سولتۇستىك يرلاندياعا قارسى ماتچتا قازاقستان قۇراماسىندا وزگەرىس بولادى

استانا. قازاقپارات - قازاقستان قۇراماسىنىڭ باس باپكەرى ماگومەد اديەۆ ماتچ الدىنداعى باسپا ءسوز ءماسليحاتىندا سولتۇستىك يرلاندياعا قارسى ويىنعا دايىندىق تۋرالى ايتتى، دەپ حابارلايدى قازاقپارات ءتىلشىسى.

وزگەرىستەر بولادى، ءبىز مۇنى فينلياندياعا دەيىن تۇسىندىك. ءار ويىن بەلگىلى ءبىر تۇزەتۋلەر ەنگىزۋدى قاجەت ەتەتىنى انىق. تيىسىنشە سوڭعى ويىن وسىعان يتەرمەلەدى. نەگىزىندە، بۇل جوسپارلانعان وزگەرىستەر. العاشقى مينۋتتاردا الاڭعا كىم شىعادى، ولاردى كىم الماستىرادى - ولار بىزدە جوسپارلانعان. ءبىز ءۇشىن قارقىنىمىزدان ايىرىلىپ قالماۋ ماڭىزدى. قازىر ءتىپتى سىرت الاڭدارداعى ويىنداردىڭ الدىندا بولعان دەڭگەيدە ەمەسپىز. ءبىز مەجەلى جوسپارلارعا ءسال جەتپەي قالىپ جۇردىك. ونى ەسكەرەمىز، قارقىندى باسەڭدەتپەي، ويىندى قالىپتى دارەجەدە ۇستاۋعا تىرىسامىز، - دەپ مالىمدەدى ماگومەد اديەۆ باق وكىلدەرىنىڭ ساۋالىنا جاۋاپ بەرە وتىرىپ.

قازاقستان مەن سولتۇستىك يرلانديا قۇرامالارىنىڭ ويىنى 10-قىركۇيەك كۇنى ەلورداداعى «استانا- ارەنا» ستاديونىندا وتەدى. باستالۋى - ساعات 19.00 دە. كەزدەسۋدى «Qazsport» تەلەارناسىنان، سونداي-اق ەكسپو اۋماعىنداعى جازعى ساحنادان تىكەلەي كورۋگە بولادى.

ەسكە سالايىق، 7-قىركۇيەكتە قازاقستان فۋتبول قۇراماسى 2024 -جىلعى ەۋروپا چەمپيوناتىنا ىرىكتەۋ تۋرنيرى اياسىندا فينليانديا قۇراماسىمەن كەزدەسىپ، 0:1 ەسەبىمەن جەڭىلىپ قالعان ەدى.

قازاقستاننىڭ كاسىپقوي بوكسشىسى گەننادي گولوۆكين فۋتبولدان اتالعان ماتچتا ەل قۇراماسىنا قولداۋ ءبىلدىرۋ ءۇشىن نيۋ-يوركتەن استاناعا ۇشىپ شىققانىن جازعان بولاتىن.