جاپونيانىڭ مينيسترلەر كابينەتىندە اۋىس- ءتۇيىس بولدى

سارسەنبى كۇنى جاپونيا پرەمەر- ءمينيسترى فۋميو كيشيدا مينيسترلەر كابينەتىن جاڭارتىپ، بەس ايەل ءمينيستردى تاعايىندادى، بۇل ەل تاريحىنداعى العاشقى جاعداي.

سونىمەن بىرگە، پرەمەر- مينيستر جاقىن ارادا ەل پارلامەنتىنىڭ تومەنگى پالاتاسىن تاراتۋدى جوسپارلاپ وتىر دەگەن دەرەك بار، دەپ حابارلايدى قازاقپارات Kyodo اگەنتتىگىنە سىلتەمە جاساپ.

كيشيدا بۇل وزگەرىس ۇكىمەتتىڭ اكىمشىلىگىن كۇشەيتىپ، قوعامنىڭ قولداۋىن تابادى دەپ ۇمىتتەنەدى.

19 ءمينيستردىڭ 11- ءى اۋىستى. سىرتقى ىستەر ءمينيسترى بولىپ بۇرىنعى ادىلەت ءمينيسترى، تاجىريبەلى ايەل دەپۋتات يوكو كاميكاۆا تاعايىندالدى.

قارجى ءمينيسترى شۋنيچي سۋزۋكي، مينيسترلەر كابينەتىنىڭ باس حاتشىسى حيروكازۋ ماتسۋنو جانە ونەركاسىپ ءمينيسترى ياسۋتوشي نيشيمۋرا ءوز ورىندارىندا قالدى. ماتسۋنو مەن نيشيمۋرا وزدەرىنىڭ كونسەرۆاتيۆتى ساياسي ۇستانىمدارىمەن تانىمال.

مينيسترلەر كابينەتىنىڭ ساياساتىنا حالىقتىڭ قولداۋ كورسەتۋ دەڭگەيىنىڭ تومەندەۋى جالعاسۋدا، بۇل ءىشىنارا كوپشىلىكتىڭ باعانىڭ وسۋىنە نارازىلىعىنا جانە جالاقىنىڭ كوتەرىلمەۋىنە بايلانىستى.

جاپونيانىڭ سيفرلىق دامۋ ءمينيسترى، دجوردجتاۋن ۋنيۆەرسيتەتىنىڭ تۇلەگى جانە بۇرىن سىرتقى ىستەر ءمينيسترى بولعان تانىمال تۇلعا تارو كونو دا ءوز ورنىن ساقتاپ قالدى.

مينورۋ كيحارا قورعانىس ءمينيسترى بولىپ تاعايىندالدى. كابينەتتىڭ باسقا جاڭا مۇشەلەرىنە دەنساۋلىق ساقتاۋ ءمينيسترى كەيزو تاكەمي، ايماقتىق قايتا قۇرۋ ءمينيسترى شيناكو تسۋچيا جانە اۋىل شارۋاشىلىعى ءمينيسترى يچيرو مياشيتا كىرەدى.

سارسەنبى كۇنى ل د پ- نى باسقاراتىن كيشيدا بيلەۋشى ​​پارتيانىڭ باسشىلىعىن دا اۋىستىردى.