اقمولا وبلىسىندا اكىمدەر جازاعا تارتىلدى

اقمولا وبلىسى بويىنشا مەملەكەتتىك قىزمەت ىستەر دەپارتامەنتى ادەپ جونىندەگى كەڭەسىندە سەلينوگراد اۋدانىنىڭ جارلىكول جانە پريرەچين اۋىلدىق وكرۋگتەرىنىڭ اكىمدەرىنە قاتىستى تارتىپتىك ىستەر قارالدى، دەپ حابارلايدى قازاقپارات ءتىلشىسى ۆەدومستۆونىڭ باسپا ءسوز قىزمەتىنە سىلتەمە جاساپ.

كەڭەستە ايتىلعانداي، پريرەچين اۋىلدىق وكرۋگىنىڭ اكىمى م. جاندىلدين 2023-جىلعى ماۋسىم ايىنداعى جۇمىس ۋاقىتىن ەسەپكە الۋ تابەلىندە ج. زۋلتاي ەسىمدى الەۋمەتتىك قىزمەتشى 8 ساعاتتىق جۇمىس كۇنىمەن 2023-جىلدىڭ 14، 15، 16- ماۋسىم كۇندەرى تابەل تولتىرعان. ال، ول بولسا، سول كۇندەرى، ياعني 14-24- ماۋسىم ارالىعىندا استانا قالاسىنان موڭعوليانىڭ بايان ولگەي ايماعىنا پويىزبەن كەتكەن.

ءدال وسىعان ۇقساس جاعداي بويىنشا جارلىكول اۋىلدىق وكۋرگىنىڭ اكىمى م. ساعىنتايەۆقا قاتىستى تارتىپتىك ءىس قارالدى. مۇندا دا الەۋمەتتىك قىزمەتشى د. حاشاباي 2022-جىلدىڭ 17- ماۋسىم مەن 9- شىلدە ارالىعىندا، سونداي-اق 2023-جىلدىڭ 10-17- اقپان ارالىعىندا استانا قالاسىنان موڭعوليانىڭ بايان ولگەي ايماعىنا پويىزبەن كەتكەن. الايدا، جارلىكول اۋىلدىق وكرۋگىنىڭ اكىمى م. ساعىنتايەۆ 2022-جىلعى ماۋسىم-شىلدە جانە 2023-جىلعى اقپان ايلارىنداعى جۇمىس ۋاقىتىن ەسەپكە الۋ تابەلىندە الەۋمەتتىك قىزمەتشىنىڭ جۇمىس ورنىندا ناقتى بولماعان كەزەڭىندە 4 ساعاتتىق جۇمىس كۇنىن كورسەتتى.

«وسىلايشا، مەملەكەتتىك قىزمەت تۋرالى زاڭنىڭ 50-بابى 1-تارماعىنىڭ 4) تارماقشاسىن بۇزعانى ءۇشىن سەلينوگراد اۋدانىنىڭ اكىمىنە جارلىكول جانە پريرەچين اۋىلدىق وكرۋگتەرىنىڭ اكىمدەرى م. ساعىنتايەۆ پەن م. جاندىلديننىڭ «قىزمەتىنە تولىق سايكەس ەمەس تۋرالى ەسكەرتۋ» تۇرىندەگى تارتىپتىك جازا قولدانۋ ۇسىنىلدى. قاراۋ ناتيجەلەرى بويىنشا ادەپ جونىندەگى كەڭەس ءتيىستى ۇسىنىستار مەن شەشىمدەر شىعاردى»، - دەدى اقمولا وبلىسى بويىنشا مەملەكەتتىك قىزمەت ىستەر دەپارتامەنتىنىڭ باسپا ءسوز قىزمەتىنەن.

ايتا كەتسەك، بۇدان بۇرىن اقمولا وبلىسىندا اكىمنىڭ تۇرعىندى ۇرعانىن جازعان ەدىك.