اۋىلدىق وكرۋگتەرگە قانداي سالىق ءتۇرى بەرىلەدى

استانا. قازاقپارات - ۇلتتىق ەكونوميكا ۆيتسە- ءمينيسترى ازامات ءامرين الداعى ۋاقىتتا ءتورتىنشى دەڭگەيلى بيۋدجەتكە قانداي سالىق ءتۇرى بەرىلۋى مۇمكىن ەكەنىن ايتتى، دەپ حابارلايدى قازاقپارات ءتىلشىسى.

2020 -جىلى رەسپۋبليكالىق بيۋدجەتتەن كورپوراتيۆتىك تابىس سالىعىن بەردىك. قازىرگى ۋاقىتتا 1,3 مىڭ ءىرى كومپانيا رەسپۋبليكالىق بيۋدجەتكە، ال قالعاندارى جەرگىلىكتى بيۋدجەتكە تولەيدى. بۇل سالىقتى بەرگەن كەزدە ونىڭ سوماسى 380 ميلليارد تەڭگە بولاتىن. ال وتكەن جىلى 1,1 تريلليون تەڭگە جينادىق، ياعني اتالعان ءىس- شارانىڭ تيىمدىلىگى كورىنىپ تۇر، - دەدى ازامات ءامرين ۇكىمەت وتىرىسىنان كەيىنگى بريفينگتە.

ونىڭ اتاپ وتۋىنشە، الداعى ۋاقىتتا ءتورتىنشى دەڭگەيلى بيۋدجەتكە پايدالى قازبالاردى ءوندىرۋ سالىعىن بەرۋ جوسپارلانىپ وتىر.

بۇل جۇمىستى جاڭا بيۋدجەتتىك كودەكس اياسىندا جالعاستىرامىز. ءبىرىنشى كەزەكتە پايدالى قازبالاردى وندىرۋگە ارنالعان سالىقتى بەرگىمىز كەلەدى. جەر قويناۋى تۋرالى كودەكستە سالىق تولەۋشى قانداي دا ءبىر كەن ورنىن يگەرگىسى كەلگەندە جالپى جينالىس وتكىزۋ تيىستىگى كوزدەلگەن نورما بار. جينالىس بارىسىندا تۇرعىندار شاڭ- توزاڭ تۇرىپ، قانداي دا قولايسىزدىقتى سەزىنەتىندىگىن ايتۋى مۇمكىن. سوندىقتان، ولار دا سالىقتىڭ پايداسى قاندايلىعىن سەزىنۋى ءتيىس. وسىعان وراي، ءتورتىنشى دەڭگەيگە سالىقتى بەرەمىز، - دەدى ۆيتسە- مينيستر.