بيىل شەتەلگە ساياحاتتاعان وتانداستارىمىزدىڭ باسىنان وتكەن كەلەڭسىز جايتتار

استانا. قازاقپارات - جاز ايى كەلىسىمەن ەڭبەك دەمالىسىنا اسىعاتىن قازاقستاندىقتار شەتەلدە ءجۇرىپ قاراپايىم قاۋىپسىزدىك تالاپتارىن ورىنداماۋى ءجيى بايقالادى.

سوڭعى ءۇش ايدىڭ وزىندە عانا شەتەلگە ساياحاتتايمىن دەپ كەلەڭسىزدىككە تاپ بولىپ، ءتىپتى وكىنىشكە وراي ومىرىمەن قوش ايتىسقان وتانداستارىمىز دا بار. وسىعان وراي قازاقپارات وقىرمان نازارىنا وتانداستارىمىزدىڭ باسىنان وتكەن ەڭ رەزونانستى وقيعالاردى ۇسىنادى.

قازاقستان ازاماتتارى ءجيى ساياحاتتاپ باراتىن ەلدىڭ ءبىرى - تايلاند. ءدال وسى ەلدە جاز ايىندا بىرنەشە وتانداسىمىز تەڭىزگە شومىلامىز دەپ سۋعا باتىپ كەتتى. سونىڭ ءبىرى ارتۋر ىسقاقوۆ ماۋسىم ايىندا پحۋكەتتە سۋعا كەتكەن سۇيىكتىسىن قۇتقارعانىمەن ءوزى باتتى.

تەڭىز سۋىن كوپ جۇتىپ قويعان ونى قۇتقارۋشىلار جاعالاۋعا الىپ شىعىپ، وتە اۋىر جاعدايدا اۋرۋحاناعا دا جەتكىزگەن ەدى. وكىنىشكە وراي، دارىگەرلەر وتانداسىمىزدىڭ ومىرىنە اراشا تۇسە المادى.

دالەلدەنبەگەن دەرەككە سايكەس، ول سۇيىكتىسىن قۇتقارىپتى-مىس. مەن بۇل اقپاراتتى راستاي دا، تەرىستەي دە المايمىن. بىزدە ونى قۇتقارۋشىلاردىڭ سۋدان الىپ شىققانى، جاساندى تىنىس الدىرۋ جاساعانى جانە وقيعا ورنىنا كەلگەن دارىگەرلەرگە تابىستاعانى تۋرالى اقپارات بار. ونى اۋرۋحاناعا اپارعان. ول وتە اۋىر جاعدايدا، ەس-ءتۇسسىز بولعان. اتا-اناسى ۇشىپ باردى. كونسۋل دا بىردەن ولارمەن پحۋكەتكە باردى. سول جەردە ولار دارىگەرلەرمەن سويلەستى. تاي دارىگەرلەرى باستاپقىدان-اق ونى تاسىمالداۋعا قارسىلىق تانىتتى. بۇل جايىندا نەلىكتەن ەكەنىن قازاقستاندا جۇرگەن اپكەسى كوتەرگەن. ال كورسەتكىشتەر باسقادا بولدى. دەگەنمەن، وكىنىشكە وراي ەندى ول ارامىزدا جوق، - دەگەن ەدى وسى قايعىلى وقيعاعا قاتىستى ب ا ق وكىلدەرىنە پىكىر بىلدىرگەن سىرتقى ىستەر مينيسترلىگىنىڭ رەسمي وكىلى ايبەك سمادياروۆ.

قىركۇيەك ايىنىڭ باسىندا تاعى ءبىر وتانداسىمىز پحۋكەتتە سۋعا كەتتى. ول نەبارى 18 جاستا بولاتىن.

15 جاسىنان ەل ارالاپ، ساياحاتتاۋدى جانى سۇيگەن وتانداسىمىزدىڭ تايلاندتا جۇرگەنىنە بىرنەشە اي بولعان ەكەن.

1-قىركۇيەكتە قازاقستاننىڭ تايلاندتاعى ەلشىلىگىنە پحۋكەت ارالىندا قازاقستان ازاماتى سۋعا ءتۇسىپ، باتىپ كەتتى دەگەن اقپارات كەلىپ ءتۇستى. سول اقپاراتتى تەكسەرۋ ءۇشىن ءبىزدىڭ كونسۋل جەرگىلىكتى بيلىكتەرمەن، پوليتسيامەن بايلانىستى. ەكى كۇن ىزدەستىرۋ جۇمىستارى جۇرگىزىلدى. ءۇشىنشى قىركۇيەك كۇنى ءبىر ازاماتتىڭ دەنەسى سۋدان شىعارىلدى. ءبىراق سۋدا ەكى كۇن جاتىپ قالعاندىقتان دەنەنى تانۋ نەمەسە باسقا دا اجىراتۋ مۇمكىندىگى وتە قيىن. سوندىقتان اكە-شەشەسى بۇگىن پوليتسياعا بارىپ، تانۋ پروتسەدۋراسىنا قاتىسىپ، بالاسى ەكەنىن تانىدى، - دەگەن ەدى ايبەك سمادياروۆ.

ءدال وسى ايدا، ءدال وسى تايلاندتا قازاقستان ازاماتىنا قاتىستى تاعى ءبىر كەلەڭسىز جايت ينتەرنەت بەتىن شارلاپ كەتتى.

جاريالانعان مالىمەتتەرگە قاراعاندا، تايلاند پوليتسياسى رەسەيلىك رەستوراتورعا شابۋىل جاسادى دەگەن كۇدىكپەن وتانداسىمىز قولعا ءتۇستى.

رەسەي ب ا ق-تارىنىڭ اقپاراتىنا قاراعاندا، ۇزاق ۋاقىتتان بەرى تايلاندتا تۇراتىن رەسەيلىك رەستوراتورعا پحۋكەت اۋداندارىنىڭ بىرىندە شابۋىل جاسالعان. كولىگىندە وتىرعان زارداپ شەگۋشىنىڭ جانىنا موتوسيكل مىنگەن بەلگىسىز ادام كەلىپ، بىرنەشە رەت وق اتقاننان كەيىن وقيعا ورنىنان بوي تاسالاعان.

دەگەنمەن، قازاقستان سىرتقى ىستەر مينيسترلىگى رەسەيلىككە شابۋىل جاسالعانى جايلى اقپاراتتىڭ بولماعانىن العا تارتادى.

كەيبىر ب ا ق اقپاراتتى تەكسەرمەستەن ونى دەرەككوزىنە سىلتەپ بەرە باستادى. ءبىز اقپارات سۇرادىق، تاي بيلىگى راستادى. قازىرگى ۋاقىتتا ونىڭ كىم ەكەنى انىقتالدى. شىنىمەن دە ول - قازاقستان ازاماتى. تايلاند بيلىگى ونى 45 تاۋلىككە قاماۋعا الدى. بۇگىندە ول ازاماتقا ەلدە 4 جانە ودان دا كوپ كۇن بولعانى ءۇشىن ۆيزالىق رەجيمدى بۇزۋ ايىبى تاعىلىپ وتىر. باسقا اقپارات كەلىپ تۇسكەن جوق، - دەگەن ەدى س ءى م رەسمي وكىلى ايبەك سمادياروۆ.

تاعى دا ءبىر كەلەڭسىزدىك تە تايلاندپەن بايلانىستى. پاۆلودار قالاسىنىڭ تۇرعىنى اتالعان ەلگە بارامىن دەپ دەنگە بەزگەگىن جۇقتىرىپ كەلدى.

پاۆلودار وبلىستىق دەنساۋلىق ساقتاۋ باسقارماسىنىڭ مالىمەتىنشە، 37 جاستاعى تۇرعىن اۋرۋحاناعا 38 گرادۋسقا دەيىنگى تەمپەراتۋرا، بورتپە، ەنتىگۋ، السىزدىك، لەتارگيا، بالتىر بۇلشىقەتىنىڭ، بۋىنداردىڭ اۋىرسىنۋى سەكىلدى شاعىمدارمەن كەلگەن.

ناۋقاس ءبىر اپتا بويى ۇيىندە اۋىرعان، امبۋلاتوريالىق كەزەڭدە ەمدەۋ ناتيجە بەرمەگەن سوڭ ينفەكتسيا بولىمىنە جۇگىندى. تەكسەرۋ كەزىندە ينفەكسيونيست دارىگەرلەر ءاردايىم باسقا ەلدەرگە بارعان- بارماعانىن سۇرايدى. جىگىت وسى جاقىندا عانا تايلاندتان كەلگەن، ونى جاندىك شاعىپ الىپتى. ەر ادام شۇعىل اۋرۋحاناعا جاتقىزىلدى، كلينيكالىق جانە اسپاپتىق زەرتتەۋ جاسالدى. دياگنوز - دەنگە بەزگەگى. التىنشى كۇنى پاتسيەنت ايىعىپ، ۇيىنە شىقتى، - دەپ مالىمدەگەن ەدى ايماقتىڭ دسب.

تاعى دا ماۋسىم ايى. الەۋمەتتىك جەلىدە ZamZam Qazaqstan قاجىلىق كومپانياسى ارقىلى ۇلكەن قاجىلىققا اتتانعان قازاقستاننىڭ 380 ازاماتىنا بەرىلگەن ۆيزا قۇجاتى جالعان بولىپ شىقانى، وتانداستارىمىزدىڭ ساۋد ارابياسىندا قاماۋعا الىنعانى تۋرالى اقپارات شارلادى.

وسى مالىمەتكە قازاقستان مۇسىلماندارى ءدىني باسقارماسى دا تۇسىنىك بەردى.

بۇعان دەيىن «Zam-Zam Qazaqstan» (زاڭدى اتاۋى - Zam Zam Store) كومپانياسىنىڭ قاجىلارعا قىزمەت كورسەتۋگە قاتىستى ءتيىستى ليتسەنزياسى، وسى جىلى رەسمي قاجىلىق ورىندارىن العان تۋروپەراتورلار تىزىمىندە جوق ەكەنىن، سوندىقتان اتالعان فيرمانىڭ قىزمەتىنە مۇلدە جۇگىنبەۋ تۋرالى بىرنەشە رەت دابىل قاعىپ، مالىمدەمە جاريالانعان بولاتىن. سونىمەن قاتار، ءمۇفتيات قاجىلاردى وسىعان دەيىن الداپ، دالادا قالدىرعان اتالعان كومپانيانىڭ زاڭسىز ارەكەتتەرى تۋرالى قۇقىق قورعاۋ ورگاندارىنا شاعىم تۇسىرگەن، - دەلىنگەن حابارلامادا.

بۇل جايت مەملەكەت باسشىسى قاسىم-جومارت توقايەۆتىڭ دا نازارىنان تىس قالعان جوق.

جاقىندا ءبىر تۋريستىك كومپانيا زاڭعا باعىناتىن ءبىر توپ ازاماتتى الداپ، ولاردى قاجىلىققا جىبەرگەن. ەندى، كىناسىز ادامدار ساۋد ارابياسىنىڭ پوليتسيا ۋچاسكەسىندە قاماۋدا وتىرۋعا ءماجبۇر. وسىنداي الاياق كومپانيانىڭ زاڭعا قايشى ارەكەتى ازاماتتارىمىزدىڭ دەنساۋلىعىنا، ولاردىڭ مورالدىق جاعدايىنا جانە جالپى ەلىمىزدىڭ بەدەلىنە ۇلكەن نۇقسان كەلتىرىپ وتىر. بۇل جەردە، ارينە، ادامداردىڭ قۇقىقتىق ساۋاتسىزدىعى دا بار. ەندى، مەملەكەتىمىز، ياعني سىرتقى ىستەر مينيسترلىگى ولارعا بارىنشا كومەكتەسۋى قاجەت. ال ىشكى ىستەر مينيسترلىگى الاياق كومپانيانىڭ باسشىلىعىن، قىزمەتكەرلەرىن زاڭعا سايكەس جاۋاپقا تارتۋعا ءتيىس. ادىلەتتى قوعام قۇرامىز دەسەك، ءدال وسىنداي وزەكتى ماسەلەلەردى شەشۋىمىز كەرەك، - دەگەن ەدى ق. توقايەۆ.

ەلىمىزدىڭ سىرتقى ىستەر مينيسترلىگى دە بۇل ىسكە جەدەل ارالاسىپ، سونىڭ ارقاسىندا وتانداستارىمىز بوساتىلدى.

وتانداستارىمىز ءجيى ساياحاتتايتىن ەلدەردىڭ تاعى ءبىرى - تۇركيا. بۇل ەلگە ساياحاتتاعان تۋريستەرىمىز دە كەلەڭسىزدىكتەرگە تاپ بولىپ جاتادى.

ايتالىق، 30-شىلدە كۇنى تاڭەرتەڭ الانياداعى Okurcalar Mahallesi D-400 تراسساسىندا قازاقستاننىڭ 12 ازاماتى مىنگەن شاعىن اۆتوبۋس جۇك كولىگىنە سوقتىعىستى.

وقيعا سالدارىنان كولىك جۇرگىزۋشى مەن گيد (ۋكراينا ازماتى) سول ەردە مەرت بولدى. ورتاشا اۋىر جاراقات العان 2 وتانداسىمىزعا وتا جاسالدى. قالعان 10 وتانداسىمىزدىڭ، ونىڭ ىشىندە 4 بالانىڭ جاعدايى قاناعاتتانارلىق، ومىرىنە ەش قاۋىپ تونگەن جوق.

وكىنىشكە وراي، تۇركيانىڭ ءدال وسى قالاسىندا 4-قىركۇيەك كۇنى سافاري-كولىك پەن جەڭىل اۆتوموبيلدىڭ سوقتىعىسۋى سالدارىنان جۋرناليست، «زەيىن اتىراۋ» ەرەكشە بالالاردى وڭالتۋ ورتالىعىنىڭ نەگىزىن قالاعان ارايلىم باعىتجان مەن 2 جاسارى قىزى وقيعا ورنىندا قايتىس بولدى.

وتاعاسى جانساقتاۋ بولىمىنە تۇسكەنىمەن دارىگەرلەر ونى امان الىپ قالا المادى.

ايتا كەتەرلىگى، 31-تامىزدا تۇركيانىڭ بۋرسا قالاسىندا 1993 -جىلى تۋعان قازاقستاندىق ايەل تۇرىك ازاماتىن ءولتىردى دەگەن كۇدىكپەن ۇستالىپ، قازىر تەرگەۋ ءجۇرىپ جاتىر.

بۇگىن سىرتقى ىستەر مينيسترلىگىنىڭ رەسمي وكىلى ايبەك سمادياروۆ اتالعان وتانداسىمىزدى ەكستراديتسيالاۋ مۇمكىندىگىنە پىكىر بىلدىرگەن ەدى.

ەڭ الدىمەن بۇل ماسەلە كونسۋلدىق جەلى ارقىلى تالقىلانادى. ەكىنشىدەن، ەگەر ادام قىلمىس جاساسا نەمەسە قىلمىس جاساۋ كۇدىگىنە ىلىگىپ، ءالى تەرگەۋدە بولسا، وندا ەكستراديتسيالاۋ جايىندا ءسوز قوزعالمايدى. ۇكىم جاريالانىپ، زاڭدى كۇشىنە ەنگەننەن كەيىن عانا ەكستراديتسيالانادى، - دەدى ايبەك سمادياروۆ.

وسى جىلى وڭتۇستىك كورەيادا دا قازاقستان ازاماتتارىنىڭ قاتىسۋىمەن جايسىز جايتتار ورىن العانى بەلگىلى.

ماسەلەن، ناۋرىزدا كورەيا رەسپۋبليكاسىنا كىرۋگە رۇقسات بەرىلمەگەن قازاقستاننىڭ ەكى ازاماتى ينچحون حالىقارالىق اۋەجايىنان زاڭسىز قاشىپ كەتكەن بولاتىن.

ارتىنان ەكەۋى دە ۇستالىپ تۇرمەگە توعىتىلدى. ابىروي بولعاندا ەكى جەرلەسىمىز دە ايىپپۇل تولەپ ەلگە ورالدى. مۇنى ولاردىڭ ادۆوكاتى مەيىرجان شەكەيەۆ Instagram جەلىسىندە جازعان بولاتىن.

بۇل - قازاقستاننىڭ حالىقارالىق تاعى ءبىر بەدەلدى جەڭىسى. ەندى كورەياداعى ەكى جىگىت 3 جىلعا تۇرمەگە توعىتىلماي، ايىپپۇل تولەپ، ەلگە قايتاتىن بولدى. ايتار، جازار نارسەلەر وتە كوپ. ءبىراق ءالى بىتىرەتىن شارۋالار جەتىپ جاتىر. اللا قالاسا اماندىقتا جۇزدەسەيىك، - دەگەن ەدى قورعاۋشى.

وڭتۇستىك كورەياداعى قازاقستان ازاماتتارىنا قاتىستى تاعى ءبىر وقيعا - ايەل ادامنىڭ سەۋلدە اۆتوبۋس جۇرگىزۋشىسىنە پىشاقپەن شابۋىل جاساۋى.

جاقىندا سەۋلدەن ءبىزدىڭ ازاماتىمىز جەرگىلىكتى تۇرعىنعا شابۋىل جاسادى دەگەن اقپارات الدىق. ماسەلەنىڭ ءمان-جايىن انىقتادىق. ول ايەلدىڭ ۇلتى كارىس، كۇيەۋى ەكەۋى كورەيادا ۇزاق جىلدار بويى تۇرىپ كەلەدى. وعان ەتنيكالىق ۆيزا بەرگەن جانە بيزنەسپەن اينالىسقان. 2020 -جىلدان بەرى ارنايى اۋرۋحانادا ستاتسيونارلىق ەم الىپ كەلگەن. وقيعا بولعاندا دا دارىلىك پرەپارات ىقپالىندا بولۋى مۇمكىن، - دەپ تۇسىندىرگەن ەدى وسى جايتتى س ءى م رەسمي وكىلى ايبەك سمادياروۆ.

وتانداستارىمىزعا قاتىستى رەزونانستى وقيعا بولگاريادا وتكەن جاسوسپىرىمدەر اراسىنداعى فۋتبول تۋرنيرىندە ورىن الدى.

Facebook قولدانۋشى ماعجان بەيىمبەتوۆتىڭ جازۋىنا قاراعاندا، بولگار كومانداسىنداعى فۋتبولشىنىڭ اتا- اناسى قازاقستاندىق بالانى ۇرىپ جىبەرگەن.

بۇل وقيعانى ەلىمىزدىڭ سىرتقى ىستەر مينيسترلىگى كەز كەلگەن سپورتتىق ماتچ كەزىندە بولاتىن جانجال دەپ باعالادى.

وندا جاسوسپىرىمدەر چەمپيوناتى بولعان، ءبىزدىڭ ءۇش-ءتورت جەكە كوماندامىز بارعان. ولار سىرتقى ىستەر مينيسترلىگىنە دە، ەلشىلىككە دە حابار بەرمەگەن. الايدا، ءبىزدىڭ ديپلوماتتار ءوز جاردەمىن ۇسىندى، وقيعا ورنىنا جەرگىلىكتى پوليتسيا باردى. ءار تاراپ ءوز تۇسىندىرمەلەرىن بەردى. ءبىر-بىرىنە ەش كىنارات قويماعاندىقتان، تاراپتار ءوزارا ىمىراعا كەلىپ، ەش ارىز جازىلعان جوق، - دەپ تۇسىندىرگەن ەدى س ءى م رەسمي وكىلى ايبەك سمادياروۆ.

اۆتور:

مارلان جيەمباي