بىزگە ورىس ءتىلى دە، اعىلشىن ءتىلى دە كەرەك - ءماجىلىس ءتوراعاسى
«ارىپتەسىڭىز رينات زايىتوۆ «قازاقستاندا ورىس ءتىلى ادەبيەتىنىڭ ساعاتىن قىسقارتۋ كەرەك. نەگە ءبىزدىڭ بالالار تەك ورىس ادەبيەتىن وقۋى كەرەك؟» دەگەن ەدى. قازىر قازاقستانداعى مەكتەپتەردە ورىس ءتىلى ءپانىنىڭ ساعاتتارىن قىسقارتۋ كەرەك پە؟»، - دەپ سۇرادى تىلشىلەر ءماجىلىس كۋلۋارىندا.
ەرلان قوشانوۆ ماجىلىستە الۋان ءتۇرلى پىكىرى بار دەپۋتاتتار جينالعانىن، ءار دەپۋتات ءوز پىكىرىن ايتۋعا قۇقىلى ەكەنىن جەتكىزدى.
«ەڭ الدىمەن بىزگە ورىس تىلىنە تىيىم سالۋ كەرەك پە، الدە مەملەكەتتىك ءتىلدى دامىتۋ كەرەك پە؟ بۇل تۋرالى بۇرىن دا پىكىرىمدى ايتقامىن. سوندىقتان ءبىز، ءبىزدىڭ بالالارىمىز، ۇرپاعىمىز نەعۇرلىم كوپ ءتىل بىلسەك، سوعۇرلىم باسقا ەلدەردىڭ تۇرعىندارىنان ءبىر دەڭگەي بيىك تۇرامىز»، - دەدى سپيكەر.
ءماجىلىس سپيكەرى سونداي- اق ورىس ءتىلى دە، اعىلشىن ءتىلى دە كەرەك، الايدا ءبىرىنشى كەزەكتە باسىمدىق مەملەكەتتىك تىلدە بولۋى كەرەك ەكەنىن جەتكىزدى.
«سوندىقتان مەكتەپ بىتىرگەن بالالارىمىز مەملەكەتتى ءتىلدى ەركىن مەڭگەرىپ شىعۋى كەرەك. ماسەلە سوندا ەمەس پە؟ مۇندا باسقا تىلدەردى وقىتۋعا كەدەرگى جوق. ءبىز باسقا تىلدەردى وقىتۋدى تومەندەتۋ ارقىلى مەملەكەتتىك ءتىلدىڭ ماسەلەسىن شەشپەۋىمىز كەرەك. ءبارىن دە دامىتۋ كەرەك، ءبىراق مەملەكەتتىك تىلگە باسىمدىقتى ساقتاۋ كەرەك»، - دەدى ول.
بۇعان دەيىن ەرلان قوشانوۆ مەكتەپكە حيدجابپەن بارۋ داۋىنا قاتىستى پىكىر ءبىلدىرىپ، مەكتەپتى ءدىني اعىمدار ورداسىنا اينالدىرماۋ تۋرالى ايتقان ەدى.