تۇركىستان وبلىسىندا ەسكى قالاشىقتىڭ ورنى تابىلدى

تۇركىستان وبلىسىنا قاراستى كەلەس اۋدانى اۋماعىنان ەجەلگى قالاشىقتىڭ ورنى تابىلدى، - دەپ حابارلايدى قازاقپارات ءتىلشىسى.

ۇلكەن اۋماقتى الىپ جاتقان وركەنيەت ورداسى بۇگىندە زەرتتەلۋدە. سونداي- اق ارحەولوگتار سول ايماقتاعى مىڭتوبە قورىمىنان تابىلعان دۇنيەلەردى قۇندى جادىگەرگە بالاپ وتىر.

«1800 جىلدان استام تاريحى بار كيەلى نىساندا جۇرگىزىلگەن جۇمىستار بارىسىندا سول ءداۋىردىڭ مادەنيەتىن انىقتاۋعا باسا ءمان بەرىلمەك. قازىردىڭ وزىندە بۇل جەردەن قىش ىدىستار مەن ساداق جەبەسىنىڭ باسى تابىلدى. بۇل قاڭلى ءداۋىرى كەزىندەگى ەجەلگى ءدىني نانىم- سەنىمدەر تۋرالى بىلۋگە مول مۇمكىندىك بەرەدى. سونداي- اق سول ماڭنان كۇلتوبە قالاشىعىنىڭ ورنىن تاپتىق»، - دەيدى ق. ا. ياساۋي اتىنداعى حقتۋ- دىڭ جەتەكشى عىلىمي قىزمەتكەرى، phd دوكتورى مۋزاففار گۋرسوي.

ارحەولوگتار كونە قالاشىق تابىلعان ەڭ بيىك نۇكتەنى ۇلكەن قۇرىلىس نىسانى بولعان دەپ بولجاپ وتىر. سەبەبى قازبا بارىسىندا كەسەكتەن سالىنعان قابىرعالار انىقتالعان. ال وسى جەردەن شىققان قىش ىدىستاردىڭ VIII- IX عاسىرلارعا تيەسىلى ەكەنىن ايتادى.

ارحەولوگيالىق قازبا جۇمىستارى ءارى قاراي جالعاساتىن بولادى. قالاشىق جانە قورىم ماڭىنان تابىلعان جادىگەرلەر ارنايى مامانداردىڭ زەرتحانالىق ساراپتاماسىنان وتكەن سوڭ مۋزەي قورىنا تاپسىرىلادى.