اگروونەركاسىپ پروبلەماسى، بىلىكتى كادرلار جەتىسپەۋشىلىگى، باياناۋىلداعى تۋريزمدى دامىتۋ

پاۆلودار. KAZINFORM - پاۆلودار - ەلىمىزدەگى ءىرى يندۋستريالىق ورتالىقتاردىڭ ءبىرى. سوڭعى جىلدار ىشىندە ءومىردىڭ كوپتەگەن سالاسىندا ىسكە اسىرۋعا باعدارلانعان جوبالار بارشىلىق. وبلىس باسشىسى اسايىن بايحانوۆپەن ايماقتاعى سۋارمالى جەرلەر مەن اگروونەركاسىپتى، مەملەكەتتىك اپپاراتتى، تۋريزم مەن ازاماتتىق قوعام سەكتورلارىن دامىتۋ تۇرعىسىندا اڭگىمە وربىتتىك.

- اسايىن قۋاندىق ۇلى، ەرتىس- بايان ءوڭىرىنىڭ تىزگىنىن ۇستاعانىڭىزعا ازدى-كوپتى 1 جىل 3 ايدان استام ۋاقىت ءوتىپتى. پاۆلودار وبلىسى وتكەن جىلدى ەكونوميكاداعى قانداي وڭ وزگەرىستەرمەن قورىتىندىلادى؟

- جىل قورىتىندىسى بويىنشا ايماق ەكونوميكاسى وڭ ديناميكالىق كورسەتكىشتەرگە قول جەتكىزدى. پاۆلودار وبلىسى وڭدەۋ سەكتورىنىڭ كولەمى بويىنشا ەلىمىزدەگى ۇزدىك تورتتىككە ەندى، جالپى قۇنى 3,1 تريلليون تەڭگەنىڭ تاۋارى ءوندىرىلدى. بۇعان قوسا وبلىس كولىك سالاسىندا بىرنەشە جىل قاتارىنان كوشباسشى اتانىپ كەلەدى. بىلتىر ەكونوميكامىزعا 965 ميلليارد تەڭگەدەن استام ينۆەستيتسيا تارتىلعان. بۇل - الدىڭعى جىلمەن سالىستىرعاندا 26 پايىزعا ارتىق.

ناقتىراق ايتقاندا، تۇراقتى ەكونوميكالىق ءوسىمدى قامتاماسىز ەتۋگە، سونداي-اق حالىقتىڭ ساپالى ءومىر ءسۇرۋ دەڭگەيىن قولداۋعا باعىتتالعان بارلىق مىندەتتەمەلەر ورىندالدى.

- سوڭعى ۋاقىتتا وڭىرىمىزدەگى ەكونوميكالىق ساياسات اۋىر ونەركاسىپتەن گورى اۋىل شارۋاشىلىعىنا قاراي ويىسىپ بارا جاتقانداي. بۇل - نەدەن تۋعان قاجەتتىلىك؟

- پرەزيدەنتىمىز قاسىم-جومارت توقايەۆ فەرمەرلەردىڭ الەۋەتىن ارتتىرۋعا، ازىق-تۇلىك قاۋىپسىزدىگىن قامتاماسىز ەتۋگە باسا ءمان بەرىپ وتىر. سوندىقتان پاۆلودار وبلىسى دا بۇل باعىتتان جاڭىلماۋى كەرەك دەپ ەسەپتەيمىن.

ءوڭىر ەكونوميكاسىنىڭ شامامەن 6 پايىزى اگروونەركاسىپتىك كەشەنگە تيەسىلى. اگروونەركاسىپتى قولداۋعا 95 ميلليارد تەڭگە باعىتتالسا، سونىڭ ىشىندە 40 ميلليارد تەڭگەسى سۋبسيديالاۋعا، وزگەسى وبلىستىڭ 1,5 مىڭ فەرمەرىنە جەڭىلدىكتى كرەديت بەرۋگە ءبولىندى. بىلتىردىڭ وزىندە بۇل سالادا 25-تەن اسا جوبا ىسكە اسىرىلىپ، ءبىر مىڭنان استام جاڭا جۇمىس ورنىن قۇرۋعا مۇمكىندىك تۋدى. ناتيجەسىندە ءوڭىردىڭ اۋىل شارۋاشىلىعى سالاسىنداعى ينۆەستيتسيالار كولەمىن 153 ميلليارد تەڭگەگە دەيىن ۇلعايتا الدىق.

ءبىراق بۇل وبلىس ەكونوميكاسىنداعى اۋىر ونەركاسىپ پەن يندۋستريالاندىرۋ قارقىنى باسەڭدەيدى دەگەن ءسوز ەمەس. جالپى سوماسى 2,1 تريلليون تەڭگەگە 127 ءىرى وڭىرلىك جوبالار پۋلى قالىپتاستىرىلىپ وتىر. بۇل جوبالار جاڭادان 10 مىڭنان استام جۇمىس ورىندارىن قۇرۋعا مۇمكىندىك بەرەدى.

- جۋىقتا ليماندى جەرلەردىڭ دامۋىنا ۇكىمەتتەن قاراجات سۇرايمىز دەدىڭىز. بۇل قانشالىقتى ماڭىزدى؟

- مەملەكەت باسشىسى سۋ رەسۋرستارىن ۇقىپتاپ پايدالانۋ ماسەلەسىنە ەرەكشە نازار اۋدارىپ وتىر. سۋارمالى جەرلەر جەلىسىن كەڭەيتۋ ماسەلەسى ءوڭىرىمىز ءۇشىن وتە ماڭىزدى ءارى وزەكتى. كليماتتىق جاعدايلاردى ەسكەرە وتىرىپ، ءبىزدىڭ مىندەتىمىز - اۋىل شارۋاشىلىعى سالاسىنىڭ تابيعي قۇبىلىستارعا تاۋەلدى بولۋىن تومەندەتۋ. بۇل ماقساتتا سۋارمالى القاپتاردى ۇلعايتۋ بويىنشا جۇمىستاردى جۇرگىزىپ وتىرمىز.

سۋ رەسۋرستارى مينيسترلىگىمەن بىرلەسىپ، پاۆلودار وبلىسىنىڭ سۋارۋ جۇيەلەرىن قالپىنا كەلتىرۋ جونىندەگى 2024-2030 -جىلدارعا ارنالعان كەشەندى جوسپاردى كەزەڭ-كەزەڭىمەن ازىرلەدىك. 6 جىل ىشىندە وبلىستاعى بارلىق ليماندى سۋارۋ جۇيەلەرىن قايتا جاڭارتۋدى جوسپارلاپ وتىرمىز. بيىل باياناۋىل اۋدانىندا اۋماعى 6,7 مىڭ گەكتار ليماندى سۋارۋ جۇيەسىن قايتا جاڭارتۋدى باستايمىز. بۇل جوبانى ىسكە اسىرساق، قار شامادان كوپ تۇسكەن جىلداردا جازعىتۇرىم تاسقىن سۋدىڭ الدىن الار ەدىك. دەمەك، اۋدانداعى 8 اۋىلدىق ەلدى مەكەندى سۋ باسۋ قاۋپىن جويۋعا مۇمكىندىك بەرەدى. ەسەسىنە ەرىگەن قار سۋىن شابىندىقتاردى سۋلاندىرۋعا باعىتتاپ، مال ازىعى ونىمدىلىگىن 4-5 ەسەگە دەيىن ارتتىرا الامىز.

سونداي-اق، ماي اۋدانىندا اۋماعى 14,6 مىڭ گەكتار بولاتىن قولىباي ليماندى سۋارۋ جۇيەسىن قايتا جاڭارتۋ جوباسى دا ازىرلەنىپ جاتىر. جوبا ىسكە اسسا، اتالعان اۋداندا 50 مىڭعا جۋىق ءىرى قارا مال قىستا ساپالى شوپپەن قامتاماسىز ەتىلەدى.

- وبلىستا ازىق-تۇلىك بەلدەۋىن قالىپتاستىرۋ باعىتىندا قانداي شارۋالار اتقارىلىپ جاتىر؟

- اۋىلدىڭ ىرزىق-بەرەكەسى قالالى جەرلەردىڭ تۇرعىندارى ءۇشىن قولجەتىمدى باعامەن ساتىلادى. «ەگىستىكتەن - سورەگە دەيىن» قاعيداسىن كەڭىرەك تاراتىپ جاتىرمىز. مىسال ءۇشىن، بىلتىر اۋدان- قالالاردا 600 دەن اسا اۋىل شارۋاشىلىعى جارمەڭكەسى ۇيىمداستىرىلىپ، وندا 3,4 ميلليارد تەڭگە سوماسىنا ازىق ونىمدەرى ساتىلعان. پاۆلودار قالاسىندا «Jailau» فەرمەرلىك بازارى جۇمىس ىستەيدى. وندا ساتىلاتىن ازىق-تۇلىك تاۋارلارى تىكەلەي جەرگىلىكتى وندىرۋشىلەردەن جەتكىزىلەتىندىكتەن، نارىقتاعى باعادان 15-20 پايىزعا ارزان. بيىل ەكىباستۇز بەن اقسۋ قالالارىندا دا وسىنداي بازارلاردىڭ قۇرىلىسىن باستاۋ جوسپاردا تۇر.

وڭىرلىك تۇراقتاندىرۋ قورىنا جالپى قۇنى 2,7 ميلليارد تەڭگە بولاتىن 14,6 مىڭ توننا ءونىم ساتىپ الىندى. وبلىس بويىنشا جالپى سىيىمدىلىعى 499,6 مىڭ توننا بولاتىن 150 كوكونىس ساقتاۋ قويماسى بار. بيىل سىيىمدىلىعى 8 مىڭ توننا كوكونىس قويماسىن سالۋ كوزدەلگەن. ءسۇتتى مال شارۋاشىلىعىن دامىتۋ ءۇشىن 8 تاۋارلى ءسۇت فەرماسىن سالۋعا 10 ميلليارد تەڭگە ءبولىندى. بۇل ءسۇت ءوندىرۋ كولەمىن 39,9 مىڭ تونناعا جانە مال باسىن 6,4 مىڭعا ارتتىرۋعا مۇمكىندىك بەرەدى.

- بىلتىر ءوڭىردى قۋاڭشىلىق جايلاپ، ەگىن القاپتارى كۇيىپ كەتتى. فەرمەرلەر توتەنشە جاعداي جاريالاۋدى سۇراعانىمەن، وبلىس بيلىگى ولاردىڭ وتىنىشىنە قۇلاق اسپاعانداي كورىندى. توتەنشە جاعداي جاريالاماۋدىڭ سەبەبى نەدە؟

- پاۆلودار وبلىسىنىڭ اكىمدىگى اۋىل شارۋاشىلىعى مينيسترلىگىمەن جانە وڭىرلىك ەكولوگيا دەپارتامەنتىمەن بىرلەسىپ، جەرگىلىكتى سيپاتتاعى تابيعي توتەنشە جاعدايدى ەنگىزۋ جونىندەگى ماسەلەلەردى پىسىقتادى. ەكولوگيالىق زاڭنامانىڭ تالاپتارىنا سۇيەنسەك، جازدىڭ قۇرعاق بولۋى، اتاپ ايتقاندا اۋىل شارۋاشىلىعى القاپتارىنداعى توپىراق ىلعالىنىڭ تومەندەپ كەتۋى توتەنشە جاعدايعا سايكەس كەلمەيدى. وسىعان بايلانىستى ايماقتا تابيعي سيپاتتاعى توتەنشە جاعداي ەنگىزىلمەدى.

قۇرعاقشىلىقتان زارداپ شەككەن شارۋا قوجالىقتارىنىڭ باسشىلارىمەن ءبىرقاتار كەزدەسۋ وتكىزدىم. وندا قۇرعاقشىلىق جاعدايىندا اگروونەركاسىپ كەشەنىن دامىتۋ، كۇيىپ كەتكەن ەگىندى ەسەپتەن شىعارۋ، جەمشوپ دايىنداۋ بويىنشا تاۋەكەلدەر جانە ولاردى شەشۋ جولدارى تالقىلاندى. وسىعان سايكەس، فەرمەرلەردى قولداۋ ماقساتىندا كەلەسى شارالاردى قابىلدادىق:

بىرىنشىدەن، مال ازىعىن دايىنداۋ كەزىندە شىعىنداردىڭ قۇنىن ارزانداتۋ ءۇشىن بيۋدجەتتەن 3 ميلليارد تەڭگە ءبولىندى (1,5 مىڭنان استام شارۋاشىلىق مەملەكەتتىك قولداۋعا يە بولدى).

ەكىنشىدەن، ارزانداتىلعان ديزەل وتىنىنىڭ كولەمى 2,5 ەسەگە، ياعني 4 مىڭ توننادان 10 مىڭ تونناعا دەيىن ۇلعايتىلدى. تراكتور وتىنىنىڭ ءليترى 232 تەڭگەدەن ساتىلدى (نارىقتاعى قۇنىنان 21 پايىزعا ارزان باعامەن بوساتىلدى).

ۇشىنشىدەن، فەرمەرلەر ءشوپ شاۋىپ الۋ ءۇشىن مەملەكەتتىك ورمان قورى القاپتارىنان 25 مىڭ گەكتار شابىندىق ءبولىندى.

تورتىنشىدەن، «پاۆلودار» ا ك ك جانىنان 5 مىڭ توننا كولەمىندە جەمدىك استىقتىڭ وڭىرلىك تۇراقتاندىرۋ قورى قۇرىلدى.

بەسىنشىدەن، رەسپۋبليكالىق بيۋدجەتتەن تۇقىمداردى، پەستيسيدتەردى، مينەرالدى تىڭايتقىشتاردى، مال شارۋاشىلىعى بويىنشا اسىل تۇقىمدى جانە سەلەكتسيالىق جۇمىستاردى سۋبسيديالاۋعا قوسىمشا 6,8 ميلليارد تەڭگە قاراستىرىلدى.

التىنشىدان، وبلىستىڭ 38 شارۋاشىلىعىنا قۇرعاقشىلىق سالدارىنان زارداپ شەككەنى ءۇشىن 1,3 ميلليارد تەڭگە سوماعا ساقتاندىرۋ تولەمدەرى تولەندى.

جەتىنشىدەن، 154 فەرمەر نەسيە قارىزدارىن ۇزارتۋعا جانە بورىشتارىن قايتا قۇرىلىمداۋعا رۇقسات الدى.

سايىپ كەلگەندە، بۇل مۇمكىندىكتەر شارۋالارعا ۇلكەن كومەك بولدى دەپ ەسەپتەيمىز.

- شارۋالار الداعى ەگىس ناۋقانىندا تۇقىم بويىنشا پروبلەمالار بولۋى مۇمكىن ەكەنىن ايتىپ، الاڭداپ وتىر. بۇل ماسەلە قالاي ەسكەرىلەدى؟ جالپى الداعى ەگىس ماۋسىمىنا وراي قانداي جوسپارلار تۇر؟

- كوكتەمگى دالا جۇمىستارىنا قاجەت تۇقىمنىڭ كولەمى - شامامەن 147,4 مىڭ توننا. استىقتى ءداندى داقىلدار تۇقىمىنىڭ تاپشىلىعى - 25,2 مىڭ توننا نەمەسە &. وبلىستا 8 اتتەستاتتالعان تۇقىم شارۋاشىلىعى سۋبەكتىسى، ونىڭ ىشىندە 7 شارۋاشىلىقتا ساتۋعا ارنالعان 12,8 مىڭ توننا تۇقىم بار. بۇگىندە «ازىق-تۇلىك كورپوراتسياسى» ۇ ك» ا ق استىقتى ءداندى داقىلدار تۇقىمىن ساتىپ الۋعا تاۋارلىق نەسيە بەرۋدى كوزدەپ وتىر. بيىل وڭىردەگى بولجامدى ەگىس القاپتارىنىڭ كولەمى 1 ميلليون 657,6 مىڭ گەكتار بولادى دەگەن بولجام بار. استىقتى، مايلى جانە جەمشوپ داقىلدارىنىڭ ەگىستىگىن كەڭەيتۋ ەسەبىنەن وتكەن جىلعى دەڭگەيدەن 8,1 مىڭ گەكتارعا ارتىق. جالپى تۇقىم ماسەلەسى ەلىمىزدىڭ اۋىل شارۋاشىلىعى مينيسترلىگىنىڭ جانە ءبىزدىڭ تۇراقتى باقىلاۋىمىزدا تۇر.

- وبلىستىڭ ەنەرگەتيكا جۇيەسىندە كۇردەلى ماسەلەلەر بار. ەكىباستۇزداعى جىلۋدىڭ جىرى دا ءالى تالاي جىلدارعا سوزىلاتىن سياقتى. بۇل كەمشىلىكتەردىڭ ورنىن تولتىرۋ بويىنشا نە ايتاسىز؟

- ەنەرگەتيكا جۇيەسىنىڭ ەسكىرۋى - تەك ءبىزدىڭ وبلىستا عانا ەمەس، ەل بويىنشا وزەكتى ماسەلەلەردىڭ ءبىرى. قازاقستانداعى كوپتەگەن جىلۋ-ەنەرگيا ورتالىقتارى 50 جىلدان استام جۇمىس ىستەپ كەلەدى. حالىقتى ساپالى جىلۋمەن قامتاماسىز ەتۋ شارالارىن ءبىز بىلتىرعى جىلدىڭ باسىندا قابىلدادىق. ەكىباستۇز قالاسىندا الدىڭعى جىلعى اپاتتى جاعداي قايتالانباس ءۇشىن كەشەندى جۇمىستار اتقارىلدى. ەكىباستۇز ج ە و-نىڭ بارلىق 10 قازاندىعىنا جانە قالانىڭ جىلۋ جەلىلەرىنە جوندەۋ جۇرگىزىلدى. 2023 -جىلى بارلىق 3 قالادا (پاۆلودار، ەكىباستۇز، اقسۋ) 73,1 ك م جىلۋمەن جابدىقتاۋ جەلىلەرى جوندەلدى. ناتيجەسىندە جىلۋ جەلىلەرىنىڭ توزۋىن 82,1 پايىزدان 80,5 پايىزعا دەيىن تومەندەتتىك. بيىل 22,7 ك م جىلۋ جەلىلەرىن قايتا جاڭارتۋ جانە جاڭعىرتۋ بويىنشا تاعى 8 جوبانى ىسكە اسىرۋ مىندەتى تۇر. ماگيسترالدىك جەلىلەردىڭ تسيفرلىق سىزباسى دا قۇراستىرىلۋ ۇستىندە.

- الىستاعى اۋىلدارعا ءجيى ساپارلايسىز. اۋىل جۇرتىنىڭ تۇرمىسىنان نە وي ءتۇيدىڭىز؟

- وبلىس اكىمى قىزمەتىنە تاعايىندالعان ساتتەن باستاپ ايماقتىڭ شالعاي جەرلەرىندە ورنالاسقان اۋىلداردىڭ بارلىعىن دەرلىك ارالاپ شىقتىم. اپتا سايىن تۇرعىنداردى جەكە قابىلدايمىن. حالىقتى مازالايتىن سۇراق وتە كوپ. بارلىعىنا توقتالۋ مۇمكىن ەمەس، كوبى - الەۋمەتتىك ماسەلەلەر.

اۋىلداردىڭ دامۋىنا باسا كوڭىل ءبولىپ كەلەمىز. 2019-2023 -جىلدارى «اۋىل - ەل بەسىگى» جوباسى شەڭبەرىندە 88 اۋىل جاڭعىرتىلدى. وتكەن جىلى 74 ينفراقۇرىلىم جوباسى اياقتالدى، 16,4 مىڭ اۋىلدىق تۇرعىننىڭ ءومىر ساپاسى جاقسارا ءتۇستى. قالعان 103 اۋىلدى 2024-2027 -جىلدارى قامتۋدى جوسپارلاپ وتىرمىز. سونىڭ ىشىندە بيىل 54 جوبانى (8,9 ميلليارد تەڭگە ءبولىنىپ وتىر) ىسكە اسىرامىز. مۇنىڭ بارلىعى اۋىلداعىلاردىڭ تۇرمىسىن ارتتىرۋعا باعىتتالعان.

- وبلىس تۇرعىندارىنىڭ تابىسىن ارتتىرۋ ءۇشىن قانداي قادامدار قولعا الىنىپ جاتىر؟

- وتكەن جىل قورىتىندىسى بويىنشا وڭىردەگى 60 كاسىپورىن 57 مىڭنان استام جۇمىسكەردىڭ ەڭبەكاقىسىن كوتەردى. جالاقىنىڭ ءوسىمى وبلىس بويىنشا ورتاشا العاندا 21 پايىزعا جەتتى. حالىقتىڭ ناقتى اقشالاي كىرىستەرى كەم دەگەندە 5 پايىزعا ۇلعايدى. ستاتيستيكا ورگاندارى بىلتىر جاڭادان 30,6 مىڭ جۇمىس ورنى قۇرىلعانىن، ونىڭ 22,7 مىڭنان استامى تۇراقتى جۇمىس ورىندارى ەكەنىن ناقتىلاپ وتىر.

- بىلتىر ءبىر جينالىستاعى سوزىڭىزدە ءبىرقاتار مەكەمە باسشىسىنىڭ كەمشىلىگىن اشىق ايتتىڭىز. ال قازىر وڭىرلىك باسقارمالاردىڭ ءبىرازىندا باسشى جوق. وبلىستا تاجىريبەلى كادرلارعا قاتىستى تاپشىلىق قالىپتاسىپ وتىر ما، سولاي بولسا ونىڭ سەبەبى نەدە؟

- نەگىزى، ءسىزدىڭ بۇل ساۋالىڭىز - وتە اۋقىمدى تاقىرىپ. سوڭعى تاعايىنداۋلار ايماقتا كادر تاپشىلىعى بار ەكەنىن كورسەتىپ بەردى. قىزمەتكە ساي ماماندى بىردەن تابۋ قازىر وتە قيىن. الاش قايراتكەرى ءاليحان بوكەيحان ۇلى: «ۇلتقا قىزمەت ەتۋ بىلىمنەن ەمەس، مىنەزدەن» دەگەن. ءار باسشى ءوز جۇمىسىنا اسقان جاۋاپكەرشىلىكپەن قاراپ، سالادا جاڭا بەتبۇرىستار جاساۋعا، ناتيجە كورسەتۋگە، ەڭ باستىسى كەرەك كەزدە تەز ارادا شەشىم قابىلداي بىلۋگە ۇمتىلسا، قۇبا- قۇپ. ءبىلىمدى، بىلىكتىلىك پەن تاجىريبەنى، سونداي-اق، ادامي قاسيەتتەردى ۇشتاستىرا بىلەتىن ادام عانا مىقتى قىزمەتكەر بولا الادى.

بۇگىندە، اۋىل شارۋاشىلىعى، كاسىپكەرلىك جانە يندۋستريالىق-يننوۆاتسيالىق دامۋ، اقپارات جانە قوعامدىق دامۋ باسقارمالارى باسشىلارىنىڭ ورىندارى بوس تۇر. مەكەمەلەر باسشىلىعىنا ساي كەلەتىن ازاماتتاردى ىرىكتەۋ جۇرگىزىلىپ جاتىر، ونىڭ ىشىندە پرەزيدەنتتىك كادر رەزەرۆىنە باسا ءمان بەرىپ وتىرعان جاعدايىمىز بار.

- «وبلىستا يدەولوگيا سالاسى اقساپ تۇر» دەگەن پىكىردى ەل اعالارى مەن قالامگەرلەردىڭ اۋزىنان ءجيى ەستيمىز. بۇعان نە ءۋاج ايتاسىز؟

- يدەولوگيالىق جۇمىس - ءاردايىم وڭىرلىك ساياساتتىڭ نەگىزگى باعىتتارىنىڭ ءبىرى. ارينە، ايتىلاتىن سىن دا، ۇسىنىس تا كوپ.

پاۆلودار وبلىسىندا ۇلتتىق مۇددە مەن ەل بولاشاعى ءۇشىن ەڭبەك ەتىپ جۇرگەن زيالى قاۋىم وكىلدەرى وتە بەلسەندى. جەرگىلىكتى قالامگەرلەر، قوعام بەلسەندىلەرى، ۇلت جاناشىرلارى الەۋمەتتىك سالامەن تىعىز قارىم- قاتىناستا. اقساقالدار كەڭەسىمەن، زيالى قاۋىم وكىلدەرىمەن، قالامگەرلەرمەن، ونەرپازدارمەن كەزدەسۋلەر، ءار ءتۇرلى بىرلەسكەن جيىندار تۇراقتى تۇردە ءوتىپ تۇرادى. وندا ايتىلعان ءاربىر ۇسىنىس پەن پىكىر جۇمىس بارىسىندا مىندەتتى تۇردە ەسكەرىلەدى. كەمشىلىكتەر مەن جەتىلدىرەتىن تۇستاردى زيالى قاۋىم تىكەلەي كەز كەلگەن مەملەكەتتىك قىزمەتكەرگە ايتا الادى.

جۇمىسىمىزعا قاتىستى پىكىر الماسۋ مەن تالقىلاۋدىڭ بولۋى - زاڭدىلىق. ءبىز، مەملەكەتتىك اپپارات وكىلدەرى قانداي دا ءبىر ناقتى ۇسىنىستار مەن سىندى ءارقاشان قابىلداۋعا دايىنبىز. ولقى سوعىپ جاتقان تۇستاردى ورنىنا كەلتىرۋ ءۇشىن جۇمىستاردى جالعاستىرامىز.

- سوڭعى جىلدارى وڭىرلىك ونوماستيكا كوميسسياسىنىڭ وتىرىستارى سيرەپ كەتكەنى بايقالادى. قوعام بەلسەندىلەرى مەن زيالى قاۋىم وكىلدەرى ءجيى كوتەرەتىن تاقىرىپ - پاۆلودار قالاسىنىڭ/وبلىسىنىڭ اتاۋىن وزگەرتۋ تۋرالى ۇسىنىسقا ءوز تاراپىڭىزدان نە وي-پىكىر قوساسىز؟

- مەنىڭشە، ونوماستيكا كوميسسيالارى ءوز جۇمىستارىن جامان جۇرگىزىپ وتىرعان جوق. بىلتىر وبلىستىق كوميسسيا ەكى مارتە وتىرىس جاساعان. 2023 -جىلى 146 كوشە مەن 17 ەلدى مەكەننىڭ اتاۋى وزگەردى.

ال پاۆلودار وبلىسى مەن قالانىڭ اتاۋىن وزگەرتۋ - وتە كۇردەلى ماسەلە. بۇل رەتتە، ايماق پەن شاھار تۇرعىندارىنىڭ پىكىرى اسا ماڭىزدى. مۇنداي باستاماعا جۇرتشىلىقتىڭ باسىم بولىگىنىڭ قولداۋى قاجەت. بۇل - ءبىر. ەكىنشىدەن، اتاۋلارعا قاتىستى ۇسىنىستاردا بىرىزدىلىك جوق، قوعام بەلسەندىلەرى مەن زيالى قاۋىم، تۇرعىندار ورتاق بايلامعا كەلە الماي ءجۇر. ءبىر عانا پاۆلودار قالاسىنىڭ اتاۋىن وزگەرتۋگە قاتىستى 10 عا جۋىق نۇسقا بار (ەرتىس، سارىارقا، كەرەكۋ، قيماق، تۇزقالا جانە ت. ب.). سوندىقتان، ۇسىنىستار جان- جاقتى زەردەلەنىپ، اسىعىستىققا جول بەرىلمەگەنى دۇرىس دەپ ەسەپتەيمىن.

- سوڭعى سۇراق وڭىردەگى تۋريزمنىڭ الەۋەتىنە قاتىستى. باياناۋىلداعى تۋريستىك الەۋەتتى ودان ءارى دامىتۋ ءۇشىن نە جاسالادى؟

- باياناۋىل كۋرورتتىق ايماعىندا ءبىر دەمدە 5 مىڭ ادام دەمالا الاتىن 54 تۋريستىك نىسان بار. تاۋلى ولكەدە 13 نەگىزگى تۋريستىك مارشرۋت جانە 68 كورنەكى ورىن جۇمىس ىستەيدى. بىلتىر جاسىباي دەمالىس ايماعىنا شامامەن 120 مىڭ ادام كەلدى.

تۋريستىك سالانى دامىتۋ جونىندەگى 2028 -جىلعا دەيىنگى وڭىرلىك باعدارلاماسى بەكىتىلدى. وندا 8,5 ميلليارد تەڭگەگە 17 ينۆەستيتسيالىق جوبانى جانە 12,3 ميلليارد تەڭگەگە 7 ينفراقۇرىلىمدىق جوبانى ىسكە اسىرۋ بويىنشا ءىس-شارالار كوزدەلگەن. باياناۋىلداعى تۋريستىك الەۋەتتى ودان ءارى دامىتۋ ءۇشىن پاۆلودار وبلىسىنىڭ اكىمدىگى مەن ERG اراسىنداعى ءوزارا ىنتىماقتاستىق تۋرالى مەموراندۋم شەڭبەرىندە 3 جوبانىڭ سمەتالىق قۇجاتتاماسى ازىرلەندى. ولار - باياناۋىل كەنتىندە ۇلى وتان سوعىسى باتىرلارىنا ارنالعان ستەللا بويىنداعى جاياۋ-سەرۋەندەۋ ايماعىن قايتا جاڭارتۋ، سابىندىكول كولىنىڭ جاعالاۋى مەن جاعاجايىن قايتا جاڭارتۋ، تۋريستەرگە ارنالعان مۋزەيى بار ورتالىق سالۋ. بۇعان قوسا اۋداندا دەنە شىنىقتىرۋ-ساۋىقتىرۋ ورتالىعىن اشۋ كوزدەلگەن. كەلەشەكتە اۋدان ورتالىعىندا شاڭعى- روللەرلىك تراسسا، شيپاجاي سالۋ، حوستەلى بار ءىرى زاماناۋي جانارماي قۇيۋ ستانساسىن تۇرعىزۋ سياقتى جوسپارلار دا بار.

 

اۆتور

مۇرات اياعان