كوكشەتاۋ مەكتەبىندە وقۋشىلار كەپتەلىسى تۋىنداپ، باسشىلىعى تارتىپتىك جازاعا تارتىلدى
كوكشەتاۋ قالاسىنىڭ №1 مەكتەپ- گيمنازياسىنداعى جاعدايدىڭ ۆيدەوسى الەۋمەتتىك جەلىدە جەلدەي ەستى. وقۋشىلار وقۋ ورنىنىڭ دالىزىندە قىسىلىسىپ قالعان. قىسىمنان كەيبىر بالالار ەدەنگە قۇلاعان. وسى ماسەلە بويىنشا قازاقپارات ءتىلشىسىنىڭ ساۋالىنا اقمولا وبلىسى ءبىلىم باسقارماسىنىڭ باسپا ءسوز قىزمەتى جاۋاپ بەردى.
ۆەدومستۆونىڭ باسپا ءسوز قىزمەتىنىڭ مالىمەتىنشە، كوكشەتاۋ قالالىق №1 مەكتەپ- گيمنازياسىندا ەكى اۋىسىمدا 2 866 بالا وقيدى. ءبىلىم بەرۋ ۇيىمى ءۇش اۋىسىمنىڭ قاتارىنا جاتپايدى. ساباقتار شتاتتىق رەجيمدە ءوتىپ جاتىر.
«الەۋمەتتىك جەلىلەردە جاريالانعان روليكتەن كەيىن اقمولا وبلىسىنىڭ ءبىلىم باسقارماسى قىزمەتتىك تەرگەۋ جۇرگىزدى. بۇل دەرەك ساباقتار اياقتالعاننان كەيىن، مەكتەپ دالىزىنە بارلىق سىنىپ وقۋشىلارى وقۋ كابينەتتەرىنەن ءبىر ۋاقىتتا شىققان كەزدە تۋىنداعانى انىقتالدى.
قازىرگى ۋاقىتتا مەكتەپ اكىمشىلىگى وقۋشىلاردىڭ ۇزىلىسكە شىعۋ جانە ساباقتان شىعۋ كەستەسىن رەتتەدى. قاجەتتى شارالاردى ۋاقتىلى قابىلداماعان مەكتەپ باسشىلىعى تارتىپتىك جازاعا تارتىلدى»، - دەدى باسقارمانىڭ باسپا ءسوز قىزمەتىنەن.