قۇجات تاسىمالداۋشىلارعا ارنايى رۇقسات بەرۋ جۇيەسىن ەنگىزۋدى جانە ءبىرقاتار جول الىمدارىنان بوساتۋدى كوزدەيدى. تاراپتار بۇل كەلىسىمگە بەيجىڭدە وتكەن ترانسكاسپي حالىقارالىق كولىك باعىتىن دامىتۋ جونىندەگى كەزدەسۋ بارىسىندا قول جەتكىزدى.
ارمەنيانىڭ اۋماقتىق باسقارۋ جانە ينفراقۇرىلىم ءمينيسترىنىڭ ورىنباسارى كريستينا گالەچياننىڭ ايتۋىنشا، رۇقساتتار ەكى سانات بويىنشا بەرىلەدى. ءبىرىنشىسى - كادىمگى جۇكتەرگە، ەكىنشىسى - ارنايى جۇكتەرگە ارنالعان. بۇل تاسىمالداۋشىلارعا حالىقارالىق جانە ترانزيتتىك تاسىمالداردى جەڭىلدەتىلگەن تارتىپپەن جۇزەگە اسىرۋعا مۇمكىندىك بەرەدى.
- كەلىسىم حالىقارالىق جانە ترانزيتتىك تاسىمالداردى جەڭىلدەتۋگە باعىتتالعان. الايدا ونىڭ تالاپتارى ارمەنيا مەن قىتاي اۋماعىنداعى ىشكى تاسىمالدارعا قولدانىلمايدى،- دەپ ءتۇسىندىردى كريستينا گالەچيان.
تاراپتار سونداي-اق اۆتوموبيل جولدارىن پايدالانعانى ءۇشىن الىناتىن ءبىرقاتار سالىقتار مەن الىمداردان تاسىمالداۋشىلاردى ءوزارا بوساتۋعا ۋاعدالاستى. الايدا كولىك قۇرالدارىنىڭ جولدارعا كەلتىرگەن زالالىن وتەۋگە ارنالعان تولەمدەر ساقتالادى.
گالەچياننىڭ سوزىنشە، كەزدەسۋدە ترانسكاسپي حالىقارالىق كولىك باعىتى بويىنشا جۇك تاسىمالى كولەمىن ۇلعايتۋ، ينفراقۇرىلىمدى دامىتۋ، شەكارالىق جانە كەدەندىك راسىمدەردى جەڭىلدەتۋ، سونداي-اق لوگيستيكانى سيفرلاندىرۋ ماسەلەلەرى تالقىلاندى.
كەلىسىمدە ەكى ەل اراسىندا كەلىسىلگەن باعىتتار مەن بەلگىلەنگەن شەكارالىق وتكىزۋ پۋنكتتەرى ارقىلى تۇراقتى جانە تۇراقتى ەمەس حالىقارالىق اۆتوبۋس قاتىناسىن ۇيىمداستىرۋ مۇمكىندىگى دە قاراستىرىلعان.
تاسىمالداۋشىلارعا رۇقساتتاردى ارمەنيا تاراپىنان اۋماقتىق باسقارۋ جانە ينفراقۇرىلىم مينيسترلىگى، ال قىتاي تاراپىنان كولىك مينيسترلىگى بەرەدى.
ايتا كەتەيىك، بۇعان دەيىن ارمەنيانىڭ ازەربايجان جانە تۇركيامەن تەمىرجول قاتىناسىن قايتا جانداندىرۋدى جوسپارلاپ وتىرعانى حابارلانعان بولاتىن. بۇل باستاما وڭىردەگى كولىك-كوممۋنيكاتسيالىق بايلانىستاردى دامىتۋعا باعىتتالعان.