الماتى زووباعىندا پىلدەر قالاي ءومىر ءسۇرىپ جاتىر

الماتى. قازاقپارات- پىلدەردىڭ كوزىنەن جاس اعىپ، تەرلەگەن كەزدە اشۋلى بولادى. ءتىپتى، اينالاسىنداعىلارعا قاۋىپ ءتوندىرۋى مۇمكىن.

بۇل تۋرالى الماتى حايۋاناتتار باعىنىڭ وكىلدەرى ايتتى، دەپ حابارلايدى قازاقپارات ءتىلشىسى.

بۇگىندە الماتى حايۋاناتتار باعىندا ارۋجان جانە لاو اتتى ەكى ءپىل تۇرادى. ەكەۋى دە لاوستان 2000 -جىلى كەلگەن. لاو، 27 جاستا. ونىڭ جۇبى ارۋ ودان ەكى جاس كىشى.

«لاو - جاسى ۇلكەن ءپىل بولعاندىقتان كەيدە ونىڭ كوزى مەن قۇلاعىنىڭ تۇسىنان اششى تەر سياقتى سۇيىقتىق اعاتىن كەزدەرى بولادى. بۇل جاعداي «مۋست» دەپ اتالادى. سىرتتان قاراعان ادامعا ءپىلدىڭ كوزدەرىنەن جاس اعىپ، جىلاپ تۇرعانداي كورىنەدى. مۇنداي كەزدە پىلدەر اشۋلى، ىزالى بولىپ، اينالاسىنا قاۋىپ ءتوندىرۋى مۇمكىن. وڭتۇستىك ازيا ەلدەرىندە قولعا ۇستايتىن پىلدەردى «مۋست» كەزىندە شىنجىرلاپ، باعانعا بايلاپ قويادى. ءبىراق ءبىز بۇلاي ىستەمەيمىز. بۇل جاعدايدا ءبىز پىلدەردى ءبىر بىرىنەن بولەك قورشاۋدا ۇستايمىز. بۇل ەڭ الدىمەن قاۋىپسىزدىك ءۇشىن، لاو اگرەسسيا كەزىندە ارۋدى جاراقاتتاپ الماۋى ءۇشىن جاسالادى»، - دەيدى زووباق ماماندارى.

ايتۋلارىنشا، «مۋست» كەزەڭى لاودا جىلىنا 3-4 رەت بولادى جانە 1 ايدان 3 ايعا دەيىن سوزىلادى.

پىلدەرگە بەرىلەتىن سۋ تەحنيكالىق اۋماقتا، ۇلكەن بوشكەدە بولادى. ول جەرگە كەلۋشىلەر كىرە المايدى. ءبىراق پىلدەر قالاعان كەزدەرىندە بوشكەدەگى سۋدى ءىشىپ، ءشولىن قاندىرا الادى. ىدىستاعى سۋ ۇنەمى اۋىسىتىرىلىپ، تازا، سالقىن سۋ قۇيىلىپ تۇرادى.

حايۋاناتتار باعىندا ءپىلدى تاماقتاندىرۋ كۇنىنە شامامەن بەس-التى رەت جۇزەگە اسىرىلادى. الماتى زوولوگيالىق پاركىندەگى سۇتقورەكتىلەردىڭ كۇندەلىكتى راتسيونى كەلەسى نەگىزگى ونىمدەرمەن ۇسىنىلعان:

ءار پىلگە كۇنىنە 100 كەلىدەن اسا قورەك بەرىلەدى. سۇلى جارماسى - 4 ك گ، سۇلى - 1 ك گ، بيداي - 1,5 ك گ، قارا بيداي نانى – 4، ك گ (5-6 بولكە)، اق نان - 1 ك گ (2 بولكە)، ءسابىز - 17 ك گ، قىزىلشا - 11 ك گ، كارتوپ - 11 ك گ، قىرىققابات - 5 ك گ، ءتۇرلى جەمىستەر - 3 ك گ، اعاش، وسىمدىك ساباقتارى - 30 ك گ، شابىلعان ءشوپ - 15 ك گ، جاسىل ءشوپ - 15 ك گ، تۇز - 0,03 ك گ، بور - 0,03 ك گ جانە باسقا دا كوپتەگەن ازىق-تۇلىك بەرىلەدى.

«زووباعىمىزداعى پىلدەر تۇراتىن ساراي 1962 -جىلى سالىنعان. بيىل، الماتى قالاسى اكىمدىگىنىڭ قولداۋىمەن ءبىز پىلدەرگە، سۋسيىرلار مەن كەرىكتەرگە، زەبرا، انتيلوپالارعا ارنالعان «افريكا ساۆانناسى» كەشەنىن سالاتىن بولدىق. جوبالاۋ سمەتالىق قۇجاتتاۋ جۇمىستارى اياقتالىسىمەن، جاڭا كەشەن قۇرىلىسىن باستايتىن بولامىز. الداعى ۋاقىتتا بۇل كەشەندە پىلدەرىمىزدە جانە باسقا دا جانۋارلارىمىزعا ەرەكشە جاعداي جاسالاتىن بولادى»، - دەپ اتاپ ءوتتى زووباقتان.