مەملەكەتتىك قىزمەتشى تابىسى تۋرالى جاريا تۇردە ەسەپ بەرەتىن بولا ما

استانا. قازاقپارات - مەملەكەتتىك قىزمەتشى تابىسى تۋرالى جاريا تۇردە ەسەپ بەرەتىن بولا ما؟ ءدال وسى ساۋالعا ۇلتتىق ەكونوميكا ۆيتسە- ءمينيسترى ازامات ءامرين جاۋاپ بەردى، دەپ حابارلايدى قازاقپارات ءتىلشىسى.

ۇكىمەت وتىرىسىنان كەيىن باق وكىلدەرىنە ۇيىمداستىرىلعان بريفينگتە جۋرناليستەر ۆيتسە- مينيستردەن: «ساياسي مەملەكەتتىك قىزمەتشىلەر مەن وزگە دە شەنەۋنىكتەردىڭ تابىستارى تۋرالى جاريا تۇردە ەسەپ بەرۋى جوسپارلانىپ وتىر ما؟» - دەپ سۇراعان ەدى.

ساۋالعا جاۋاپ بەرگەن ۆيتسە- مينيستر جالپىعا ورتاق دەكلاراتسيالاۋ كەزەڭ- كەزەڭمەن ەنگىزىلىپ جاتقانىن اتاپ ءوتتى.

«2020 -جىلدان باستاپ مەملەكەتتىك قىزمەتشىلەر ءبىرىنشى بولىپ ەسەپ بەرە باستادى. بۇل العاشقى كەزەڭ بولاتىن. ءبىز جىل سايىن دەكلاراتسيا تاپسىرامىز. كەلەسى جىلدان باستاپ كاسىپكەرلەر، ال 2025 -جىلدان باستاپ قالعان حالىقتىڭ ءبارى دەكلاراتسيا تاپسىرادى. جاريالىلىققا كەلەر بولساق، زاڭنامادا مۇنداي كوزدەلمەگەن، بەكىتىلگەن. سوندىقتان ونداي بولمايدى»، - دەدى ازامات ءامرين.