بۇل نەگىز ەرلى-زايىپتىلارعا بۇعان دەيىن تاعىلعان ەسىرتكى ساۋداسىنا قاتىستى ايىپتاردى تولىقتىرادى، دەپ حابارلايدى Reuters.
63 جاستاعى مادۋرو مەن 69 جاستاعى فلورەس 3-قاڭتاردا دونالد ترامپتىڭ بۇيرىعىمەن ا ق ش- تىڭ اسكەري وپەراتسياسى كەزىندە كاراكاستاعى ۇيلەرىندە ۇستالىپ، ەسىرتكى ساقتادى دەگەن ايىپپەن نيۋ-يورككە جەتكىزىلدى. سودان بەرى ولار برۋكليندەگى تەرگەۋ يزولياتورىندا قاماۋدا وتىر.
بەيسەنبى كۇنى مانحەتتەندەگى فەدەرالدىق سوتقا قوسىمشا ايىپتاۋ قورىتىندىسى ۇسىنىلدى. وندا مادۋرو مەن فلورەسكە توعىز ادامدى، سونىڭ ىشىندە ا ق ش- تىڭ ءۇش ازاماتىن ازاپتادى دەگەن ايىپ تاعىلعان.
ايىپتاۋ قورىتىندىسىندا 1999-2025-جىلدارى ۆەنەسۋەلادا مىڭداعان ادام مەملەكەتتىك ورگاندار تاراپىنان قۋدالانىپ، قاماۋعا الىنعانى، ازاپتالىپ، ولتىرىلگەنى ايتىلعان. مادۋرو 2013-جىلى پرەزيدەنت بولىپ سايلانعانعا دەيىن ءوزى دە، جۇبايى سيليا فلورەس تە ونىڭ الدىنداعى پرەزيدەنت ۋگو چاۆەستىڭ ۇكىمەتىندە ءتۇرلى قىزمەت اتقارعان.
پروكۋرورلاردىڭ مالىمەتىنشە، كەيبىر ۇستالعاندار ەلەكتر توگىمەن ازاپتالىپ، سوققىعا جىعىلعان جانە ولاردىڭ قول-اياعىن بايلاپ، اسىپ قويعان.
تاعىلعان بارلىق ايىپ بويىنشا كىناسى دالەلدەنسە، مادۋرو مەن جۇبايى 50 جىلعا دەيىن تۇرمەگە قامالۋى مۇمكىن.
مادۋرو مەن فلورەس وزدەرىنە تاعىلعان ايىپتاردى جوققا شىعارىپ، 2027-جىلعى 1-ماۋسىمدا نيۋ-يوركتە بولاتىن سوتتا ءوز ۇستانىمدارىن قورعاۋدى كوزدەپ وتىر.
بۇعان دەيىن سيليا فلورەستىڭ ادۆوكاتتارى ونى ءۇي قاماققا اۋىستىرۋ تۋرالى ءوتىنىش بەرۋدى جوسپارلاپ وتىرعانىن مالىمدەگەن ەدى.
ادۆوكاتتارىنىڭ ايتۋىنشا، برۋكليندەگى تەرگەۋ يزولياتورىندا قاماۋدا وتىرعان سيليا فلورەس 11 كەلى سالماق تاستاعان. دارىگەرلەر وعان جۇرەگىنە وتا جاسالۋى مۇمكىن ەكەنىن ەسكەرتكەن. سونداي-اق ولار فلورەستىڭ ۇنەمى باسى اينالىپ، السىرەپ، تىنىسى تارىلىپ جۇرگەنىن، شىلدەدە جۇرەك تالماسىنا ۇشىراۋى دا مۇمكىن ەكەنىن مالىمدەدى.
الايدا بەيسەنبى كۇنى سوت فلورەستى قاماۋدان بوساتىپ، ءۇي قاماققا اۋىستىرۋ تۋرالى ءوتىنىشىن قاناعاتتاندىرمادى.
- فلورەستىڭ جاعدايى 5 قاڭتاردا سوتتا العاش كورگەن كەزىمدەگىدەن ناشار ەمەس، ءتىپتى دەنساۋلىعى ءسال دە بولسا جاقسارعانداي كورىنەدى، - دەدى سۋديا.
بۇعان دەيىن كاراكاستا مادۋرونىڭ جاقتاستارى ونى ەلگە قايتارۋدى تالاپ ەتكەنى حابارلانعان بولاتىن.