جاڭادان قۇرىلعان سۋ رەسۋرستارى جانە يرريگاتسيا مينيسترلىگى نەمەن اينالىسادى

استانا. قازاقپارات - جاڭادان قۇرىلاتىن سۋ رەسۋرستارى جانە يرريگاتسيا مينيسترلىگىنىڭ قىزمەت باعىتى مەن ەرەجەلەرىن بەكىتۋدى كوزدەيتىن ۇكىمەت قاۋلىسى اشىق تالقىعا شىعارىلدى، دەپ حابارلايدى قازاقپارات ءتىلشىسى.

سۋ رەسۋرستارى جانە يرريگاتسيا مينيسترلىگى سۋ قورىن پايدالانۋ جانە قورعاۋدى باقىلاۋ، سۋمەن جابدىقتاۋ، سۋ بۇرۋ، يرريگاتسيا جانە گيدروگەولوگيا سالالارىنداعى باسقارۋ پروتسەستەرىن ۇيلەستىرۋ، مەملەكەتتىك ساياساتتى قالىپتاستىرۋ جانە ىسكە اسىرۋ سالالارىندا باسشىلىقتى جۇزەگە اسىراتىن قازاقستان رەسپۋبليكاسىنىڭ مەملەكەتتىك ورگانى سانالادى، - دەلىنگەن ۇكىمەت قاۋلىسىندا.

قۇجاتتا كورسەتىلگەندەي، ۆەدومستۆونىڭ قۇرامىنا جالعىز سۋ شارۋاشىلىعى كوميتەتى عانا كىرەدى.

سۋ رەسۋرستارى جانە يرريگاتسيا مينيسترلىگىنىڭ قىزمەت باعىتتارى كەلەسىدەي:

- سۋ قورىن پايدالانۋدى رەتتەۋ، سۋمەن جابدىقتاۋ، سۋ بۇرۋ سالاسىندا مەملەكەتتىك ساياساتتى قالىپتاستىرۋ جانە ىسكە اسىرۋ، مەملەكەتتىك باسقارۋ جۇيەسىن جەتىلدىرۋ؛

- مينيسترلىكتىڭ قۇزىرەتىنە جاتقىزىلعان قىزمەت سالاسىنداعى مەملەكەتتىك ساياساتتى ىسكە اسىرۋ جونىندەگى ورتالىق جانە جەرگىلىكتى اتقارۋشى ورگانداردىڭ قىزمەتىن ۇيلەستىرۋدى جۇزەگە اسىرۋ؛

- ءوز قۇزىرەتى شەگىندە حالىقارالىق ىنتىماقتاستىق ماسەلەلەرى بويىنشا مەملەكەتتىك ساياساتتى ىسكە اسىرۋ؛

- سۋ رەسۋرستارىن ساقتاۋ، ۇتىمدى پايدالانۋ جانە قالپىنا كەلتىرۋ؛

- رەتتەلەتىن سالادا مەملەكەتتىك باسقارۋ جانە مەملەكەتتىك باقىلاۋ مەن قاداعالاۋدى قامتاماسىز ەتۋ؛

- سۋ رەسۋرستارىن باسقارۋ سالاسىنداعى زاڭنامانى جەتىلدىرۋ.

مينيسترلىكتىڭ جانە وعان باعىنىستى ۆەدومستۆولاردىڭ قاراماعىنا مىنا ۇيىمدار ەنەدى:

- سۋ رەسۋرستارىن پايدالانۋدى رەتتەۋ جانە قورعاۋ جونىندەگى «ارال- سىرداريا باسسەيندىك ينسپەكسياسى» رەسپۋبليكالىق مەملەكەتتىك مەكەمەسى (ر م م)؛

- سۋ رەسۋرستارىن پايدالانۋدى رەتتەۋ جانە قورعاۋ جونىندەگى «بالقاش- الاكول باسسەيندىك ينسپەكسياسى» ر م م؛

- سۋ رەسۋرستارىن پايدالانۋدى رەتتەۋ جانە قورعاۋ جونىندەگى «ەرتىس باسسەيندىك ينسپەكسياسى» ر م م؛

- سۋ رەسۋرستارىن پايدالانۋدى رەتتەۋ جانە قورعاۋ جونىندەگى «ەسىل باسسەيندىك ينسپەكسياسى» ر م م؛

- سۋ رەسۋرستارىن پايدالانۋدى رەتتەۋ جانە قورعاۋ جونىندەگى «نۇرا- سارىسۋ باسسەيندىك ينسپەكسياسى» ر م م؛

- سۋ رەسۋرستارىن پايدالانۋدى رەتتەۋ جانە قورعاۋ جونىندەگى «توبىل- تورعاي باسسەيندىك ينسپەكسياسى» ر م م؛

- سۋ رەسۋرستارىن پايدالانۋدى رەتتەۋ جانە قورعاۋ جونىندەگى «جايىق- كاسپيي باسسەيندىك ينسپەكسياسى» ر م م؛

- سۋ رەسۋرستارىن پايدالانۋدى رەتتەۋ جانە قورعاۋ جونىندەگى «شۋ- تالاس باسسەيندىك ينسپەكسياسى» ر م م؛

- «قازاگرومەليوسۋشار» رەسپۋبليكالىق ادىستەمەلىك ورتالىعى.

ۇكىمەت قاۋلىسىنىڭ جوباسى 26-قىركۇيەككە دەيىن كوپشىلىك تالقىلاۋدا بولادى. كەيىن قول قويۋ ءۇشىن پرەمەر- مينيسترگە جولدانادى.

ەسكە سالايىق، 1-قىركۇيەكتە مەملەكەت باسشىسىنىڭ جارلىعىمەن 5 جاڭا مينيسترلىك قۇرىلدى. ونىڭ ىشىندە سۋ رەسۋرستارى جانە يرريگاتسيا مينيسترلىگى دە بار.

ارتىنشا وسى كەزگە دەيىن جامبىل وبلىسىنىڭ اكىمى قىزمەتىن اتقارىپ كەلگەن نۇرجان نۇرجىگىتوۆ اتالعان ۆەدومستۆوعا باسشى بولىپ تاعايىندالدى.