ەلوردادا قۇسبەگىلەردىڭ حالىقارالىق تۋرنيرى ءوتتى

استانا. قازاقپارات - ەلوردا ىرگەسىندەگى سوفيەۆ اۋىلىندا ۇيىمداستىرىلعان قۇسبەگىلىكتەن كۇنتۋعان توقتىباي ۇلى اتىنداعى حالىقارالىق تۋرنير بۇگىن ءوز مارەسىنە جەتتى، دەپ حابارلايدى قازاقپارات ءتىلشىسى.

سايىسقا ەلىمىزدىڭ تۇپكىر-تۇپكىرىنەن كەلگەن قۇسبەگىلەرمەن قاتار، قىتاي، موڭعوليا جانە قىرعىزستاندىق قۇس باپتاۋشىلار دا قاتىستى.

بۇل - ءبىزدىڭ قازاقستانداعى جارىسقا العاش كەلۋىمىز. ال، جالپى بۇعان دەيىن قازاقستاندىق قۇسبەگىلەرمەن تاجىريبە الماسىپ، بىرگە جاتتىعۋلار وتكىزگەن بولاتىنبىز. وسى سايىسقا 2 قۇس اكەلىپ قوستىق. ويتكەنى، استانا قالاسى الىس، قۇستى جەتكىزۋ وڭاي شارۋا ەمەس. بۇل سايىستان كەيىن قازاقستاندا ءوڭىرارالىق ويىندار وتەدى ەكەن. سولارعا دا قاتىسۋدى جوسپارلاپ وتىرمىز، - دەدى قىرعىزستاننىڭ سالبۋرىن ۇلتتىق ويىنى بويىنشا باس باپكەر نۇرلان مولداحانوۆ.

سايىسقا قۇس قوسقانداردىڭ ءبىرى - جەتىسۋ وبلىسىنىڭ تۇرعىنى ابدىكەرىم تۇسەي. ول بۇل تۋرنيرگە بۇركىتىن 1 ايدان اسا باپتاعان.

سايىس جوعارى دەڭگەيدە ءوتتى. بارلىق قاتىسۋشىلار قۇسىن جاقسى باپتاپ كەلگەن. ءبىز جەتىسۋ وبلىسىنان 3 قۇس الىپ كەلدىك - ەكى بۇركىت، ءبىر يتەلگى. بۇگىن كۇن رايى قولايسىز بولىپ تۇر. دەگەنمەن، بابىندا تۇرعان قۇستار جەمتىگىن ۇستاپ، قولعا ورالىپ جاتىر، - دەيدى ابدىكەرىم تۇسەي.

تۋرنير قارشىعا، يتەلگى جانە بۇركىت سايىستارىن قامتىدى. ۇيىمداستىرۋشىلاردىڭ ايتۋىنشا، اتالعان جارىس كەلەر جىلى ەلوردادا وتەتىن دۇنيەجۇزىلىك كوشپەندىلەر ويىندارىنا قاتىساتىندار ءۇشىن دايىندىق بولماق.

وزدەرىڭىز بىلەتىندەي، كەلەر جىلى بىزدە دۇنيەجۇزىلىك كوشپەندىلەر ويىنى وتەدى. ول بۇعان دەيىن ەكى رەت قىرعىزستاندا، بىلتىر تۇركيادا ۇيىمداستىرىلدى. استانا وتەتىن دۇنيەجۇزىلىك كوشپەندىلەر ويىندارىنىڭ باعدارلاماسىندا قۇسبەگىلىك بار. بۇل سايىس سول ويىندار الدىنداعى دايىندىقتىڭ ءبىرى دەپ ايتساق بولادى، - دەپ ءمالىم ەتتى استانا قالالىق سپورت جانە دەنەشىنىقتىرۋ باسقارماسى باسشىسىنىڭ ورىنباسارى ەركەعالي كاربوزوۆ.

تۋرنير قورىتىندىسى بويىنشا قارشىعا سايىسىندا تۇركىستاندىق تولەمىرزا پاڭنىڭ «تۇيعىنى» ءبىرىنشى ورىن الدى. الماتى وبلىسىنان كەلگەن ايان سەيتجاننىڭ «كوكجەندەتى» ەكىنشى، اتىراۋلىق ارمان قوشقاروۆ باپتاعان «اقسەڭگىر» ءۇشىنشى ورىنعا يە بولدى.

ال يتەلى سايىسىندا ەلوردالىق ەراسىل سەرىكبەك ۇلىنىڭ «قاراكوزى» ۇزدىك اتاندى. ەكىنشى جانە ءۇشىنشى ورىندار قاراعاندىلىق تاڭات وسپانقۇلوۆ باپتاعان قۇستاردىڭ ەنشىسىندە.

سونىمەن بىرگە، بۇركىت سايىسىندا ءبىرىنشى ورىندى اتىراۋلىق ارمان قوشقاروۆ جەڭىپ الدى. ەكىنشى ورىن ەلوردالىق ەراسىل سەرىكبەك ۇلىنا بۇيىرسا، اقمولالىق ەرلان كەنجەتايەۆ تۇعىردا ءۇشىنشى كورىندى.