لەنين ەسكەرتكىشىن جوندەۋگە اقشا بولگەن التاي اۋدانىنىڭ اكىمى ءوز ەركىمەن قىزمەتىنەن كەتتى

وسكەمەن. قازاقپارات - شىعىس قازاقستان وبلىسى التاي اۋدانىنىڭ اكىمى ەرنار مۇستافين ءوز ەركىمەن قىزمەتىن بوساتتى، دەپ حابارلايدى قازاقپارات ءتىلشىسى.

ەرنار مۇستافين 2022 -جىلدىڭ قىركۇيەك ايىندا التاي اۋدانىنىڭ اكىمى بولىپ تاعايىندالعان بولاتىن. وسى لاۋازىمدا ءبىر جىلعا جۋىق قىزمەت ەتكەن ول ءوز ەركىمەن جۇمىستان شىعۋعا ءوتىنىش بەرگەن.

شىعىس قازاقستان وبلىسى اكىمى اپپاراتىنىڭ باسشىسى ەربول نۇرعاليەۆتىڭ ايتۋىنشا، ايماق باسشىسى ەرمەك كوشەربايەۆ بۇل وتىنىشكە قول قويدى. ەندى ونىڭ ورنىنا التاي اۋدانى اكىمىنىڭ مىندەتىن رەنات قۇرمامبايەۆ اتقارادى.

رەنات تىلەۋحان ۇلى 1980 -جىلى 25 - قاڭتاردا كاتونقاراعاي اۋدانىندا دۇنيەگە كەلگەن. «ينجەنەر- پەداگوگ» جانە «زاڭگەر» ماماندىقتارى بويىنشا ەكى جوعارى ءبىلىمى بار.

ەڭبەك جولىن 1998 -جىلى كاتونقاراعاي اۋدانى جاڭاۋىل ورتا مەكتەبىندە مۇعالىم بولىپ باستاعان. مەملەكەتتىك قىزمەتكە العاش رەت 2003 -جىلى كاتونقاراعاي اۋدانىنىڭ جاستارمەن جۇمىس جونىندەگى مادەنيەت ءبولىمىنىڭ باس مامانى بولىپ ورنالاستى.

2019-2021 -جىلدارى كاتونقاراعاي اۋدانىنىڭ اكىمى بولىپ قىزمەت ەتتى. وسىدان ءبىر اي بۇرىن التاي اۋدانى اكىمنىڭ ورىنباسارى بولىپ تاعايىندالعان.

ەسكە سالساق، بيىل تامىز ايىندا شىعىس قازاقستانداعى التاي قالاسىندا جوندەلىپ جاتقان لەنين ەسكەرتكىشى قيراپ قالعان بولاتىن.

كەيىن التاي اۋدانىنىڭ اكىمدىگى نە سەبەپتى لەنين ەسكەرتكىشىن جوندەۋگە قاراجات بولگەنىن تۇسىندىرگەن ەدى.

«بيىل قالا تۇرعىندارىنىڭ ءوتىنىشى بويىنشا لەنين ەسكەرتكىشى تۇرعان ورتالىق الاڭنىڭ تەحنيكالىق جاعدايىنا تالداۋ جۇرگىزۋ ءۇشىن ارنايى جۇمىس توبى قۇرىلعان بولاتىن. ونىڭ قۇرامىنا قوعام وكىلدەرى كىردى. سوعان وراي ورتالىق الاڭ مەن ەسكەرتكىشتى اباتتاندىرۋعا جانە اعىمداعى جوندەۋ جۇمىستارىن جۇرگىزۋگە اۋداندىق بيۋدجەتتەن 1 ميلليون 400 مىڭ تەڭگە ءبولىنىپ، «مەملەكەتتىك ساتىپ الۋ تۋرالى» ق ر زاڭىنا سايكەس كونكۋرس جاريالاندى»، - دەپ جاۋاپ بەردى اۋداندىق ىشكى ساياسات ءبولىمى قازاقپارات ءتىلشىسىنىڭ ساۋالىنا.

ءۇش رەت جۇرگىزىلگەن كونكۋرستىق راسىمدەردەن سوڭ مەردىگەر كومپانيا انىقتالعان. ول 15- تامىزدا جۇمىسقا كىرىسكەن. ەكى كۇننەن كەيىن لەنيننىڭ ەسكەرتكىشى قۇلاپ، قيراپ قالدى.

تاياۋدا لەنين ەسكەرتكىشىنىڭ ماڭىنا بەلگىسىز بىرەۋ «لەنيندى قايتارىڭدار!» دەپ جازىپ كەتكەن. قازىرگى ۋاقىتتا ونى پوليتسيا ىزدەستىرىپ جاتىر.

اۆتور:

تالعاتجان مۇحامەتبەك ۇلى