كوزگە ءتۇستى.

قىتايلىق تەننيسشى فينالدا الەمنىڭ 21-راكەتكاسى، حورۆاتيالىق دوننا ۆەكيچ نەمەسە رەيتينگىدە 67-ورىنداعى سلوۆاكيالىق اننا-كارولينا شميدلوۆانىڭ بىرەۋىمەن التىن جۇلدەنى ساراپقا سالادى.

جىڭ چينۋەن وتكەن جىلى ءوز ەلىندە وتكەن ازيا ويىندارىنىڭ چەمپيونى اتانعان بولاتىن. ىزىنشە بەيجىڭ جارىسىندا قازاقستاندىق ەلەنا رىباكينادان 1:6، 2:6 ەسەبىمەن جەڭىلىپ قالعان ەدى.

توكيو وليمپياداسىندا ءتورتىنشى ورىننان كورىنگەن ە. رىباكينا بيىل پاريج دوداسىنا دەنساۋلىعىنا بايلانىستى قاتىسۋدان باس تارتتى.

ەسكە سالا كەتەيىك، بۇدان بۇرىن ەلەنا رىباكينانىڭ كورتقا جاقىن ارادا ورالاتىنى تۋرالى ايتقانىن جازعان بولاتىنبىز.