پاريج-2024: 22 جاستاعى سپورتشى قىز جىگىتىمەن قىدىرعانى ءۇشىن وليمپيادادان قۋىلدى
استانا. قازاقپارات - سۋدا جۇزۋدەن برازيليا ۇلتتىق قۇراماسىنىڭ مۇشەسى انا كارولينا ۆيەيرا جارىستان شەتتەتىلىپ، وليمپيادادان قۋىلدى.
ول وليمپيادادا ءوزى سەكىلدى برازيليا نامىسىن قورعايتىن جىگىتى گابريەل سانتوسپەن بىرگە باپكەرلەردەن سۇرانباي، وليمپيادا قالاشىعىنان قاشىپ شىعىپ، تۇنگى پاريجدى ارالاپ، جەلىگە سۋرەت جۇكتەگەن.
22 جاستاعى سپورتشى ەرتەسى قۇرمامامەن بىرگە 4x100 مەترگە ەركىن ستيلدە ءجۇزۋ سايىسىنىڭ ىرىكتەۋ كەزەڭىنە قاتىسقان. ناتيجەسىندە كوماندا 12-ورىنعا تابان تىرەگەن.
باستاپقىدا قۇراما باسشىلارى سپورتشى قىزعا تەك ەسكەرتۋ بەرگەن. ويتكەنى ول 4x100 مەترگە جۇزۋدەن ارالاس ەستافەتاعا قاتىسۋعا ءتيىس-تىن. الايدا سپورتشى ەسكەرتۋدى قابىلداماي، قارسىلىق كورسەتكەن. اقىرىندا كوماندا باپكەرلەرى سپورتشى مەن جىگىتىن جارىستان شەتتەتىپ، برازيلياعا قايتارۋ تۋرالى شەشىم شىعارعان.