فۋتبولشىلارىمىزدى جانە جاستارىمىزدى ماقتان تۇتامىن - توقايەۆ

استانا. قازاقپارات - مەملەكەت باسشىسى قاسىم-جومارت توقايەۆ قازاقستان ۇلتتىق قۇراماسىنىڭ جەڭىسى تۋرالى جىلى لەبىزىن ءبىلدىرىپ، ەلوردالىق ەرىكتىلەر مەن بەلسەندىلەرگە العىس ايتتى، دەپ حابارلايدى قازاقپارات اقورداعا سىلتەمە جاساپ.

پرەزيدەنت قاسىم-جومارت توقايەۆ ءوزىنىڭ Instagram-پاراقشاسىندا قازاقستان ۇلتتىق قۇراماسىنىڭ جەڭىسى تۋرالى جازبا جاريالادى.

«ءبىزدىڭ ۇلتتىق قۇرامانىڭ سولتۇستىك يرلانديانىڭ مىقتى كومانداسىمەن الاڭداعى كەزدەسۋىن قىزىعا تاماشالادىم. ويىن وتە قىزىقتى ءارى تارتىستى ءوتتى. قازاق فۋتبولشىلارى قارسىلاس كومانداعا توتەپ بەرىپ، 1:0 ەسەبىمەن لايىقتى جەڭىسكە قول جەتكىزدى. قازاقستان ۇلتتىق قۇراماسى جانە ولاردىڭ مىڭداعان جانكۇيەرلەرى ءۇشىن قۋانىشتىمىن.

اسىرەسە «استانا جاستارى» مەن باسقا دا ۇيىمدار ەرىكتىلەرىنىڭ، سونداي- اق جەكەلەگەن ازاماتتاردىڭ، بەلسەندىلەردىڭ ۇلگى الارلىق ءىسىن ايرىقشا اتاپ وتكىم كەلەدى. ولار ويىننان سوڭ ستاديوندا قالىپ، تريبۋناداعى قوقىستى جيناپ شىقتى.

فۋتبولشىلارىمىزدى جانە جاستارىمىزدى ماقتان تۇتامىن»، - دەپ جازدى مەملەكەت باسشىسى.

ەسكە سالايىق، قازاقستان - سولتۇستىك يرلانديا ماتچى 10-قىركۇيەك كۇنى ەلورداداعى «استانا - ارەنا» ستاديونىندا ءوتتى. ويىن 1:0 ەسەبىمەن ق ر قۇراماسىنىڭ پايداسىنا اياقتالدى.

ماتچتان كەيىن مەملەكەت باسشىسى ق. توقايەۆ فۋتبولشىلاردى ارنايى قۇتتىقتاپ، كيىنۋ بولمەسىنە باردى.