مەكتەپتى ءدىني اعىمدار ورداسىنا اينالدىرماۋ كەرەك - ءماجىلىس ءتوراعاسى حيدجاب داۋى تۋرالى
«بۇل ماسەلە جونىندە الۋان ءتۇرلى پىكىر ايتىلىپ ءجۇر. ءبىراق قازاقستان - زايىرلى مەملەكەت، كونستيتۋتسيامىزدا، باسقا زاڭدارىمىزدا انىق كورسەتىلگەن. اتا زاڭىمىز ءدىن بوستاندىعىنا شەكتەۋ قويمايدى، ءوزىنىڭ ءدىني راسىمدەرىن جاسايمىن دەۋشىلەرگە كەدەرگى جوق. الايدا مەكتەپتەردى ساياسي باعىتتار مەن ءدىني اعىمدار ورداسىنا اينالدىرۋعا بولمايدى»، - دەپ جاۋاپ بەردى ءماجىلىس ءتوراعاسى كۋلۋاردا تىلشىلەر سۇراعىنا.
ەرلان قوشانوۆ مەكتەپ - ءبىلىم ورداسى ەكەنىن، وندا ءبىلىم بەرىلۋى كەرەكتىگىن باسا ايتتى.
«سوندىقتان ءبىز بالالاردى نەمەسە وقىتۋشىلاردى باسقا ماسەلەگە الاڭداتپاۋىمىز قاجەت دەپ ويلايمىن. جانە مينيسترلىكتىڭ زاڭ بويىنشا قانداي فورما كيەتىنى تۋرالى ستاندارتتارى بار عوي. سول ستاندارتتاردى دا ۇستانۋىمىز كەرەك»، - دەدى ول.
سپيكەر بۇل تىيىمنىڭ ادامنىڭ كونستيتۋتسيالىق قۇقىعىن ەش بۇزبايتىنىن، بالالار كامەلەتتىك جاسقا تولعاندا قانداي جولمەن جۇرەتىنىن وزدەرى تاڭدايتىنىن ايتتى.
سونىمەن بىرگە، جۋرناليستەر «قازاقستان ءماجىلىسى قاشان سالافيزمگە رەسمي تىيىم سالادى؟» دەگەن سۇراق قويدى.
«بۇگىن دە دەپۋتاتىمىز «دومبىرا - حارام» دەگەن اڭگىمەگە قاتىستى ساۋال جولدادى. سوندا ءبىزدىڭ عاسىرلار بويى قولىنا دومبىرا ۇستاعان بابالارىمىز كۇناھار بولعانى ما؟ تەرىس ءدىني اعىمدا جۇرگەن، زاڭعا قايشى ارەكەت ەتىپ جۇرگەندەرگە ارينە زاڭ جۇزىندە تىيىم سالۋىمىز كەرەك»، - دەدى ءماجىلىس ءتوراعاسى.
ايتا كەتەيىك، بۇگىن ءماجىلىستىڭ جالپى وتىرىسىندا دەپۋتات امانجول ءالتاي ورتا مەكتەپتەردە ءان- كۇي ساباعىندا دومبىرا اسپابىن ۇيرەتۋدى وقۋ باعدارلاماسىنا ەنگىزۋدى ۇسىندى.