اكىم كەلدى دەپ جولدى بوگەدى: اباي وبلىسىنىڭ باسشىلىعى جۇرت شاعىمىنا جاۋاپ بەردى

سەمەي. قازاقپارات - اباي وبلىسىنىڭ اكىمدىگى الەۋمەتتىك جەلىدەگى شاعىمعا قاتىستى جاۋاپ بەردى، دەپ حابارلايدى قازاقپارات ءتىلشىسى.

11-قىركۇيەكتە الەۋمەتتىك جەلىدە اباي وبلىسىنىڭ اكىمى نۇرلان ۇرانحايەۆ سەمەي قالاسىنداعى №1-ەمحاناعا جۇمىس بارىسىمەن بارعان كەزدە ەمحانا قىزمەتكەرلەرى تۇرعىنداردىڭ جولىن بوگەپ، كولىكتەرىن اۆتوتۇراققا كىرگىزبەي قويعانى تۋرالى شاعىم تارادى.

اكىمدىك تاراپىنان ەمحاناعا كەلۋشىلەردى اۆتوتۇراق اۋماعىنا كىرگىزۋگە تىيىم سالۋ تۋرالى ەشقانداي نۇسقاۋ بەرىلگەن جوق. مەملەكەتتىك ورگان قىزمەتكەرلەرىنىڭ سالالىق مەكەمەلەرگە بارۋىنىڭ باستى ماقساتى - ولاردىڭ حالىققا كورسەتەتىن قىزمەتىنىڭ ساپاسىن جانە عيماراتتاردىڭ جاي-كۇيىن تەكسەرۋ. قازىرگى تاڭدا وقيعانىڭ ءمان-جايىن انىقتاۋ ءۇشىن تەكسەرۋ جۇمىستارى جۇرگىزىلىپ جاتىر، - دەپ حابارلادى ءوڭىر اكىمدىگىنىڭ باسپا ءسوز قىزمەتىنەن.

ەسكە سالساق، كەشە نۇرلان ۇرانحايەۆ سەمەيدەگى ەمحانا جۇمىسىمەن تانىسىپ قايتقان ەدى.