Associated Press اگەنتتىگىنىڭ مالىمەتىنشە، سيليا فلورەستىڭ ادۆوكاتتارى ونىڭ دەنساۋلىعىنا ەلەۋلى قاۋىپ ءتونىپ تۇرعانىن ايتىپ، مۇنداي دەرتتى تۇرمە جاعدايىندا ءتيىستى دەڭگەيدە ەمدەۋ مۇمكىن ەمەس ەكەنىن جەتكىزگەن.
زاڭگەرلەردىڭ سوزىنشە، وعان نيۋ-يوركتەگى ۇيدە تاۋلىك بويى كۇزەت قاراۋىندا تۇرۋعا رۇقسات بەرۋگە بولار ەدى.
ولار سونداي-اق 69 جاستاعى فلورەستىڭ ا ق ش اسكەري وپەراتسياسى كەزىندە «قابىرعاعا نەمەسە سۋىرماعا سوعىلعاننان» كەيىن دەنەسىندە جازىلمايتىن تىرتىقتار قالعانىن مالىمدەدى.
ادۆوكاتتارىنىڭ ايتۋىنشا، برۋكليندەگى تەرگەۋ يزولياتورىندا قاماۋدا وتىرعان كەزەڭدە مادۋرونىڭ جۇبايى 11 كەلى سالماق تاستاعان. وعان جۇرەگىنە وتا جاساۋ قاجەت بولۋى مۇمكىن ەكەنى دە ايتىلعان. سونداي-اق ولار فلورەس «ۇنەمى باسى اينالىپ، السىرەپ، تىنىسى تارىلىپ» جۇرگەنىن، شىلدەدە جۇرەك تالماسىنا ۇشىراۋى دا ىقتيمال ەكەنىن مالىمدەدى.
بەيسەنبى كۇنى ول سوتقا بارادى، وندا قورعاۋشىلارى سيليا فلورەستى ا ق ش تۇرمەسىنەن بوساتىپ، ءۇيقاماققا اۋىستىرۋدى سۇراماق.
الايدا پروكۋراتۋرا كەپىل تولەپ بوساتۋ تۋرالى وتىنىشكە قارسى شىعىپ، «قاشىپ كەتۋ قاۋپى وتە جوعارى ءارى قوعامعا قاۋىپ ءتوندىرۋى مۇمكىن» ەكەنىن العا تارتتى. سونداي-اق پروكۋرورلار ونىڭ مەديتسينالىق كومەككە مۇقتاج بولعان كەزدەرىندە تۇرمەدەن جەرگىلىكتى اۋرۋحاناعا جەتكىزىلىپ، قاجەتتى ەم العانىن ايتتى.
بۇعان دەيىن فەدەرالدى پروكۋرورلار ۆەنەسۋەلانىڭ بۇرىنعى پرەزيدەنتى نيكولاس مادۋرو مەن ونىڭ جۇبايى سيليا فلورەستى ۆەنەسۋەلا تۇرمەلەرىندە امەريكالىقتاردى ازاپتادى دەگەن كۇدىككە بايلانىستى جاڭا ايىپتار تاعۋعا نيەت بىلدىرگەنى حابارلانعان ەدى.