نۇرلان يمام دومبىرانى حارامعا تەڭەگەن ۋاعىزشى ايەلگە جاۋاپ بەردى

استانا. قازاقپارات - الەۋمەتتىك جەلىدە حيدجابتاعى ايەلدىڭ دومبىرانى حارام زاتتار قاتارىنا جاتقىزعانى تۋرالى ۆيدەو تارادى.

اتالعان ۋاعىزعا قاتىستى يمام نۇرلان بايجىگىت ۇلى پىكىر ءبىلدىردى، دەپ جازادى KAZ. NUR. KZ.

«اقىركەتتە ۇلتىمىزبەن، ۇلتشىلدىعىمىزبەن وتپەيمىز. يمانىمىزبەن، نەكەمىزبەن وتەمىز. مەن دومبىراعا 5 جىل قاتىستىم. مەنىڭ دومبىرا تارتقانىم YouTube تە ءجۇر. مەكتەپ كەزىندە ءدىن تۋرالى بىلگەن جوقپىن. كۇنى كەشەگە دەيىن دومبىرا تارتتىم. ءبىراق دومبىرا - حارام. جۇرەككە ءتيدى، كىر ەكەنىڭ بىلىنەدى»، - دەيدى ۆيدەوداعى حيدجاب كيگەن ايەل.

وسىعان قاتىستى بەلگىلى يمام، نۇرلان قاجى بايجىگىت ۇلى پىكىر ءبىلدىردى.

«جالپى، قازىر سونداي بولىپ كەتتى. كەيبىر ادامدارىمىز شەكتەن شىعىپ، ءدىندى تەرىس ءتۇسىنىپ، ءوزىنىڭ ويىنا سالىپ ءتۇسىنىپ، سالتىمىزدى، سانامىزدى، تالاي عاسىردان بەرى كەلە جاتقان قۇندىلىقتاردى اياققا تاپتاپ، دومبىرانى ارام دەپ، وعان ءتىل تيگىزىپ ءجۇر. كەزىندە ابايدى اداسقان، شاكارىمدى شاتاسقان دەپ تە ايتتى. سودان وتتىك پە دەگەندە، شەتەلدىڭ، باسقا دا مەملەكەتتەردىڭ، كاۆكازدىڭ كوشەدە جۇرگەن ۋاعىزشىلارىن تىڭداعاننان تۋعان ۇلكەن قاتەلىك بۇل. ءبىز وسىمەن ەل بولىپ، حالىق بولىپ، كۇرەسۋىمىز كەرەك. جاستار بولىپ كۇرەسۋىمىز كەرەك. حالقىمىزدىڭ سالت-ءداستۇرىن ساقتاپ قالۋىمىز كەرەك. دومبىرا، قىرعىزدىڭ قومىزى - بۇل ۇلتتىق اسپاپتارىمىز. كەرەك دەسەڭىز، ءدىننىڭ ناسيحاتتالىپ، يماندىلىقتىڭ تارالۋىنا، سابىردىڭ ورىن الۋىنا، اتا-انانى قۇرمەتتەۋگە الىپ كەلگەن بۇل اسپاپتار. سەبەبى اتا-بابالارىمىز مۇنى جىرمەن، تەرمەمەن جەتكىزگەن. دارەجەسى - ۇلىق. سوندىقتان «ناعىز قازاق - قازاق ەمەس، ناعىز قازاق – دومبىرا»، - دەدى نۇرلان يمام.