الماتى وبلىسىندا وقۋشىسى سۋيتسيد جاساماق بولعان مەكتەپكە مينيسترلىك وكىلدەرى باردى
«الماتى وبلىسىنداعى جابىرلەنۋشى بالانىڭ اناسى مەكتەپ ديرەكتورى ءىستى جابۋ ءۇشىن وزىنە اقشا ۇسىنعانىن ايتتى. قابىلداپ جاتقان شارالار وسىنداي كەلەڭسىزدىكتەردىڭ الدىن الۋعا كەپىل بولا الا ما؟» - دەپ سۇرادى ب ا ق وكىلى ورتالىق كوممۋنيكاتسيالار قىزمەتىندە وتكەن بريفينگىدە.
ۆيتسە-ءمينيستردىڭ ايتۋىنشا، اتالمىش مەكتەپتەگى جاعداي مينيسترلىكتىڭ تىكەلەي باقىلاۋىنا الىنعان.
«ءسىز ايتقان جاعدايعا كەلسەك، قۇقىق قورعاۋ ورگاندارى ءتيىستى تەرگەۋ امالدارىن باستاپ، جۇمىس جۇرگىزۋدە. ءبىزدىڭ مينيسترلىك تاراپىنان وقيعا تىركەلگەن كۇننەن باستاپ ارنايى كوميسسيا جۇمىس ىستەپ جاتىر. بۇگىن وزەرىڭىز كۋا بولعانداي، ءدال سول وقيعا بولعان مەكتەپتە مينيسترلىكتىڭ تاربيە ءىسى جونىندەگى دەپارتامەنتىنىڭ باسشىسى كەشەندى جۇمىستار ۇيىمداستىرىپ وتىر»، - دەدى ەدىل وسپان.
اتالمىش باسقارما باسشىسى تىكەلەي ەفيرگە وقيعا ورنىنان قوسىلىپ، اتقارىلىپ جاتقان جۇمىستار تۋرالى مالىمەت بەردى.
«قازىر ءبىز ءار اتا-انامەن ونىڭ ىشىندە جابىرلەنۋشى جاقپەن دە، سول ەكى بالانىڭ اتا-اناسىمەن دە كەزدەسىپ، تىكەلەي جۇمىس جۇرگىزىپ جاتىرمىز. تەرگەپ- تەكسەرۋ جۇمىستارىنىڭ قورىتىندىسىن الداعى ۋاقىتتا حابارلايمىز»، - دەدى مينيسترلىك وكىلى.
ەسكە سالساق، الماتى وبلىسىندا باستاۋىش سىنىپ وقۋشىسى ءبىر قوراپ ءدارى ءىشىپ، ومىرىمەن قوشتاسپاق بولعان ەدى.
جەرگىلىكتى پروكۋراتۋرا اتالعان ولقىلىققا جول بەرگەن سالا باسشىلارىن جازالاۋ تۋرالى ۇسىنىس ەنگىزدى.