قالالاردا مەكتەپ سالىنباعان اۋدانداردا تۇرعىن ءۇي قۇرىلىسىنا تىيىم سالىنادى
«مەكتەپتەردەگى ورىن تاپشىلىعىنا بايلانىستى جاعدايدى ايتاتىن بولساق، ءۇش اۋىسىمدا وقىتاتىن مەكتەپتەردىڭ سانى ايتارلىقتاي ازايمادى. بۇل تۇرعىدا مەگاپوليستەرىمىزدە تۇرعىن ءۇي قۇرىلىسى قارقىندى ءجۇرىپ جاتقانىمەن، بۇل ۋچاسكەلەردە دايىن الەۋمەتتىك ينفراقۇرىلىم جوق دەسەك بولادى. قارقىندى قۇرىلىس باستالعان اۋدانداردا بالالار ءۇش اۋىسىمدا وقىپ جاتىر. ءبىراق مۇنداي كوپقاباتتى تۇرعىن ۇيلەردى سالۋعا رۇقسات بەرگەندە، اكىمدىكتىڭ مۇنداي ناقتى ماسەلەلەردى ەسكەرمەگەنى بالالاردىڭ كىناسى ەمەس. سوندىقتان دەپۋتاتتار ءتيىستى زاڭ جوباسىن دايىنداپ، قۇجاتتى ۇكىمەتكە جىبەردىك»، - دەدى اسحات ايماعامبەتوۆ ءماجىلىستىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، زاڭ جوباسىندا دايىن مەكتەپتەر مەن بالاباقشالار جوق جەردە كوپپاتەرلى تۇرعىن ۇيلەر سالۋعا تىيىم سالۋ قاراستىرىلعان. سونىمەن قاتار، بەلگىلى ءبىر اۋداندا تەك ءبىر اۋىسىمدا وقىتاتىن مەكتەپ بولسا عانا سول جەردە تۇرعىن ءۇي سالۋعا رۇقسات بەرىلۋى ءتيىس.
«بۇل ماسەلەنى ەسكەرۋ كەرەك. مەكتەپتەردى سالا بەرۋگە بولادى، ءبىراق قالانىڭ كەيبىر جەرىندە مەكتەپ قۇرىلىسىنا مۇلدەم جەر تەلىمى قاراستىرىلماعان. اتا- انالار وزدەرىنىڭ تۇرعىن ۇيىنەن 10-15 شاقىرىم جەردە ورنالاسقان مەكتەپكە بالاسىن كۇندەلىكتى تاسىمالداي المايدى عوي؟ ! سوندىقتان وسى سالادا قوردالانعان پروبلەمانى جۇيەلى تۇردە شەشۋ كەرەك»، - دەدى دەپۋتات.