فۋتبولدان ۇلتتىق قۇرامانىڭ باس باپكەرى قازاقستان ازاماتتىعىن الا ما

استانا. قازاقپارات - سولتۇستىك يرلاندياعا قارسى ماتچ الدىنداعى باسپا ءسوز ءماسليحاتىندا ەل قۇراماسىنىڭ باس باپكەرى ماگومەد اديەۆ قازاقستان ازاماتتىعىن الۋ ۇسىنىسىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«ازاماتتىققا كەلەتىن بولساق، بۇل باعىتتا اڭگىمەلەر ءالى جالعاسۋدا. ءبىز سويلەسىپ جاتىرمىز جانە فەدەراتسيا باسشىلىعى مەنىڭ ازاماتتىق العانىمدى قالايدى، ونى الۋىما باستاما جاساعىسى كەلەدى. ءبىراق ءبىز بۇل ماسەلەنى كەيىنگە قالدىرىپ، قازىر ويىندارعا دەن قويىپ وتىرمىز. ەندى ماتچتان كەيىن كورەيىك. مەن ۇتىلا باستاسام ازاماتتىق بىلاي تۇرسىن، ەلدەن قۋادى»، - دەدى ماگومەد اديەۆ ب ا ق وكىلدەرىنىڭ ساۋالىنا جاۋاپ بەرە وتىرىپ.

سونداي-اق باس باپكەر سولتۇستىك يرلانديامەن ماتچ الدىندا قازاقستان قۇراماسىنىڭ ساپىندا وزگەرىس جاسالاتىنىن ايتتى.

قازاقستان - سولتۇستىك يرلانديا ويىنى 10-قىركۇيەك كۇنى ەلورداداعى «استانا- ارەنا» ستاديونىندا وتەدى. باستالۋى - ساعات 19.00-دە. كەزدەسۋدى «Qazsport» تەلەارناسىنان، سونداي-اق ەكسپو اۋماعىنداعى جازعى ساحنادان تىكەلەي كورۋگە بولادى.

ەسكە سالايىق، 7-قىركۇيەكتە قازاقستان فۋتبول قۇراماسى 2024 -جىلعى ەۋروپا چەمپيوناتىنا ىرىكتەۋ تۋرنيرى اياسىندا فينليانديا قۇراماسىمەن كەزدەسىپ، 0:1 ەسەبىمەن جەڭىلىپ قالعان ەدى.