اتىراۋدىڭ ءبىر مەكتەبى ونلاينعا كوشىپ، تاعى ءبىرى سەنبىدە وقيتىن بولدى

اتىراۋ. قازاقپارات - اتىراۋ قالاسىنداعى ءبىر مەكتەپتە سەيسەنبىنىڭ ساباعى ونلاين فورماتقا كوشىرىلدى.

ال ەكىنشى ءبىلىم ورداسىنداعى ساباق سەنبىگە اۋىستىرىلدى، دەپ حابارلايدى قازاقپارات ءتىلشىسى.

«اتىراۋ وبلىسى سۋ ارناسى» كوممۋنالدىق مەملەكەتتىك كاسىپورنىنىڭ باسپا ءسوز قىزمەتىنىڭ مالىمەتىنشە، 12-قىركۇيەكتە مۇنايلى شاھاردىڭ كەيبىر بولىگىنە سۋىق سۋ ۋاقىتشا بەرىلمەيدى.

«اتىراۋ قالاسىنىڭ قۇرمانعازى كوشەسىندەگى ءدارىحانا باسقارماسىنىڭ عيماراتىنان «توقاش» دۇكەنىنىڭ ماڭايىنداعى ك. مادەنوۆ كوشەسىنە دەيىنگى اۋماقتا ديامەترى 600 م م قۇبىر جاپقىشىن اۋىستىرۋ جۇمىسى جۇرگىزىلەدى. وسىعان بايلانىستى 12-قىركۇيەكتە جەرگىلىكتى ۋاقىتپەن ساعات 10:00-دەن 18:00-گە دەيىن كەيبىر مەكەنجايلارعا سۋىق سۋ بەرۋ ۋاقىتشا توقتاتىلادى»، - دەپ ءمالىم ەتتى كاسىپورىننان.

وسىعان بايلانىستى «لەسحوز»، «نۇرسايا» جانە «سامال» شاعىن اۋداندارىنداعى 15 تۇرعىن ءۇي كەشەنى مەن جەكە يەلىكتەگى ۇيلەردىڭ تۇرعىندارى سالقىن سۋسىز وتىرادى. سونداي-اق بىرنەشە كەڭسە مەن «سارايشىق» كوممۋنالدىق بازارىنا، 3 مەكتەپ پەن 2 بالاباقشاعا، 1 كوللەدجگە سۋ بەرىلمەيتىنى بەلگىلى بولىپ وتىر.

نازاربايەۆ زياتكەرلىك مەكتەبى مەن ءال-فارابي اتىنداعى ءبىلىم ورداسىنىڭ اكىمشىلىگى ءبىرىنشى اۋىسىمداعى ساباقتىڭ ونلاين فورتماتقا كوشىرىلگەنىن حابارلادى.

«تەحنيكالىق سەبەپكە بايلانىستى سۋ بولمايدى. سول سەبەپتەن، مەكتەبىمىزدىڭ ءبىرىنشى اۋىسىمى ونلاين فورماتتا وقيدى دەگەن شەشىم قابىلداندى. ال ەكىنشى اۋىسىم بويىنشا شەشىم تاڭەرتەڭگى جاعدايعا بايلانىستى قابىلدانادى»، - دەلىنگەن ءال-فارابي اتىنداعى مەكتەپتىڭ اكىمشىلىگى تاراتقان اقپاراتتا.

ال نازاربايەۆ زياتكەرلىك مەكتەبىندە سەيسەنبىدە ساباق وتكىزبەۋگە شەشىم قابىلدانعان. بۇل كۇنگى ساباق سەنبىگە اۋىستىرىلدى.