دەپۋتات ازات پەرۋاشەۆ قانشا ايەلى بارىن ايتتى

استانا. قازاقپارات - وزبەكستان پارلامەنتى كوپ ايەل الۋعا جانە بۇركەنىپ جۇرۋگە تىيىم سالاتىن زاڭ قابىلدادى. قازاقستاندا ءدال وسىنداي زاڭ قابىلدانۋى كەرەك پە؟ سەبەبى كەيىنگى كەزدە ءبىزدىڭ ەلدە نيكاپ كيىپ الاتىن ايەل كوبەيدى.

«اق جول» پارتياسىنىڭ ءتوراعاسى، ءماجىلىس دەپۋتاتى ازات پەرۋاشەۆ قازاق قوعامى اشىق ەكەنىن ەسكەرتتى. ونىڭ ايتۋىنشا، بىزدە مۇنداي اعىم كوپ ەمەس، - دەپ حابارلايدى Massaget.kz ءتىلشىسى.

ازات پەرۋاشەۆ بۇل تۋرالى ءماجىلىس وتىرىسىنىڭ كۋلۋارىندا ايتتى.

«ءبىراق ولار ودان ارى كۇشەيسە، ونداي شەكتەۋلەرگە بىزدە بارۋىمىز كەرەك بولادى. سەبەبى ونىڭ بەلگىلەرى بار. مەنىڭشە، ءبىز زايىرلى مەملەكەت قۇرىپ جاتىرمىز، زايىرلى ەلدە، ەڭ الدىمەن، وركەنيەتتى قۇندىلىقتاردى قورعاۋىمىز كەرەك. مىسالى، مەن «مەكتەپتە حيدجابقا تىيىم سالۋ كەرەك» دەگەن پىكىردى قولدايمىن. الاش ارىستارىنىڭ نەگىزگى تالاپتارىنىڭ ءبىرى ءبىلىم سالاسىن دىننەن ايىرىپ، زايىرلى ۇستانىمدا قالدىرۋ بولاتىن. ءبىزدىڭ دە ۇستانىم - ءبىلىم سالاسىن دىننەن جانە قانداي دا ءبىر اعىمداردان الشاق بولۋىنا كۇش سالۋ»، - دەدى ول.

كوپشىلىكتىڭ اراسىندا «دەپۋتاتتاردىڭ ەكى ايەلى بار» دەگەن ءازىل ءجيى ايتىلادى. ون جىلدان اسا دەپۋتات بولىپ وتىرعان ازات تۇرلىبەك ۇلى قانشا ايەلى بارىن جاسىرمادى.

«قۇدايعا شۇكىر، ءبىر ايەلىم بار. ءبىز كەيدە ونى قالجىڭداپ ايتامىز. جۋىردا تۇركىستان وبلىسىندا حالىقپەن كەزدەسكەن كەزدە ءبىر اقساقال «مەن 17 بالانىڭ اكەسىمىن. ايەلىمنىڭ «باتىر انا» دەگەن اتاعى بولعان سوڭ ءتۇرلى جەڭىلدىگى بار. مەنىڭ ۇلەسىمسىز 17 بالا تۋماس ەدى عوي. ماعان نەگە جەڭىلدىك بەرمەيسىزدەر؟» دەپ تالاپ قويدى. مەنىڭ ويىمشا، مۇنى جۇرت قالجىڭ رەتىندە قابىلدايدى. ءبىراق ءبىز زايىرلى، وركەنيەتتى جولدا قالۋىمىز كەرەك»، - دەپ تۇيىندەدى دەپۋتات.