سمارتفوندى قاسىڭىزعا الىپ ۇيىقتاۋ شىنىمەن دە زيان با؟
ينتەرنەتتە سمارتفونداردان بولىنەتىن «ساۋلەلەنۋدىڭ» قاۋپى جانە ونىڭ قاتەرلى ىسىك تۋدىراتىنى جايلى وقىعان بولارسىز. بۇل قانشالىقتى راس؟ سمارتفوندى قاسىڭىزعا الىپ ۇيىقتاۋ شىنىمەن دە زيان با؟
قازىرگى تاڭدا ۇيالى تەلەفونداردىڭ ساۋلەلەنۋى قاتەرلى ىسىك تۋدىراتىنىن دالەلدەيتىن ەشقانداي زەرتتەۋ جوق. اعزاعا بارلىق ساۋلەلەنۋ بىردەي قاۋىپتى ەمەس. جاسۋشالار ءۇشىن قاۋىپتى يوندايتىن نەمەسە راديوبەلسەندى ساۋلەلەنۋ، مىسالى، گامما- ساۋلەلەر نەمەسە رەنتگەن قاۋىپ توندىرەدى. ال سمارتفون ونداي ساۋلەلەنۋ شىعارا المايدى. دەسە دە، سمارتفونمەن بىرگە ۇيىقتاماعان ءجون. ونىڭ نەگىزگى سەبەپتەرىن ۇسىنامىز.
ەكراننىڭ كوگىلدىر جارىعى ۇيقى ىرعاعىن بۇزادى
سمارتفون، تەلەديدار، كومپيۋتەر جانە باسقا دا قۇرىلعىلاردان كوك جارىق شىعادى. ول كوزگە كورىنەتىن سپەكترلەر اراسىندا ۇزىندىعى ەڭ قىسقا بولعانىمەن، ەنەرگياسى جوعارى. ەكراننىڭ كوك جارىعى ۇيقى گورمونى - مەلاتونيننىڭ ءبولىنۋىن باسىپ تاستايدى. تابيعي شارتتا كۇندىز كۇن شىعىپ تۇرادى، سوندىقتان ءسىز سەرگەك جۇرەسىز. ال تۇندە كۇن باتادى، سوندىقتان قاراڭعىدا ۇيقىڭىز كەلە باستايدى. ءبىراق ءسىز كەشكە ەكران قاراۋدى جالعاستىرساڭىز، اعزا ءالى كۇندىز دەپ قابىلدايدى دا، مەلاتونين بولىنبەيدى. ناتيجەسىندە، ۇيقىسىزدىقپەن قينالاسىز نەمەسە ۇيقىڭىزدىڭ ساپاسى بۇزىلادى.
سمارتفوننىڭ كوك جارىعىنىڭ جاعىمسىز سالدارىن بولدىرماۋ ءۇشىن ۇيىقتاۋعا 1-2 ساعات قالعاندا گادجەتتەرگە قاراماۋعا تىرىسىڭىز.
سمارتفون الاڭداتادى جانە ۇيىقتاۋعا كەدەرگى كەلتىرەدى
قۇرىلعى قولىڭىز جەتەتىن جەردە تۇرسا، الەۋمەتتىك جەلىدەگى جاڭالىقتاردى قاراعىڭىز كەلىپ تۇرادى. ناتيجەسىندە، الاڭداپ، ءتۇن ورتاسىنا دەيىن ەكرانعا قاراپ جاتاسىز. سوندىقتان سمارتفوندى جاتىن بولمەگە كىرگىزبەگەن ءجون. ادەتتە، ادامدار سمىرتفوندى وياتقىشى ءۇشىن توسەگىنىڭ جانىنا قويادى. ولاي بولسا، كادىمگى وياتقىش ساتىپ الىڭىز. سەبەبى سمارتفونعا الاڭداۋ جانە ۇيقىنىڭ قانباۋى دەنساۋلىعىڭىزعا جانە ونىمدىلىگىڭىزگە جاعىمسىز اسەر ەتەدى.
سمارتفون قىزىپ كەتكەننەن نەمەسە قىسقا تۇيىقتالۋدان جانىپ كەتۋى مۇمكىن
بۇزىلعان نەمەسە دۇرىس قولدانىلماعان سمارتفون ءورت شىعۋىنىڭ سەبەبى بولا الادى. مىسالى، Apple كومپانياسى قۇرىلعىلارىن 35 گرادۋستان جوعارى تەمپەراتۋرادا قولدانباۋدى ۇسىنادى. كومپانيانىڭ ايتۋىنشا، سمارتفونداردى ىستىق ورتادا ساقتاۋ نەمەسە زاريادتاۋعا بولمايدى.
سمارتفونداردىڭ ليتي-يوندى اككۋمۋلياتورى قاتتى قىزعاننان، زاريادتاعان كەزدە قىسقا تۇيىقتالۋ نەمەسە مەحانيكالىق زاقىم سەبەبىنەن جانۋى نە اتىلۋى مۇمكىن. سونداي-اق قۇرىلعىنى زاريادتاۋ كەزىندە قاراۋسىز قالدىرماڭىز. اسىرەسە، ونى كۇننىڭ كوزى تىكە تۇسەتىن جەرگە نەمەسە ىستىق بولمەگە زاريادتاۋعا قالدىرماڭىز.