قۇقىق قورعاۋشى: قايرات ساتىبالدىعا تۇرمەدە ەشقانداي ارتىق جاعداي جاسالماعان

استانا. قازاقپارات - «ءبىز ازاپتاۋعا قارسىمىز» قوعامدىق ۇيىمى باسشىسىنىڭ ورىنباسارى باۋىرجان مۋسين وسكەمەندەگى قۇقىق قورعاۋ ورگاندارىنىڭ بۇرىنعى قىزمەتكەرلەرىنە ارنالعان 22№ قىلمىستىق-اتقارۋ مەكەمەسىنە بارىپ، قايرات ساتىبالدىنىڭ قانداي جاعدايدا وتىرعانىن كورىپ قايتقانىن ايتادى، دەپ حابارلايدى قازاقپارات ءتىلشىسى.

«ول مەكەمەدە قايرات ساتبالدى وتىر. وعان VIP- جاعدايلار جاسالعانى تۋرالى وسەك ايتىلىپ جاتادى عوي، سونىڭ راس-وتىرىگىن بىلگىم كەلدى. ول دا وزگەلەر سياقتى جازاسىن وتەپ جاتىر»، - دەدى باۋىرجان مۋسين.

ونىڭ ايتۋىنشا، قايرات ساتىبالدى وزگە سوتتالۋشىلارعا قاراعاندا قاتاڭ باقىلاۋدا.

«وعان ەشقانداي ارتىق جاعداي جاسالماعان. مەن ونىڭ تارتىپكە ساي جۇرگەنىن كورىپ، وسىنىڭ ءبارىن ءبىز كەلگەندىكتەن ادەيى ىستەپ وتىرسىز با»، - دەپ سۇرادىم. «بۇل مەنىڭ تاڭداۋىم» دەپ جاۋاپ بەردى. ياعني، ول زاڭدى بەرىك ساقتاپ وتىر»، - دەدى قۇقىققورعاۋشى.