قازاقستاندا سارقىلعان كەن ورىندارى كوبەيگەن - ەنەرگەتيكا مينيسترلىگى

استانا. قازاقپارات - ءماجىلىس دەپۋتاتى دۇيسەنباي تۇرعانوۆ بۇگىن پالاتا وتىرىسىندا ءبىرىنشى وقىلىمدا ماقۇلدانعان جەر قويناۋىن پايدالانۋ سالاسىن جەتىلدىرۋ ماسەلەلەرى بويىنشا وزگەرىستەر ەنگىزۋ زاڭ جوباسىنا قاتىستى تۇسىنىك بەردى، دەپ حابارلايدى قازاقپارات ءتىلشىسى.

«وسى قۇجاتتا قامتىلعان تولىقتىرۋلاردىڭ باستى ماقساتى - ەلىمىزدەگى مينەرالدى رەسۋرستاردىڭ بازاسىن كوبەيتۋ. بۇل تۇرعىدا ينۆەستيتسيا تارتۋعا ەكپىن قويىلىپ وتىر. ەكىنشىدەن، جەر قويناۋىن بارلاۋ كەزىندە بولۋى مۇمكىن بيۋروكراتيالىق توسقاۋىلداردى جويۋعا نازار اۋدارىلدى. بارلىق ساراپتامالاردىڭ مەرزىمى 8-12 ايعا دەيىن قىسقارتىلدى. بۇرىن بۇل راسىمدەر ءۇش جىلعا دەيىن سوزىلاتىن. جالپى، ەلىمىزدىڭ گەولوگيالىق قوردى كوبەيتۋگە مۇمكىندىك جاسالادى»، - دەدى د. تۇرعانوۆ ماجىلىستە تىلشىلەر سۇراعىنا جاۋاپ بەرە وتىرىپ.

ءوز كەزەگىندە ەنەرگەتيكا ۆيتسە-ءمينيسترى اسحات حاسەنوۆ ەلىمىزدەگى سارقىلعان كەن ورىندارى كوبەيگەنىن، قازىر ولار شامامەن 80 پايىزعا جەتكەنىن ايتتى.

«ولاردىڭ كوبى 1960-جىلدان بەرى اشىلعان كەن ورىندارى. تاۋەلسىزدىك جىلدارىندا 1 ميلليارد 900 ميلليون توننا مۇناي ءوندىرىلدى. سوندىقتان سارقىلعان كەن ورىندارىنىڭ جۇمىسىن جانداندىرۋ ءۇشىن جاڭادان ىنتالاندىرۋ تەتىگىن ەنگىزۋ قاجەت. بۇل رەتتە اتالعان زاڭ جوباسىندا ءتيىستى قادامدار ەسكەرىلگەن. قۇجات گەولوگيالىق بارلاۋ جۇمىستارىنا باعىتتالعان. مينەرالداردىڭ رەسۋرستىق بازاسىن كەڭەيتۋ اياسىندا جىل سايىن شامامەن 200 ميلليارد تەڭگە ينۆەستيتسيا باعىتتاۋدى قاراستىرىپ وتىرمىز»، - دەدى ۆيتسە-مينيستر.

ونىڭ سوزىنە قاراعاندا، الداعى بەس جىلدا ەلىمىزدە مۇناي ءوندىرۋ دەڭگەيى ارتادى.

سونىمەن قاتار اسحات حاسەنوۆ بيىل قازاقستاندا مۇناي ءوندىرۋ كولەمى ءبىرشاما ازايۋى مۇمكىن ەكەنىن ايتتى.

بۇدان بۇرىن حابارلانعانداي، بۇگىن ءماجىلىستىڭ جالپى وتىرىسىندا «جەر قويناۋى جانە جەر قويناۋىن پايدالانۋ تۋرالى» كودەكسىنە جەر قويناۋىن پايدالانۋ سالاسىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.